കൊച്ചി: അറിവുളള കേരളം അഭിമാന കേരളം എന്ന ആശയപ്രചരണവുമായി നടത്തുന്ന ജന്‍ വിജ്ഞാന്‍ യാത്രയ്‌ക്ക്‌ ഇന്ന്‌ കൂത്താട്ടുകുളത്ത്‌ ജില്ലാതല സ്വീകരണം നല്‍കും. രാവിലെ 10-ന്‌ കൂത്താട്ടുകുളം ടൗണ്‍ഹാളില്‍ നടക്കുന്ന ജില്ലാതല സ്വീകരണത്തില്‍ ജില്ലാ പഞ്ചായത്ത്‌ പ്രസിഡന്റ്‌ എല്‍ദോസ്‌ കുന്നപ്പള്ളി, ജില്ലാ കളക്ടര്‍ പി.ഐ. ഷെയ്‌ക്‌ പരീത്‌ തുടങ്ങിയവര്‍ പങ്കെടുക്കുമെന്ന്‌ കൂത്താട്ടുകുളം ഗ്രാമപഞ്ചായത്ത്‌ പ്രസിഡന്റ്‌ സീന ജോണ്‍സണ്‍ അറിയിച്ചു. പി.എന്‍.പണിക്കര്‍ ഫൗണ്ടേഷന്റെ നേതൃത്വത്തിലുളള ഒമ്പതാമത്‌ ജന്‍വിജ്ഞാന്‍ യാത്ര ജില്ലയില്‍ 10 പഞ്ചായത്തുകളിലൂടെയാണ്‌ കടന്നുപോകുന്നത്‌.
ആദ്യദിനമായ ഇന്ന്‌ കൂത്താട്ടുകുളം, മാറാടി, പായിപ്ര, നെല്ലിക്കുഴി എന്നീ ഗ്രാമ പഞ്ചായത്തുകളിലാണ്‌ യാത്ര എത്തുന്നത്‌. ഇന്ന്‌ ഉച്ചയ്‌ക്ക്‌ ശേഷം രണ്ടിന്‌ മാറാടിയിലും നാലിന്‌ പായിപ്രയിലും അഞ്ചിന്‌ നെല്ലിക്കുഴിയിലും യാത്ര പര്യടനം നടത്തും. സംഘം ഇന്ന്‌ കോതമംഗലത്ത്‌ താമസിക്കും.
നാളെ രാവിലെ 10-ന്‌ വാഴക്കുളം ഗ്രാമപഞ്ചായത്തില്‍ നിന്ന് യാത്ര തുടങ്ങും. തുടര്‍ന്ന്‌ ഉച്ചയ്‌ക്ക്‌ ശേഷം രണ്ടിന്‌ ചൂര്‍ണിക്കര, നാലിന്‌ ചെങ്ങമനാട്‌ എന്നിവിടങ്ങളില്‍ യാത്രയെത്തും. രാത്രി ആലുവ പാലസില്‍ സംഘം താമസിക്കും. 14-ന്‌ രാവിലെ 10-ന്‌ നെടുമ്പാശേരിയില്‍ നിന്നാരംഭിക്കുന്ന യാത്ര ഉച്ചയ്‌ക്ക്‌ ശേഷം രണ്ടിന്‌ ഒക്കല്‍, വൈകിട്ട്‌ നാലിന്‌ കറുകുറ്റി പഞ്ചായത്ത്‌ എന്നിവിടങ്ങളില്‍ യാത്രയെത്തും.
സംസ്ഥാന പഞ്ചായത്ത്‌ വകുപ്പ്‌, വിവിധ സര്‍ക്കാര്‍ ഏജന്‍സികള്‍ എന്നിവയുടെ സഹകരണത്തോടെയാണ്‌ ജന്‍വിജ്ഞാന്‍ യാത്ര സംഘടിപ്പിക്കുന്നത്‌. അറിവിലൂടെ സമ്പന്നനാകൂ ശാസ്ത്രത്തിലൂന്നി ശക്തരാകൂ എന്നതാണ്‌ ഇത്തവണത്തെ മുദ്രാവാക്യം. കഴിഞ്ഞ 30-ന്‌ തിരുവനന്തപുരത്ത്‌ രാഷ്‌ട്രപതി പ്രണബ്കുമാര്‍ മുഖര്‍ജി ഫ്ലാഗ്‌ ഓഫ്‌ ചെയ്ത യാത്രയുടെ ഭാഗമായി ആരോഗ്യ വിദ്യാഭ്യാസ ക്യാമ്പ്‌, യുവജന സംവാദം, സ്വയം സഹായസംഘാംഗങ്ങളുടെ സംവാദം, ബോധവത്കരണ പരിപാടികള്‍, നിയമസാക്ഷരതയുടെ ഭാഗമായി പൊതു വിചാരണ, കലാപരിപാടികള്‍ എന്നിവ സംഘടിപ്പിക്കും.
