പനച്ചിക്കാട്: ഹൈന്ദവ പ്രാചീന സംസ്കാരത്തിന്റെ ഉയിര്ത്തെഴുന്നെല്പ്പാവണം ഓരോ ഭാരതീയന്റെയും ലക്ഷ്യമെന്ന് ഹിന്ദു ഐക്യവേദി സംസ്ഥാന അധ്യക്ഷ കെ.പി. ശശികല ടീച്ചര് പറഞ്ഞു. പനച്ചിക്കാട് ദക്ഷിണ മൂകാംബി ഹിന്ദു മഹാസംഗമത്തിന്റെ സമാപന സമ്മേളനത്തില് മുഖ്യപ്രഭാഷണം നടത്തുകയായിരുന്നു അവര്.
വരും കാലങ്ങളില് ചെറുകോല്പ്പുഴ, മീനച്ചില് ഹിന്ദു സംഗമങ്ങളേക്കാള് ഉയരാനും ഹൈന്ദവ സംസ്കാരം നിലനിര്ത്താനും ദക്ഷിണമൂകാംബി ഹിന്ദു മഹാസംഗമത്തിനു സാധിക്കുമെന്നും ഉത്ഘാടന പ്രഭാഷണത്തില് അവര് പറഞ്ഞു. പാശ്ചാത്യ സംസ്കാരത്തിന്റെ കടന്നുകയറ്റവും ആഗോള വിപണനത്തിന്റെ അതിപ്രസരവും വിപത്തുകള് സൃഷ്ടിക്കുന്ന സാഹചര്യത്തില് ഭാരതീയ സംസ്കാരത്തിന് മൂല്യച്യുതി സംഭവിക്കാതിരിക്കണമെങ്കില് ഓരോ ഹിന്ദുവും സംഘടിക്കേണ്ടത് അത്യാവശ്യമാണെന്നും ടീച്ചര് കൂട്ടിച്ചേര്ത്തു.
ഹിന്ദുമഹാസംഗമം സ്വാഗത സംഘം രക്ഷാധികാരി കെ.എന്. ദാമോദരന് നമ്പൂതിരിയുടെ അധ്യക്ഷതയില് ചേര്ന്ന സമ്മേളനത്തില് കിടങ്ങന്നൂര് വിജയാനന്ദാശ്രമം മഠാധിപതി വിജയ ബോധാനന്ദ തീര്ഥപാദസ്വാമി ഭദ്രദീപം തെളിയിച്ച് ഉത്ഘാടനം ചെയ്തു. തുടര്ന്ന് മൊമന്റോ വിതരണം കെ.എന്. ദാമോദരന് നമ്പൂതിരി നിര്വഹിച്ചു. വിവിധ സാമുദായിക സംഘടനാ നേതാക്കന്മാരായ അനീഷ് എന്. പിള്ള, ജി. ശശികുമാര്, കെ.എന്. ജനാര്ദനാചാരി, ശാന്തമ്മ കേശവന്, കൃഷ്ണ കുമാര്, എ.ടി. തുളസീധരന്, എ.എസ്. സന്തോഷ് എന്നിവര് സംസാരിച്ചു.
രാവിലെ നടന്ന ഗണപതി ഹോമത്തോടെ ഹിന്ദുമഹാസംഗമവേദിയില് പരിപാടികള്ക്ക് തുടക്കമായി. തുടര്ന്ന് ഭജന, ചക്കുളത്തുകാവ് മുഖ്യകാര്യദര്ശി രാധാകൃഷ്ണന് തിരുമേനി നേതൃത്വം നല്കിയ മഹാ സര്വൈശ്വര്യപൂജ എന്നിവ നടന്നു.
ഉച്ചയ്ക്കുശേഷം നടന്ന യുവസംഗമം എംജി സര്വ്വകലാശാലാ വിവേകാനന്ദ ചെയര് ചെയര്മാന് പ്രൊഫ. ഓ.എം. മാത്യു ഉത്ഘാടനം ചെയ്തു. ജി. പ്രകാശ് മുഖ്യപ്രഭാഷണം നടത്തി. ആയിരങ്ങള് പങ്കെടുത്ത സമ്മേളനത്തോടുകൂടി ഹിന്ദുമഹാസംഗമം സമാപിച്ചു.
