പാലാ: ലോക്സഭാ തെരഞ്ഞെടുപ്പില് 2004 ആവര്ത്തിച്ചുകൊണ്ട് എന്ഡിഎ സ്ഥാനാര്ത്ഥി അഡ്വ. നോബിള് മാത്യുവിന്റെ വിജയം പാലാ നിയോജകമണ്ഡലത്തില് ഉറപ്പാക്കുമെന്ന് ബിജെപി നേതാക്കള് പറഞ്ഞു. പാലായില് നടത്തിയ പത്രസമ്മേളനത്തിലാണ് നേതാക്കള് ഇക്കാര്യം വ്യക്തമാക്കിയത്. പാലാ മണ്ഡലത്തിലെ പര്യടനത്തിനിടെ അദ്ദേഹത്തിന് വിവിധ മേഖലകളില് നിന്ന് ലഭിച്ച വമ്പിച്ച വരവേല്പ് ഈ യാഥാര്ത്ഥ്യം സ്ഥിരീകരിക്കുന്നതായും അവര് പറഞ്ഞു.
വികസനത്തിന്റെ പേരില് വോട്ടു ചോദിക്കുന്ന യുഡിഎഫ് സ്ഥാനാര്ത്ഥിയുടേതായി ഒരു പദ്ധതിപോലും മണ്ഡലത്തില് പൂര്ത്തീകരിച്ചിട്ടില്ല. പല പദ്ധതികളും ശിലാസ്ഥാപനം നടത്തുകമാത്രമാണ് ചെയ്തിരിക്കുന്നത്.
റബറിന്റെ വിലത്തകര്ച്ചയിലും തൊഴിലവസരങ്ങള് സൃഷ്ടിക്കുന്നതിലും ഇപ്പോഴത്തെ എം.പി പരാജയമായിരുന്നു. കുടിവെള്ള പ്രശ്നം പരിഹാരമില്ലാതെ കിടക്കുന്നു. മികച്ച ചികിത്സാ സൗകര്യം വിദ്യാഭ്യാസ റയില് ഗതാഗതം എല്ലാം അവഗണിക്കപ്പെട്ടിരിക്കുന്നു. മണ്ഡലത്തിന്റെ സമഗ്ര വികസനമാണ് എന്ഡിഎ മുന്നോട്ടു വയ്ക്കുന്നത്.
സിപിഎം സ്വന്തം സ്ഥാനാര്ത്ഥിയെ പിന്വലിച്ച് ജനതാദളിനു സീറ്റു നല്കിയതിലൂടെ ഇടതുപക്ഷം പരാജയം സമ്മതിച്ചിരിക്കുകയാണെന്നും നേതാക്കള് പറഞ്ഞു.
പത്രസമ്മേളനത്തില് ബിജെപി നേതാക്കളായ റ്റി.ആര് നരേന്ദ്രന്, കെ.എന് മോഹനന്, ജി. രണ്ജിത്ത്, റ്റി.ജി അനില്നാഥ്, ഇ.വി സുബ്രഹ്മണ്യന് നമ്പൂതിരി എന്നിവര് പങ്കെടുത്തു.
