പാലാ: കേന്ദ്ര ബജറ്റില് വരുത്തിയ ഹോട്ടലുകളുടെ സര്വ്വീസ് ടാക്സ് ഭേദഗതി ഈ വ്യവസായത്തെ പ്രതികൂലമായി ബാധിച്ചിരിക്കുന്നുവെന്ന് കേരള ഹോട്ടല് ആന്റ് റസ്റ്റോറന്റ് അസോസിയേഷന് ഭാരവാഹികള് അറിയിച്ചു. അപാകത കേന്ദ്ര ധനകാര്യമന്ത്രിയെ ബോദ്ധ്യപ്പെടുത്തിയെങ്കിലും ഫലമുണ്ടാകാത്ത സാഹചര്യത്തില് 29ന് സംസ്ഥാനത്തെ ഹോട്ടലുകളും റസ്റ്റോറന്റുകളും ഒരു ദിവസം അടച്ചിട്ട് പ്രതിഷേധം അറിയിക്കുമെന്ന് ഭാരവാഹികള് പത്രസമ്മേളനത്തില് അറിയിച്ചു. അനുകൂലനടപടിയുണ്ടായില്ലെങ്കില് അനിശ്ചിതകാലത്തേക്ക് സ്ഥാപനങ്ങള് അടച്ചിട്ട് പ്രതിഷേധിക്കും.
കേന്ദ്രസര്ക്കാരിന്റെ ഭക്ഷ്യസുരക്ഷാനിയമത്തില് ചെറുകിട-ഇടത്തരം ഹോട്ടലുകളെ പ്രതികൂലമായി ബാധിക്കുന്ന നിയമങ്ങള് നടപ്പാക്കിയാല് അത്തരം സ്ഥാപനങ്ങള് നടത്തിക്കൊണ്ടുപോകുവാന് കഴിയാതെ വരുമെന്നും സംഘടനാഭാരവാഹികള് ചൂണ്ടിക്കാട്ടി. പത്രസമ്മേളനത്തില് ഭാരവാഹികളായ എം.ജി.മധുസൂദനനന് നായര്, മുഹമ്മദ് ഷെരീഫ്, ബേബി തോമസ്, സി.ടി.ദേവസ്യ, ടി.ഡി.രാജു എന്നിവര് പങ്കെടുത്തു.
