കൊച്ചി: എല്‍.ഡി.എഫ്‌ കപ്പിത്താനില്ലാതെ മുങ്ങുന്ന കപ്പലാണെന്ന്‌ കെപിസിസി പ്രസിഡന്റ്‌ രമേശ്‌ ചെന്നിത്തല.
മുന്നണി യോഗത്തിന്റെ അധ്യക്ഷന്‍ ആരാണെന്ന്‌ പോലും അവര്‍ക്ക്‌ പറയാന്‍ കഴിയുന്നില്ലെന്നും എല്‍.ഡി.എഫിന്റെ ജനകീയ അടിത്തറ തകര്‍ന്നതായി മുന്നണി യോഗം തന്നെ വിലയിരുത്തിയത്‌ ശരിയായ നടപടിയാണെന്നും രമേശ്‌ ചെന്നിത്തല പറഞ്ഞു. കൊച്ചിയില്‍ കേരളയാത്രയുടെ ഭാഗമായി സംഘടിപ്പിച്ച സ്വാതന്ത്രസമര സേനാനികളെ ആദരിക്കുന്ന ചടങ്ങില്‍ സംസാരിക്കുകയായിരുന്നു അദ്ദേഹം.
എല്‍.ഡി.എഫിന്റെ പ്രക്ഷോഭങ്ങള്‍ക്ക്‌ ആളെ കിട്ടുന്നില്ലെന്ന്‌ വൈകിയാണെങ്കിലും അവര്‍ തിരിച്ചറിഞ്ഞത്‌ നല്ല കാര്യമാണ്‌. അടുത്തിടെ മുന്നണി നടത്തിയ എല്ലാ സമരങ്ങളും വന്‍ പരാജയമായിരുന്നു. യു. ഡി.എഫ്‌ സര്‍ക്കാറിന്റെ പ്രവര്‍ത്തനങ്ങളിലുള്ള ജനങ്ങളുടെ സംതൃപ്തിയാണ്‌ സമരത്തിന്‌ ആളെ കിട്ടാത്തതിന്‌ കാരണം. സമരങ്ങള്‍ക്ക്‌ വേണ്ടിയുള്ള സമരമായത്‌ കൊണ്ടാണ്‌ അതിന്‌ ജനകീയ അടിത്തറ ലഭിക്കാത്തത്‌. മതിയായ കാരണങ്ങളില്ലാതെ സര്‍ക്കാറിനെതിരെ നടത്തുന്ന സമരങ്ങള്‍ ജനങ്ങള്‍ തള്ളിക്കളയുമെന്നതിന്റെ വ്യക്തമായ തെളിവ്‌ കൂടിയാണ്‌ ഇതെന്നും അദ്ദേഹം പറഞ്ഞു. രാഷ്‌ട്രീയത്തിനപ്പുറം കേരളത്തിന്റെ നന്മക്ക്‌ വേണ്ടിയുള്ള പ്രവര്‍ത്തനങ്ങളില്‍ എല്ലാ പാര്‍ട്ടികളും യോജിച്ചു മുന്നോട്ട്‌ വരണം. ഇത്തരം കാര്യങ്ങളില്‍ നിസഹകരിച്ചാല്‍ ജനം കൂടെനില്‍ക്കില്ല. കേരള യാത്രക്ക്‌ എല്ലാ സ്ഥലത്തു നിന്നും വന്‍ വരവേല്‍പ്പാണ്‌ ലഭിക്കുന്നതെന്നും ഇത്‌ മാര്‍ക്സിസ്റ്റ്‌ പാര്‍ട്ടികള്‍ കണ്ണുതുറന്നു കാണണമെന്നും ചെന്നിത്തല പറഞ്ഞു.
