കോട്ടയം: കോഴാ ശ്രീനരസിംഹസ്വാമി ക്ഷേത്രത്തിലെ നരസിംഹജയന്തി ആഘോഷങ്ങള് അക്ഷയതൃതീയ ദിവസമായ 13ന് ആരംഭിക്കുമെന്ന് സംഘാടകര് പത്രസമ്മേളനത്തില് അറിയിച്ചു. വൈകിട്ട് 7മണിക്ക് ക്ഷേത്രാങ്കണത്തില് ചേരുന്ന സമ്മേളനം മന്ത്രി തിരുവഞ്ചൂര് രാധാകൃഷ്ണന് ഉദ്ഘാടനം ചെയ്യും. മോന്സ് ജോസഫ് എംഎല്എ അദ്ധ്യക്ഷത വഹിക്കും. ആഘോഷസമിതി ജനറല് കണ്വീനര് പി.ആര്.ജയേഷ് സ്വാഗതവും ദേവസ്വം പ്രസിഡന്റ് ജി.പ്രകാശ് പുതിയാപറമ്പില് ആമുഖപ്രഭാഷണവും നടത്തും. വാഴൂര് തീര്ത്ഥപാദാശ്രമം മുഖ്യകാര്യദര്ശി സ്വാമി ഗരുഡധ്വജാനന്ദ തീര്ത്ഥപാദര് അനുഗ്രഹപ്രഭാഷണം നടത്തും. ഗ്രാമപഞ്ചായത്ത് പ്രസിഡന്റ് ടി.എസ്.രമാദേവി ജില്ലാ പഞ്ചായത്തംഗം മിനി ബാബു, ബ്ലോക്ക് പഞ്ചായത്തംഗം പി.എന്.മോഹനന്, ഗ്രാമപഞ്ചായത്തംഗം മിനി മത്തായി, എന്എസ്എസ് താലൂക്ക് യൂണിയന് വൈസ് പ്രസിഡന്റ് പി.എസ്.ഷാജികുമാര് പയനാല്, എസ്എന്ഡിപിയോഗം കടുത്തുരുത്തി യൂണിയന് സെക്രട്ടറി എന്.കെ.രമണന്, വിശ്വകര്മ്മ സഭ താലൂക്ക് യൂണിയന് പ്രസിഡന്റ് അനില് ആറുകാക്കല്, ടി.ആര്.ഗോവിന്ദന്കുട്ടി നായര് എന്നിവര് ആശംസകള് അര്പ്പിക്കും. ഹരികുമാര് എസ്. നന്ദിപറയും.
നരസിംഹജയന്തി ആഘോഷങ്ങളുടെ ഭാഗമായി 13മുതല് ദശാവതാരം ചാര്ത്ത് നടക്കും. വൈകിട്ട് 5.30നാണ് ദര്ശനം. 16ന് വൈകിട്ട് 7ന് പൂത്തില്ലം മധു നാരായണന് നമ്പൂതിരി മുഖ്യ യജ്ഞാചാര്യനായി ഭാഗവതസപ്താഹയജ്ഞം ആരംഭിക്കും. 23ന് സമാപിക്കും. സപ്താഹദിവസങ്ങളില് എല്ലാ ദിവസവും ഉച്ചയ്ക്ക് 1ന് പ്രസാദമൂട്ട് ഉണ്ടായിരിക്കും.
നരസിംഹജയന്തി ആഘോഷങ്ങളുടെ ഭാഗമായി 14ന് വൈകിട്ട് 7ന് നരസിംഹസ്വാമി വാദ്യകലാസംഘത്തിന്റെ ചെണ്ടമേളം അരങ്ങേറ്റം, 15ന് ഏഴിന് ആയാംകുടി വനിതായോഗക്ഷേമസഭയുടെ തിരുവാതിരകളി, 17ന് 7ന് പെരുമ്പാവൂര് അഞ്ജന വിജയന്റെ സംഗീതസദസ്, 18ന് 7ന് അമനകര ജഗദംബിക ഭജന്സിന്റെ ഭജന്സ്, 19ന് 7ന് കൈരളി അക്ഷരശ്ലോകരംഗം, ഇടനാട് അവതരിപ്പിക്കുന്ന അക്ഷരശ്ലോകസദസ്, 20ന് 7ന് ഏറ്റുമാനൂര് മോക്ഷ സംഗീത വിദ്യാലയം അവതരിപ്പിക്കുന്ന നൃത്തനൃത്യങ്ങള്, 21ന് 7ന് രമ്യലാല് അവതരിപ്പിക്കുന്ന സംഗീതസദസ്, 22ന് കോഴിക്കോട് ശ്രീരഞ്ജിനി ഓര്ക്കസ്ട്രയുടെ ഭക്തിഗാനമേള, 23ന് 7ന് മാത്തൂര് ഗോവിന്ദന്കുട്ടി, കോട്ടക്കല് ചന്ദ്രശേഖരവാര്യര്, കലാനിലയം രാജീവന്, കലാഭാരതി ഉണ്ണികൃഷ്ണന് എന്നിവര് പങ്കെടുക്കുന്ന ദുര്യോധനവധം കഥകളി, നരസിംഹജയന്തി ദിനമായ 24ന് രാവിലെ 9ന് എം.കെ.ശങ്കരന് നമ്പൂതിരിയുടെ സംഗീതസദസ്, 11.45ന് ലക്ഷ്മീനരസിംഹപൂജാദര്ശനം, 12ന് കദളിക്കുളസമര്പ്പണം, 1ന് മഹാപ്രസാദമൂട്ട്, 11.30ന് അമ്പലപ്പുഴ വിജയകുമാറിന്റെ സോപാനസംഗീതം എന്നിവയാണ് പ്രധാന പരിപാടികള്.
പത്രസമ്മേളനത്തില് പി.ആര്.ജയേഷ്, ഹരികുമാര്.എസ്, കെ.എസ്.രാധാകൃഷ്ണന് എന്നിവര് പങ്കെടുത്തു.
