പള്ളുരുത്തി: തകര്ന്നുകിടക്കുന്ന കുമ്പളങ്ങി റോഡിലെ ഗട്ടറില് ബൈക്കില് വരികയായിരുന്ന യുവാവ് വീണ് തലക്കും കാലിനും ഗുരുതരമായി പരിക്കേറ്റു. അപകടം പിണഞ്ഞയുവാവിന്റെ പിന്നില് വരികയായിരുന്ന എംഎല്എ ഡൊമനിക്ക് പ്രസന്റേഷന് തന്റെ കാറില് കയറ്റി പെരുമ്പടപ്പിലെ സ്വകാര്യ ആശുപത്രിയില് എത്തിച്ചു. എന്നാല് പരിക്ക് ഗുരുതരമായതിനാല് എറണാകുളം ജനറല് ആശുപത്രിയിലേക്ക് മാറ്റുകയായിരുന്നു. കുമ്പളങ്ങി മുണ്ടകാട്ട് വീട്ടില് പ്രിബിന് (24) ആണ് പരിക്കേറ്റത്. ഞായറാഴ്ച രാവിലെ 11ന് കോയബസാറിനു സമീപമാണ് സംഭവം. കുമ്പളങ്ങിയില് നിന്നും പെരുമ്പടപ്പ് ഭാഗത്തേക്ക് വരികയായിരുന്ന യുവാവ് റോഡിലെ വലിയകുഴിയില് വീണ് ദൂരേക്ക് തെറിക്കുകയായിരുന്നു. തലക്ക് ഗുരുതരമായേറ്റ പരിക്കില്നിന്നും ചോരവാര്ന്നൊലിക്കുന്ന നിലയിലായിരുന്നു. എറണാകുളം ജനറല് ആശുപത്രിയിലെത്തിച്ച യുവാവിന്റെ വലതുകാലൊടിഞ്ഞിട്ടുണ്ട്. യുവാവിന് ശസ്ത്രക്രിയവേണ്ടിവന്നതായി ആശുപത്രി അധികൃതര് അറിയിച്ചു. വര്ഷങ്ങളായി തകര്ന്നുകിടക്കുന്ന റോഡിന്റെ നിര്മാണം നടക്കാത്തതിനു പിന്നില് കോണ്ഗ്രസ്സിലെ ഗ്രൂപ്പുവഴക്കാണെന്ന് നാട്ടുകാര് ആരോപിച്ചു. പഞ്ചായത്ത് പ്രസിഡന്റ് ഉഷാ പ്രദീപ് കേന്ദ്രമന്ത്രി കെ.വി.തോമസിന്റെ ഗ്രൂപ്പുകാരിയാണ്. എംഎല്എ ഡൊമനിക്ക് പ്രസന്റേഷന് തന്റെ പക്ഷക്കാരിയെ പഞ്ചായത്ത് പ്രസിഡന്റാക്കുവാന് ശ്രമിക്കുന്നതിന്റെ ഭാഗമായി റോഡ് തകര്ന്നു കിടക്കുന്നതിന്റെ ഉത്തരവാദിത്വം നിലവിലെ പഞ്ചായത്ത് പ്രസിഡന്റിന്റെ തലയില് കെട്ടിവെച്ച് ജനവികാരം തിരിച്ചുവിടാന് ശ്രമിക്കുകയാണെന്ന് മറുവിഭാഗം കുറ്റപ്പെടുത്തി.
അപകടത്തില് പരിക്കേറ്റ യുവാവിനെ എംഎല്എ ആശുപത്രിയില് എത്തിച്ചു
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.