കെയ്‌റൊ: ഈജിപ്റ്റില്‍ നിരോധിത സംഘടന മുസ്ലിം ബ്രദര്‍ഹുഡിന്റെ മറ്റൊരു നേതാവ് കൂടി അറസ്റ്റില്‍. ബ്രദര്‍ഹുഡിന്റെ രാഷ്‌ട്രീയ സംഘടന ഫ്രീഡം ആന്റ് ജസ്റ്റിസ് പാര്‍ട്ടി ഉപമേധാവി ഇസ്സം അല്‍ ഏരിയനാണ് സൈന്യത്തിന്റെ പിടിയിലായത്.
ഇസ്ലാമിക സംഘടനാ നേതാക്കള്‍ക്കെതിരായ സൈനിക നടപടിയെത്തുടര്‍ന്ന് ഒളിവിലായിരുന്ന ഏരിയനെ ന്യൂ കെയ്‌റോയിലാണ് അറസ്റ്റ് ചെയ്തത്. പ്രസിഡന്റ് മുഹമ്മദ് മുര്‍സിയെ അധികാരഭ്രഷ്ടനാക്കിയതിനെത്തുടര്‍ന്ന് ഈജിപ്റ്റില്‍ ആഭ്യന്തര കലാപം രൂക്ഷമായിരുന്നു. മുര്‍സിയെ അനുകൂലിക്കുന്നവരും എതിര്‍ക്കുന്നവരും തമ്മിലുള്ള ഏറ്റുമുട്ടലുകളിലും സൈനിക നടപടിയിലും ആയിരക്കണക്കിനാളുകള്‍ കൊല്ലപ്പെട്ടു. തുടര്‍ന്ന്, ഓഗസ്റ്റില്‍ മുര്‍സി അനുകൂലികളായ ബ്രദര്‍ഹുഡ് നേതാക്കള്‍ക്കെതിരേ സൈനിക നടപടി ആരംഭിച്ചു.
മുതിര്‍ന്ന നേതാക്കള്‍ ഉള്‍പ്പെടെ രണ്ടായിരത്തോളം പ്രവര്‍ത്തകരെ അറസ്റ്റ് ചെയ്തിരുന്നു. സെപ്റ്റംബറില്‍, മുസ്ലിം ബ്രദര്‍ഹുഡിനെയും മറ്റ് ഉപ സംഘടനകളെയും നിരോധിച്ച കോടതി സംഘടനയുടെ വസ്തുവകകള്‍ കണ്ടുകെട്ടിയിരുന്നു.
