കോട്ടയം: ഒന്പതാമത് കോട്ടയം ഹിന്ദു ധര്മ്മ പരിഷത്ത് 20 മുതല് 26 വരെ തിരുനക്കര ക്ഷേത്രമൈതാനിയിലെ ശിവശക്തി ഓഡിറ്റോറിയത്തില് നടക്കും. മണ്ഡലവ്രതത്തോടനുബന്ധിച്ച് നടക്കുന്ന പ്രഭാഷണ പരമ്പരയില് ആദ്ധ്യാത്മിക ആചാര്യന്മാരും പണ്ഡിതശ്രഷ്ഠരും പങ്കെടുക്കും. 20ന് വൈകിട്ട് 5.30ന് എം.രാജഗോപാലന് നായരുടെ അദ്ധ്യക്ഷതയില് ചേരുന്ന യോഗത്തില് തിരുവിതാംകൂര് ദേവസ്വം ബോര്ഡ് പ്രസിഡന്റ് എം.പി.ഗോവിന്ദന് നായര് പരിഷത്ത് ഉദ്ഘാടനം ചെയ്യും. സംസ്ഥാന ധര്മ്മജാഗരണ് പ്രമുഖ് വി.കെ.വിശ്വനാഥന്, പരിഷത്ത് രക്ഷാധികാരി എം.എസ്.പത്മനാഭന്, ക്ഷേത്രോപദേശകസമിതി പ്രസിഡന്റ് സി.എന്.സുഭാഷ് എന്നിവര് ആശംസകളര്പ്പിക്കും. തുടര്ന്ന് ഇന്ത്യന് ഇന്സ്റ്റിറ്റിയൂട്ട് ഓഫ് സയന്റിഫിക് ഹെറിറ്റേജ് ഡയറക്ടര് ഡോ.എന്.ഗോപാലകൃഷ്ണന് ‘വികസനസങ്കല്പവും ആത്മീയതയും’ എന്ന വിഷയത്തെ ആധാരമാക്കി പ്രഭാഷണം നടത്തും.
21ന് ചിന്മയമിഷന് സെക്രട്ടറി എ.എസ്.മണിയുടെ അദ്ധ്യക്ഷതയില് കൂടുന്ന യോഗത്തില് ഇരിങ്ങാലക്കുട താന്ത്രികഗവേഷണകേന്ദ്രം ഡയറക്ടര് എല്.ഗിരീഷ്കുമാര്, ‘ക്ഷേത്രോപാസനയും സമൂഹവും’ എന്ന വിഷയത്തെ അധികരിച്ച് സംസാരിക്കും.
22ന് ജയകുമാറിന്റെ അദ്ധ്യക്ഷതയില് ചേരുന്ന യോഗത്തില് ആലുവ അദ്വൈതാശ്രമം ആചാര്യന് സ്വാമി ശിവസ്വരൂപാനന്ദ, ‘ബ്രഹ്മവിദ്യാപഞ്ചക’ത്തെപ്പറ്റി പ്രഭാഷണം നടത്തും. 23ന് സ്വാമിനി ദേവിജ്ഞാനാഭനിഷ്ഠ ‘ഭാരതീയ സങ്കല്പ’ത്തെക്കുറിച്ച് സംസാരിക്കും. എസ്എന്ഡിപി താലൂക്ക് യൂണിയന് പ്രസിഡന്റ് എ.ജി.തങ്കപ്പന് അദ്ധ്യക്ഷത വഹിക്കും. 24ന് ചിന്മയ വിദ്യാലയ സെക്രട്ടറി എ.അരവിന്ദന്റെ അദ്ധ്യക്ഷതയില് കൂടുന്ന യോഗത്തില് പ്രസിദ്ധ ചിന്തകന് തുറവൂര് വിശ്വംഭരന് ‘ധര്മ്മസങ്കല്പ’ത്തെക്കുറിച്ച് സംസാരിക്കും.
25ന് നടക്കുന്ന സമ്മേളനത്തില് കാണക്കാരി രവി അദ്ധ്യക്ഷത വഹിക്കും. തിരുവനന്തപുരം ചിന്മയ മിഷന് ആചാര്യ സ്വാമിനി സംഹിതാനന്ദ ‘ഭക്തിസങ്കല്പം ഭഗവത്ഗീതയില്’ എന്ന വിഷയത്തെക്കുറിച്ച് സംസാരിക്കും.
26ന് തപസ്യ കലാവേദി പ്രസിഡന്റ് കിളിരൂര് രാധാകൃഷ്ണന് അദ്ധ്യക്ഷത വഹിക്കുന്ന ചടങ്ങില് പ്രസിദ്ധ കവിയും ഗാനരചയിതാവുമായ എസ്.രമേശന് നായര് ‘വിവേകാനന്ദ സന്ദേശ’ത്തെ അധികരിച്ച് സംസാരിക്കും.
എല്ലാദിവസങ്ങളിലും പ്രഭാഷണത്തിനുശേഷം കോട്ടയം രാഗലയ സംവിധാനം ചെയ്യുന്ന കോട്ടയം വീരമണി, പ്രൊഫ.പൊന്കുന്നം രാമചന്ദ്രന്, മാതംഗി സത്യമൂര്ത്തി, വാഴൂര് പ്രഭാകരന്, വത്സല രാമകൃഷ്ണന്, എന്.യു.സഞ്ജയ്, വൈക്കം രാജമ്മാള് എന്നിവരുടെ ശാസ്ത്രീയ സംഗീതക്കച്ചേരി നടക്കും.
