പുതുവര്ഷം കേരളത്തിന് നല്കുന്നത് പ്രതീക്ഷയല്ല, ആകാംക്ഷയാണ്. മന്ത്രിസഭാ പുനഃസംഘടനയില് കെപിസിസി പ്രസിഡന്റായിരുന്ന രമേശ് ചെന്നിത്തലയെ മന്ത്രിയാക്കി ആഭ്യന്തരവും വിജിലന്സും നല്കിയപ്പോള് സ്ഥാനഭ്രഷ്ടനായ തിരുവഞ്ചൂര് രാധാകൃഷ്ണന് നേരത്തെ ഗണേഷ് കുമാര് വഹിച്ചിരുന്ന വനം-സ്പോര്ട്സ് സിനിമാ വകുപ്പുകള് കൊണ്ട് തൃപ്തിയടയേണ്ടിവന്നിരിക്കുകയാണ്. ഭരണകക്ഷിയായ കോണ്ഗ്രസില് അപസ്വരങ്ങള് നിലനില്ക്കുന്നു എന്നതിന്റെ സൂചന കൂടിയാണിത്. ഒഴിഞ്ഞുകിടക്കുന്ന കെപിസിസി പ്രസിഡന്റ് സ്ഥാനത്ത് ആരെ അവരോധിക്കും മറ്റാരൊക്കെ സ്ഥാനഭ്രഷ്ടരാകും മുതലായവ ഉത്തരം ലഭിക്കേണ്ട ചോദ്യങ്ങളായി അവശേഷിക്കുന്നു. മന്ത്രിസഭാ പുനഃസംഘടന വരാന് പോകുന്ന ലോക്സഭാ തെരഞ്ഞെടുപ്പ് മുന്നില് കണ്ടാണെങ്കില് ഈ പുനഃസംഘടന ജനവികാരത്തെ ഒരുതരത്തിലും ബാധിക്കാന് സാധ്യതയില്ല. ഇന്ത്യയില് അഞ്ചു സംസ്ഥാനങ്ങളില് നടന്ന തെരഞ്ഞെടുപ്പില് കോണ്ഗ്രസിന് കിട്ടിയ തിരിച്ചടി ലോക്സഭാ തെരഞ്ഞെടുപ്പിലും നേരിട്ടേക്കാം എന്ന ആശങ്കയാണ് പ്രധാനമന്ത്രി മന്മോഹന് സിംഗിനെ പ്രധാനമന്ത്രി സ്ഥാനത്തുനിന്നും നീക്കി രാഹുല്ഗാന്ധിയെ പ്രധാനമന്ത്രിയാക്കുവാന് പോകുന്നു എന്ന വാര്ത്തയും അതിന്റെ നിഷേധവും. രാഹുലിനെ പ്രധാനമന്ത്രിയാക്കി തെരഞ്ഞെടുപ്പ് അഭിമുഖീകരിച്ചാല് വിജയം സുനിശ്ചിതം എന്ന കോണ്ഗ്രസ് ധാരണ നിയമസഭാ തെരഞ്ഞെടുപ്പുകളില് ബിജെപി നേടിയ വിജയം അസ്ഥാനത്താക്കുന്നു.
സ്ഥാനഭ്രഷ്ടനായ തിരുവഞ്ചൂര് തന്റെ ഭരണകാലം സുവര്ണ ലിപികളാല് രേഖപ്പെടുത്തും എന്ന് പത്രസമ്മേളനത്തില് പറഞ്ഞതു തന്നെ അദ്ദേഹത്തിന്റെ അതൃപ്തിയുടെ സൂചനയാണ്. എ ഗ്രൂപ്പുകാരനായ തിരുവഞ്ചൂരിനെ മാറ്റി ഐ ഗ്രൂപ്പുകാരനായ രമേശ് ചെന്നിത്തലയെ ആഭ്യന്തരമന്ത്രിയാക്കാന് മുഖ്യമന്ത്രി ഉമ്മന്ചാണ്ടി നിര്ബന്ധിതനാകുകയായിരുന്നു. മന്ത്രിസഭാ പുനഃസംഘടനയോ വകുപ്പ് മാറ്റമോ സര്ക്കാരിനെതിരായ ജനവികാരത്തെ ഒരുതരത്തിലും ബാധിക്കുകയില്ല. യുഡിഎഫ് ഭരണത്തിന് കീഴില് വികസിച്ചത് വികസനമായിരുന്നില്ല, വിവാദങ്ങളായിരുന്നല്ലോ. സരിതാ വിവാദം തന്നെയാണ് ഇപ്പോഴത്തെ മന്ത്രിസഭാ പുനഃസംഘടനയിലേക്ക് നയിച്ചതെന്ന് കരുതേണ്ടിയിരിക്കുന്നു. ജയില് വകുപ്പിന്റെ കൂടി ചുമതലയുണ്ടായിരുന്ന തിരുവഞ്ചൂര് രാധാകൃഷ്ണന്റെ ഭരണത്തിലാണ് ജയിലില് ടിപി വധക്കേസിലെ പ്രതികള് ഫേസ് ബുക്കില് കയറിയതും കോടികളുടെ വെട്ടിപ്പ് നടത്തിയ സരിതയ്ക്ക് മോഡലിനെപ്പോലെ ഫാഷനബിളായ വസ്ത്രങ്ങളും സൗന്ദര്യം നഷ്ടപ്പെടാതിരിക്കാന് സൗന്ദര്യവര്ധകവസ്തുക്കളും എത്തിച്ചുകൊടുത്തതും. ആഭ്യന്തര മന്ത്രി തിരുവഞ്ചൂരും സോളാര് കേസിലെ മറ്റൊരു പ്രതിയായ ശാലുമേനോനും തമ്മിലുള്ള കൂടിക്കാഴ്ചയും വിവാദമായിരുന്നു. സോളാര് കേസ് യുഡിഎഫ് മന്ത്രിസഭയുടേയും ആഭ്യന്തര മന്ത്രി തിരുവഞ്ചൂരിന്റേയും പ്രതിച്ഛായ തകര്ത്തു. യുഡിഎഫ് മന്ത്രിസഭ വിവാദച്ചുഴിയിലകപ്പെടുകയാണ്. സോളാര് കേസിലും ടി.പി.ചന്ദ്രശേഖരന് വധക്കേസിലും തിരുവഞ്ചൂര് സിപിഎം അനുകൂല സമീപനം കൈക്കൊണ്ടതായി വിമര്ശനമുയര്ത്തിയിരുന്നു.
ലോക്സഭാ തെരഞ്ഞെടുപ്പിന് മുന്പ് പാര്ട്ടി പ്രതിച്ഛായ ഉയര്ത്താനുള്ള ഈ നടപടി വ്യര്ത്ഥമാണ്. പാര്ട്ടിക്കുള്ളില് ഐക്യം പുനഃസ്ഥാപിക്കാനോ സര്ക്കാരിന്റെ പ്രതിച്ഛായ മെച്ചപ്പെടുത്താനോ ഈ നടപടി സഹായകമാകില്ല. എ-ഗ്രൂപ്പിലെ ആഭ്യന്തര കലാപം ഐ ഗ്രൂപ്പ് മുതലെടുത്തു എന്നുമാത്രം. കോണ്ഗ്രസില് പ്രശ്നങ്ങള് കൂടുതല് വഷളാകുന്നത് ആരെ കെപിസിസി പ്രസിഡന്റാക്കും എന്ന ആശയക്കുഴപ്പത്തിലാണ്. കാര്ത്തികേയനെ പ്രസിഡന്റാക്കിയാല് സ്പീക്കര് സ്ഥാനത്തേയ്ക്ക് മത്സരം വരും. ഈ രാഷ്ട്രീയ കളികളില് ചില രാഷ്ട്രീയനേതാക്കള് നേട്ടം കൊയ്യുമ്പോള് ജനങ്ങളുടെ പ്രശ്നങ്ങള് പരിഹാരമില്ലാതെ തുടരും.
ഇപ്പോള് 300 രൂപയോളം ഗ്യാസ് വില കൂട്ടിയെന്നും ഇല്ലെന്നുമുള്ള വാര്ത്തയും ആധാര് കാര്ഡില്ലാത്തവര്ക്ക് സബ്സിഡി ലഭിക്കില്ലെന്ന വാര്ത്തയും ജനങ്ങളെ മുള്മുനയിലാക്കുന്നു. ഗണേഷ് കുമാറിനെ മന്ത്രിസഭയിലെടുക്കാത്തതില് ബാലകൃഷ്ണപിള്ള അതൃപ്തനാണ്. ഗണേഷ് എംഎല്എ സ്ഥാനം രാജിവയ്ക്കും എന്ന ഭീഷണി യുഡിഎഫ് രാഷ്ട്രീയം കലുഷിതമാക്കുന്നു. ഗ്യാസ് വില വര്ധനയും ആധാര്കാര്ഡിന്റെ ലഭ്യതാപ്രശ്നവും ജനങ്ങളെ ദുരിതത്തിലാക്കുന്നു. എന്നിട്ടും ജനങ്ങളുടെ ആശങ്കകള്ക്ക് പ്രതിവിധി കാണാനല്ല തങ്ങളുടെ പദവികള് സംരക്ഷിക്കുന്നതിനാണ് യുഡിഎഫ് നേതാക്കള്ക്ക് താല്പ്പര്യം.
