കാല്പനികവും ഗൃഹാതുരവുമായ ആലാപന ശൈലിയിലൂടെ മലയാള ചലച്ചിത്ര ഗാനാസ്വദകരുടെ ഒരു കാലഘട്ടം സൃഷ്ടിച്ച ഗായകനാണ് കെ.പി.ഉദയഭാനു. ആലപിച്ച ഗാനങ്ങളുടെ വൈപുല്യത്തെക്കാളേറെ അവയുടെ മാധുര്യം കൊണ്ട് മലയാളികളുടെ മനം കവര്ന്ന ഗായകന്. ഗൃഹാതുരത്വം തുളുമ്പുന്ന നിരവധി ഗാനങ്ങള് കൈരളിക്ക് പകര്ന്നു തന്നിട്ടുണ്ട് ഉദയഭാനു. അവയോരോന്നും മലയാളിയുടെ ചണ്ടിലും മനസ്സിനും മായാതെ നില്ക്കുന്നു.
2009 ല് ഭാരത സര്ക്കാര് ഇദ്ദേഹത്തെ പത്മശ്രീ നല്കി ആദരിക്കുകയുണ്ടായി. 1985 ല് അദ്ദേഹം രൂപം നല്കിയ ജനകീയ സംഗീത പ്രസ്ഥാനം ‘ഓള്ഡ് ഈസ് ഗോള്ഡ്’ ഇപ്പോഴും സജീവമാണ്.
എന്.എസ്. വര്മയുടേയും അമ്മു നേത്യാരമ്മയുടേയും മകനായി 1936 ല് പാലക്കാട് ജില്ലയിലെ തരൂരില് ജനനം. കെ.പി. കേശവമേനോന് ഇദ്ദേഹത്തിന്റെ അമ്മാവനാണ്. ചെറുപ്പത്തിലേ സംഗീതവുമായി അടുത്തറിയാന് അവസരം ലഭിച്ച ഉദയഭാനു, എം.ഡി. രാമനാഥനുള്പ്പെടെയുള്ള പ്രഗല്ഭരുടെ കീഴില് സംഗീതം പഠിച്ചു. 1955 ല് ആകാശവാണിയില് അനൗണ്സറായി ചേര്ന്ന അദ്ദേഹം 38 വര്ഷം അവിടെ ജോലിചെയ്തു. ഒരു വര്ഷക്കാലം ഊട്ടിയില് സംഗീത അദ്ധ്യാപകനായും ജോലിചെയ്തു. സംഗീത സംവിധായകന് കെ. രാഘവനുമായുള്ള അടുപ്പമാണ് തന്നെ ചലച്ചിത്രപിന്നണിഗായകനാക്കിയത് എന്ന് ഉദയഭാനു പറയുന്നു. 1958 ല് ഇറങ്ങിയ ‘നായരു പിടിച്ച പുലിവാല്’ എന്ന ചിത്രത്തിലെ ഗാനാലാപനത്തിലൂടെയാണ് ചലച്ചിത്രത്തിലേക്കുള്ള പ്രവേശം. 1976 ലെ സമസ്യ എന്ന ചിത്രത്തിലെ ഗാനങ്ങള്ക്ക് സംഗീതം നല്കിയതും ഉദയഭാനുവായിരുന്നു. വേറെയും രണ്ടും സിനിമയിലെ ഗാനങ്ങള്ക്ക് സംഗീതം സംവിധാനം നിര്വ്വഹിച്ചെങ്കിലും അതു വെളിച്ചം കാണുകയുണ്ടായില്ല. എന്നാല് മലയാളത്തില് മാത്രം എണ്പതില്പരം ദേശഭക്തിഗാനങ്ങള്ക്ക് സംഗീതം നല്കിയിട്ടുണ്ട് ഉദയഭാനു.
വെള്ളിനക്ഷത്രമേ നിന്നെ നോക്കി…(രമണന്), അനുരാഗനാടകത്തില്…(നിണമണിഞ്ഞ കാല്പ്പാടുകള്), ചുടുകണ്ണീരാലെന്…(ലൈലാമജ്നു), താരമേ താരമേ(ലൈലാമജ്നു), താമരത്തുമ്പീവാവാ…, പൊന്വളയില്ലെങ്കിലും…(കുട്ടിക്കുപ്പായം), എവിടെ നിന്നോ എവിടെ നിന്നോ…, വെള്ളി നക്ഷത്രമേ…(രമണന്), മന്ദാര പുഞ്ചിരി…, വാടരുതീമലരിനി…(സത്യഭാമ), യാത്രക്കാരി യാത്രക്കാരി…, കരുണാസാഗരമേ…,പെണ്ണാളേ പെണ്ണാളേ…(ചെമ്മീന്), കാനനഛായയില്…(രമണന്) എന്നിവയാണ് അദ്ദേഹം ആലപിച്ച പ്രധാനഗാനങ്ങള്.
പത്മശ്രീ പുരസ്കാരം (2009)
കമുകറ പുരസ്കാരം (2006)
ഡോക്യുമെന്ററി സംഗീതത്തിനുള്ള ദേശീയ പുരസ്കാരംസന്തോഷ് ശിവന്റെ മിത്ത് ഓഫ് ദി ട്രീ,സെര്പെന്റ് മദര് എന്നീ ഡോക്യുമെന്ററികളിലെ സംഗീതത്തിന്.
കേരള സംഗീത നാടക അക്കാദമിയുടെ ഫെലോഷിപ്പ്(2003). നിരവധി പുരസ്കാരങ്ങള്.
