വാര്‍ഷിക പദ്ധതിക്ക് അംഗീകാരം നല്‍കി

കോട്ടയം: ജില്ലയിലെ കല്ലറ, മുത്തോലി ഗ്രാമപഞ്ചായത്തുകളുടെ വാര്‍ഷിക പദ്ധതിക്ക് ആസൂത്രണ സമിതി യോഗം അംഗീകാരം നല്‍കി. കല്ലറ ഗ്രാമപഞ്ചായത്തിന്റെ 243.61 ലക്ഷം രൂപയുടെ 79 പദ്ധതികള്‍ക്കും മുത്തോലി ഗ്രാമപഞ്ചായത്തിന്റെ 296.41 ലക്ഷം രൂപയുടെ 97 പദ്ധതികള്‍ക്കുമാണ് അംഗീകാരം ലഭിച്ചത്. ജില്ലാ പഞ്ചായത്ത് കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ സമിതി ചെയര്‍പേഴ്‌സണായ ജില്ലാ പഞ്ചായത്ത് പ്രസിഡന്റ് നിര്‍മ്മല ജിമ്മി അധ്യക്ഷതവഹിച്ചു. നിലവിലുള്ള പദ്ധതി രൂപീകരണം, അംഗീകാര നടപടികള്‍ യോഗം വിലയിരുത്തി, ഏകദേശം 12,000 പദ്ധതികളാണ് ജില്ലയില്‍ തയ്യാറാക്കേണ്ടത്. 8,500 പദ്ധതികളാണ് ഇതുവരെ ആവിഷ്‌കരിച്ചിട്ടുള്ളത്. എല്ലാ തദ്ദേശഭരണ സ്ഥാപനങ്ങളും അടിയന്തരമായി മുഴുവന്‍ പദ്ധതികളും തയ്യാറാക്കി മേലുദ്യോഗസ്ഥരുടെ അംഗീകാരം വാങ്ങണമെന്ന് യോഗം നിര്‍ദേശിച്ചു. പദ്ധതികളുടെ ഡാറ്റാ എന്‍ട്രിക്ക് സര്‍ക്കാര്‍ നിശ്ചയിച്ച അവസാന തീയതി 15 ആണ്. ഇതില്‍ മാറ്റമില്ലെന്ന് ചെയര്‍ പേഴ്‌സണ്‍ വ്യക്തമാക്കി. തദ്ദേശഭരണ സ്ഥാപനങ്ങളുടെ പദ്ധതി അംഗീകാര നടപടികള്‍ക്കായുള്ള ആസൂത്രണ സമിതി യോഗം ജൂലൈ 12നും 15നും ഉച്ചകഴിഞ്ഞ് മൂന്നിന് ജില്ലാ പഞ്ചായത്ത് കോണ്‍ഫറന്‍സ് ഹാളില്‍ നടക്കും. ആസൂത്രണ സമിതി അംഗങ്ങളായ ജില്ലാ പഞ്ചായത്ത് വൈസ് പ്രസിഡന്റ് അഡ്വ. ഫില്‍സണ്‍ മാത്യൂസ്, ബിജു പുന്നത്താനം, എന്‍.ജെ. പ്രസാദ്, കബീര്‍ മുക്കാലി, അനിത ടീച്ചര്‍, ആലീസ് ജോസഫ്, ജില്ലാ പ്ലാനിംഗ് ഓഫീസര്‍ കെ.ആര്‍. മോഹനന്‍ എന്നിവര്‍ യോഗത്തില്‍ പങ്കെടുത്തു.