കോട്ടയം: സാമൂഹ്യനീതിവകുപ്പ് ജില്ലാ ഓഫീസില് നിന്നും 2012-13 സാമ്പത്തികവര്ഷം വിദ്യാഭ്യാസസഹായമായി 515 ഗുണഭോക്താക്കള്ക്ക് 15,67,500 രൂപ വിതരണം ചെയ്തു. വനിതകള് ഗൃഹനാഥരായുള്ള കുടുംബങ്ങളിലെ പ്ലസ്ടു തലം വരെയുള്ള കുട്ടികള്ക്ക് ഈ ഇനത്തില് 2,500 രൂപ വീതവും ഡിഗ്രിതലത്തിലുള്ളവര്ക്ക് 5,000 രൂപ വീതവും സ്കോളര്ഷിപ്പായി നല്കിവരുന്നുണ്ടെന്ന് ജില്ലാ സാമൂഹ്യനീതി ഓഫീസര് അറിയിച്ചു.
കഴിഞ്ഞ സാമ്പത്തികവര്ഷം ഒന്നാംക്ലാസ് മുതല് ബിരുദംവരെ പഠിക്കുന്ന 11 വികലാംഗ വിദ്യാര്ഥികള്ക്കായി 19,250 രൂപ വകുപ്പ് മുഖേനയും മൂന്നു കുട്ടികള്ക്ക് 4,700 രൂപ മുനിസിപ്പാലിറ്റിവഴിയും വിതരണം ചെയ്തു. വികലാംഗരായ പെണ്കുട്ടികള്ക്കും വികലാംഗരുടെ പെണ്കുട്ടികള്ക്കുമുള്ള വിവാഹധനസഹായമായി 90,000 രൂപ നല്കി. ഒന്പത് പേര്ക്ക് ഇതിന്റെ പ്രയോജനം ലഭിച്ചു.
വികലാംഗ ദുരിതാശ്വാസനിധിയില്നിന്നും വികലാംഗര്ക്കുള്ള ചികിത്സാധനസഹായമായി 43 പേര്ക്ക് 1,11,000 രൂപ ലഭ്യമാക്കി. മിശ്രവിവാഹിതരായ ദമ്പതികള്ക്കായി കഴിഞ്ഞവര്ഷം 20,000 രൂപ വിതരണം ചെയ്തു.
കിടപ്പിലായ രോഗികളെ പരിപാലിക്കുന്നവരും പൂര്ണ്ണ ശ്രദ്ധയും പരിചരണവും ആവശ്യമായ മാനസികരോഗികളെ പരിചരിക്കുന്നവരും ഉള്പ്പെടെ 1,215 പേര്ക്ക് ആശ്വാസകിരണം പദ്ധതിയില് സാമൂഹ്യസുരക്ഷാമിഷന്വഴി പ്രതിമാസം 400 രൂപ വീതം നല്കി. അവിവാഹിതരായ അമ്മമാര്ക്കുള്ള സമാശ്വാസ പെന്ഷന് പദ്ധതിയായ സ്നേഹസ്പര്ശത്തിലൂടെ 11 പേര്ക്ക് പ്രതിമാസം 1,000 രൂപ വീതം വിതരണം ചെയ്തു.
പീഡനത്തിനിരയായ ഒന്പത് സ്ത്രീകള്ക്ക് 2,10,000 രൂപ അനുവദിച്ചുനല്കി. ജില്ലയില് സര്ക്കാര് അംഗീകാരത്തോടുകൂടി പ്രവര്ത്തിക്കുന്ന 75 അനാഥാലയങ്ങള്ക്ക് 84,83,054 രൂപയും 35 വൃദ്ധസദനങ്ങള്ക്ക് 40,45,597 രൂപയും നാല് വികലാംഗസദനങ്ങള്ക്ക് 11,46,737 രൂപയും ഒരു ബെഗര് ഹോമിന് 1,55,000 രൂപയും ഗ്രാന്റ് ഇനത്തില് നല്കി.
നാഷണല് ട്രസ്റ്റ്-ലീഗല് ഗാര്ഡിയന്ഷിപ്പ് നിശ്ചയിച്ച് നല്കുന്നത് പ്രകാരം ഈ വര്ഷം 22 പേര്ക്ക് വ്യക്തിഗത ഗാര്ഡിയന്ഷിപ്പും ഏഴു പേര്ക്ക് വസ്തുക്കള്ക്കുള്ള ഗാര്ഡിയന്ഷിപ്പും നാല് പേര്ക്ക് താല്ക്കാലിക ഗാര്ഡിയന്ഷിപ്പും നിശ്ചയിച്ചുനല്കി.
