പാലാ: പാലാ ബ്ലഡ്ബാങ്ക് പ്രോജക്ടിന്റെ ഉദ്ഘാടനം നാളെ രാവിലെ 9.30 ന് മന്ത്രി കെ.എം മാണി നിര്വ്വഹിക്കും. കിഴതടിയൂര് സര്വ്വീസ് സഹകരണബാങ്ക്, റോട്ടറിക്ലബ്ബ് പാലാ, മറിയന് മെഡിക്കല് സെന്റര് എന്നീ സ്ഥാപനങ്ങള് സംയുക്തമായി ബ്ലഡ് ഡൊണേഷന് ഫോറത്തിന്റെ സഹകരണത്തോടെയാണ് പദ്ധതി നടപ്പാക്കുന്നത്.
കിഴതടിയൂര് ബാങ്ക് ഹാളില് നടക്കുന്ന ഉദ്ഘാടന സമ്മേളനത്തില് റോട്ടറി ഡിസ്ട്രിക്ട് ഗവര്ണര് പി.ജി മുരളീധരന് അധ്യക്ഷതവഹിക്കും. മാര് ജോസഫ്പള്ളിക്കാപ്പറമ്പില് അനുഗ്രഹപ്രഭാഷണവും ജോസ് കെ. മാണി എം.പി മുഖ്യപ്രഭാഷണവും നടത്തും നഗരസഭാധ്യഷന് കുര്യാക്കോസ് പടവന് ബാങ്ക് പ്രസിഡന്റായും അഡ്വ. ജോര്ജ്ജ് സി. കാപ്പന്, പാലാ റോട്ടറിക്ലബ്ബ് പ്രസിഡന്റ് സക്കറിയാസ് ജോസഫ്, മരിയന് മെഡിക്കല് സെന്റര് സൂപ്രണ്ട് ഡോ. കെ.ജെ ജയിംസ്, പിഎസ്സി അംഗം അഡ്വ. തോമസ് വി.ടി, ഡോ. തോമസ് വാവാനിക്കുന്നേല് എന്നിവര് പ്രസംഗിക്കും.
രക്തത്തിലെ വിവിധ ഘടകങ്ങള് വേര്തിരിക്കുന്നതിനുള്ള കോമ്പോണന്റ് സെപ്പറേഷന് യൂണിറ്റും ഇതോടൊപ്പം പ്രവര്ത്തനമാരംഭിക്കും. മീനച്ചില്, വൈക്കം കാഞ്ഞിരപ്പള്ളി പ്രദേശങ്ങളിലെ ജനങ്ങള്ക്ക് ഇതിന്റെ പ്രയോജനം ലഭിക്കുമെന്ന് ബാങ്ക് പ്രസിഡന്റ് അഡ്വ. ജോര്ജ്ജ് സി. കാപ്പന് പറഞ്ഞു. സക്കറിയാസ് ജോസഫ്, സന്തോഷ് മാട്ടേല്, സിബി തോട്ടുപുറം, ഡോ. തോമസ് വാവാനിക്കുന്നേല് എന്നിവരും പത്രസമ്മേളനത്തില് പങ്കെടുത്തു.
