കോട്ടയം: കേരള ലളിതകലാ അക്കാദമിയുടെ ആഭിമുഖ്യത്തില് സംഘടിപ്പിച്ച ചുമര്ചിത്രകലാക്യാമ്പിന്റെ സമാപനം കുറിച്ച് 25ന് വൈകുന്നേരം നാലിന് കോട്ടയത്തെ മുഖ്യമന്ത്രി ഉമ്മന് ചാണ്ടി ചുമര്ചിത്രനഗരിയായി പ്രഖ്യാപിക്കും. സാംസ്കാരിക മന്ത്രി കെ.സി. ജോസഫ് അധ്യക്ഷത വഹിക്കുന്ന ചടങ്ങില് ആഭ്യന്തരമന്ത്രി തിരുവഞ്ചൂര് രാധാകൃഷ്ണന് വിദേശകലാകാരന്മാരെ ആദരിക്കും. ഇന്ഫര്മേഷന്-പബ്ലിക് റിലേഷന്സ് വകുപ്പ് പുറത്തിറക്കുന്ന കോട്ടയം ജില്ലാ ചുമര്ചിത്രപുസ്തകത്തിന്റെ പ്രകാശനവും അദ്ദേഹം നിര്വ്വഹിക്കും. ജോസ് കെ. മാണി എം.പി. മുഖ്യാതിഥിയായിരിക്കും. ചലച്ചിത്രനടന് മധു അനുഗ്രഹപ്രഭാഷണം നടത്തും. കേരള കലാമണ്ഡലം കല്പ്പിത സര്വ്വകലാശാല വൈസ് ചാന്സലര് വി.എന്. സുരേഷ്, ജില്ലാ കളക്ടര് മിനി ആന്റണി, മുനിസിപ്പല് ചെയര്മാന് എം.പി. സന്തോഷ് കുമാര് എന്നിവര് ആശംസകളര്പ്പിക്കും.
ജില്ലാ പഞ്ചായത്ത് ആക്ടിംഗ് പ്രസിഡന്റ് ബീനാ ബിനു, സാംസ്കാരിക വകുപ്പ് സെക്രട്ടറി റാണി ജോര്ജ്, കേരള ലൡതകലാ അക്കാദമി വൈസ് ചെയര്മാന് പ്രൊഫ. കാട്ടൂര് നാരായണപിള്ള, ചീഫ് കോ -ഓര്ഡിനേറ്റര് കെ.യു. കൃഷ്ണകുമാര് തുടങ്ങിയവര് പങ്കെടുക്കും. ലളിതകലാ അക്കാദമി ചെയര്മാന് കെ.എ. ഫ്രാന്സിസ് സ്വാഗതവും സെക്രട്ടറി ശ്രീമൂലനഗരം മോഹനന് നന്ദിയും പറയും.
