പൊന്കുന്നം: ഭാരതീയ ജനസംഘത്തിന്റെ ജില്ലാസെക്രട്ടറിയായിരിക്കെ 1969 സപ്തംബര് 7ന് മാര്ക്സിസ്റ്റ് അക്രമികളാല് കൊലചെയ്യപ്പെട്ട പൊന്കുന്നം ശ്രീധരന്നായരുടെ ബലിദാനദിനം ആചരിക്കുമ്പോള് ബിജെപി ചിറക്കടവ് പഞ്ചായത്ത് കമ്മറ്റി ‘ശ്രീധരീയം’ ഭവനനിര്മ്മാണ പദ്ധതിക്ക് തുടക്കം കുറിക്കുകയാണ്. ബിജെപിയുടെ പൂര്വ്വരൂപമായ ജനസംഘത്തിന് സംഘടനാ അടിത്തറ ശക്തമാക്കുന്നതില് ശ്രീധരന്നായര് എന്ന അദ്ധ്യാപകന് വലിയ പങ്കുവഹിച്ചു.
നിരവധി ആളുകള് ജനസംഘത്തിന്റെ ആദര്ശത്തില് ആകൃഷ്ടരായി സംഘടനാപ്രവര്ത്തനത്തില് കടന്നുവന്നതില് വിറളിപൂണ്ട കമ്യൂണിസ്റ്റ്പ്രസ്ഥാനം പൊന്കുന്നം ശ്രീധരന്നായരെ വകവരുത്തുകയായിരുന്നു. ശ്രീധരന്നായരുടെ ജീവനപഹരിച്ചവരുടെ അക്രമരാഷ്ട്രീയത്തിനെതിരെ പടപൊരുതിനേടിയ സംഘടനാ ശക്തിയുമായി ബിജെപി ഇന്ന് വിവിധങ്ങളായ ജനക്ഷേമപ്രവര്ത്തനങ്ങള്ക്ക് നേതൃത്വം നല്കുകയാണ്. ചിറക്കടവ് പഞ്ചായത്തിലെ പതിനാറാം വാര്ഡിലെ നിര്ദ്ധനകുടുംബത്തിന് വീടുനിര്മ്മിച്ചു നല്കിക്കൊണ്ടാണ് ഇപ്പോള് ‘ശ്രീധരീയം’ ഭവന നിര്മ്മാണ പദ്ധതി ആരംഭിക്കുന്നത്.
നിര്ദ്ധനരും ആലംബഹീനരുമായവര്ക്ക് കിടപ്പാടം ഒരുക്കുന്ന പദ്ധതി നാളെ വൈകിട്ട് 5ന് ബിജെപി സംസ്ഥാന ജനറല് സെക്രട്ടറി കെ.സുരേന്ദ്രന് ഉദ്ഘാടനം ചെയ്യും. ബലിദാനദിനാചരണത്തിന്റെ ഭാഗമായി രാവിലെ 8ന് ചിറക്കടവ് പുന്നാംപതാലില് വീട്ടുവളപ്പിലുള്ള സ്മൃതിമണ്ഡപത്തില് പുഷ്പാര്ച്ചനയും അനുസ്മരണവും നടക്കും.
പൊന്കുന്നം ശ്രീധരന് നായര് കൊലചെയ്യപ്പെട്ട കൂരാലിയില് നിന്നും പൊന്കുന്നത്തേക്ക് സ്മൃതിജ്യോതി പ്രയാണം വൈകിട്ട് 4ന് അഡ്വ.എസ്.ജയസൂര്യന് ഉദ്ഘാടനം ചെയ്യും. പൊന്കുന്നം അട്ടിക്കല് കവലയില് നിന്നും 5ന് ബഹുജനറാലി ആരംഭിക്കും. തുടര്ന്ന് രാജേന്ദ്രമൈതാനിയില് നടക്കുന്ന പൊതുസമ്മേളനത്തില് കെ.സുരേന്ദ്രന്, ഏറ്റുമാനൂര് രാധാകൃഷ്ണന്, എന്.ഹരി, കെജി.കണ്ണന്, വിജു മണക്കാട് തുടങ്ങിയവര് പ്രസംഗിക്കും.
