കൊച്ചി: പച്ചാളം റെയില്‍വേ ഓവര്‍ ബ്രിഡ്ജിന്റെ നിര്‍മ്മാണ പ്രവര്‍ത്തനം ആരംഭിക്കുന്നതിനോടനുബന്ധിച്ച്‌ ഇന്നു മുതല്‍ പച്ചാളം റെയില്‍വേ ക്രോസ്സ്‌ പൂര്‍ണ്ണമായും അടച്ചിടും. റെയില്‍വേ ക്രോസ്സ്‌ വഴിയുള്ള ഗതാഗതം ഇനി പറയുന്ന രീതിയില്‍ തിരിച്ചുവിടുന്നതാണ്‌. ചിറ്റൂര്‍ റോഡ്‌, മത്തായി മാഞ്ഞൂരാന്‍ റോഡ്‌ വഴി വടുതല ഭാഗത്തേയ്‌ക്ക്‌ പോകുന്ന സ്വകാര്യ ബസ്സുകള്‍ ഉള്‍പ്പടെയുള്ള വാഹനങ്ങള്‍ പച്ചാളം ജംഗ്ഷനില്‍ നിന്ന്‌ തിരിഞ്ഞ്‌ ലൂര്‍ദ്ദ്‌ ഹോസ്പിറ്റല്‍ റോഡ്‌ വഴി വടുതല ഗേറ്റിലെത്തി പോകാവുന്നതാണ്‌.
വടുതല ഭാഗത്തുനിന്നും എറണാകുളം ഭാഗത്തേയ്‌ക്ക്‌ വരുന്ന സര്‍വ്വീസ്‌ ബസ്സുകള്‍ ഒഴികെയള്ള വാഹനങ്ങള്‍ വടുതല പെട്രോള്‍ പമ്പിനു എതിര്‍വശമുള്ള ഡോണ്‍ബോസ്കോ റോഡിലൂടെ വന്ന്‌ പുഷ്പക റോഡിലെത്തി ഇടത്തോട്ട്‌ തിരിഞ്ഞ്‌ ടി.കെ.സി. റോഡിലൂടെയും, പഴമ്പിള്ളി തോമസ്സ്‌ റോഡിലൂടെയും വന്ന്‌ പീറ്റര്‍ കൊറയ റോഡില്‍ പ്രവേശിച്ച്‌ ചാത്യാത്ത്‌ പള്ളി ജംഗ്ഷനിലെത്തി ഇടത്തോട്ട്‌ തിരിഞ്ഞ്‌ പച്ചാളം ജംഗ്ഷന്‍ വഴിയും, വലത്തോട്ട്‌ തിരിഞ്ഞ്‌ ചാത്യാത്ത്‌ റോഡ്‌ വഴിയും പോകേണ്ടതാണ്‌. സര്‍വ്വീസ്‌ ബസ്സുകള്‍ നിലവില്‍ പോകുന്ന പഴമ്പിള്ളി തോമസ്സ്‌ റോഡ്‌ പീറ്റര്‍ കൊറയ റോഡ്‌ വഴി പച്ചാളം ജംഗ്ഷനിലെത്തി പോകണം.
ചിറ്റൂര്‍ റോഡില്‍ നിന്നും പൊറ്റക്കുഴി, എളമക്കര ഭാഗത്തേയ്‌ക്ക്‌ പോകേണ്ടതായ വാഹനങ്ങള്‍ വടുതല റെയില്‍വേ ക്രോസ്സ്‌ വഴി വന്ന്‌ ആംഗ്ലോ ഇന്‍ഡ്യന്‍ സ്കൂള്‍ റോഡിലൂടെയോ, കര്‍ഷക റോഡിലൂടെയോ ഇടത്തോട്ട്‌ തിരിഞ്ഞ്‌ എന്‍.കെ. ശ്രീധരന്‍ റോഡിലൂടെ എസ്‌. ആര്‍. എം. റോഡിലെത്തി പോകണം. ആംഗ്ലോ ഇന്‍ഡ്യന്‍ സ്കൂള്‍ റോഡിലൂടെയോ, കര്‍ഷക റോഡിലൂടെയോ എന്‍.കെ. ശ്രീധരന്‍ റോഡില്‍ എത്തുന്ന വാഹനങ്ങള്‍ കെ.എസ്‌. ഉദയന്‍ റോഡിലൂടെ പി.ജെ. ആന്റണി റോഡിലെത്തി പൊറ്റക്കുഴി, എളമക്കര ഭാഗത്തേയ്‌ക്ക്‌ പോകണം.
പൊറ്റക്കുഴി, എളമക്കര ഭാഗത്തു നിന്നും വടുതല, പച്ചാളം ഭാഗത്തേയ്‌ക്ക്‌ പോകേണ്ടതായ വാഹനങ്ങള്‍ എസ്‌. ആര്‍. എം. റോഡിലൂടെ വന്ന്‌ കാട്ടുങ്കല്‍ അമ്പലത്തിനു മുന്നില്‍ നിന്നും വലത്തോട്ട്‌ തിരിഞ്ഞ്‌ വടുതല റെയില്‍വേ ക്രോസ്സ്‌ വഴി പോകേണ്ടതാണ്‌.
ഗതാഗത നിയന്ത്രണം വരുന്നതോടെ ചില റോഡുകള്‍ വണ്‍വേ ആക്കും. ലൂര്‍ദ്ദ്‌ ഹോസ്പിറ്റല്‍ റോഡില്‍ തെക്ക്‌ നിന്നും വടക്കോട്ട്‌ വാഹന ഗതാഗതം അനുവദിക്കുന്നതും (വണ്‍ വെ) വടക്കുനിന്നും തെക്കോട്ട്‌ നോ എന്‍ട്രി ആയിരിക്കുന്നതുമാണ്‌. പഴമ്പിള്ളി തോമസ്സ്‌ റോഡും, പീറ്റര്‍ കൊറയ റോഡും ചാത്യാത്ത്‌ പള്ളി ജംഗ്ഷന്‍വരെ വടക്കുനിന്നും തെക്കോട്ട്‌ വാഹന ഗതാഗതം അനുവദിക്കുന്നതും (വണ്‍ വെ) തെക്ക്‌ നിന്നും വടക്കോട്ട്‌ നോ എന്‍ട്രിആയിരിക്കും.
ലൂര്‍ദ്ദ്‌ ഹോസ്പിറ്റല്‍ റോഡില്‍ നിന്നും സമാജം റോഡിലേക്കും, പീറ്റര്‍ കൊറയ റോഡില്‍ നിന്നും ജീസസ്സ്‌ റോഡിലേക്കും എന്‍.കെ. ശ്രീധരന്‍ റോഡില്‍ നിന്നും ആംഗ്ലോ ഇന്‍ഡ്യന്‍ സ്കൂള്‍ റോഡിലേക്കും, കര്‍ഷക റോഡിലേക്കും നോ എന്‍ട്രി ആയിരിക്കും. എസ്‌. ആര്‍. എം. റോഡ്‌ ജംഗ്ഷനില്‍ നിന്നും പച്ചാളം റെയില്‍വേ ഗേറ്റ്‌ വരെയുള്ള വാഹന ഗതാഗതം ആ ഭാഗത്തെ താമസക്കാര്‍ക്ക്‌ മാത്രമായി നിജപ്പെടുത്തുന്നതായിരിക്കും. ഈ റോഡുകളിലൂടെ ലോറി ഉള്‍പ്പടെയുള്ള ചരക്കുവാഹനങ്ങള്‍ രാവിലെ 08.00 മുതല്‍ വൈകിട്ട്‌ 08.30 വരെ നിരോധിച്ചിരിക്കുന്നതും പ്രസ്തുത റോഡുകളില്‍ യാതൊരുവിധ പാര്‍ക്കിംഗ്‌ അനുവദിക്കുന്നതല്ല.
