മുല്ലപ്പെരിയാര് അണക്കെട്ടിന്റെ സുരക്ഷയ്ക്ക് കേന്ദ്രസേനാ വിന്യാസം ആവശ്യമില്ലെന്ന് പ്രഖ്യാപിച്ച് തമിഴ്നാടിന്റെ ഈ ആവശ്യം തള്ളിയ സുപ്രീംകോടതി അണക്കെട്ട് തര്ക്കപ്രശ്നത്തില് മുന്കൈ എടുക്കാന് കേന്ദ്രസര്ക്കാരിന് ഭരണഘടനാപരമായി ഉത്തരവാദിത്തമുണ്ടെന്നും പ്രശ്നപരിഹാരത്തിന് പ്രധാനമന്ത്രിതന്നെയാണ്. അധികാരകേന്ദ്രമെന്നും പ്രസ്താവിച്ചിരിക്കുകയാണ്. ഇതോടെ പന്ത് കേന്ദ്രസര്ക്കാരിന്റെയും ഈ വിഷയത്തില് മൗനവ്രതം അവലംബിക്കുന്ന പ്രധാനമന്ത്രിയുടെയും കോര്ട്ടിലായി. കേന്ദ്രം കാഴ്ചക്കാരായി നോക്കില്നിക്കരുതെന്ന് നിര്ദേശിച്ച സുപ്രീംകോടതി തമിഴ്നാടിന്റെ ചര്ച്ചയ്ക്കുള്ള വൈമുഖ്യത്തിലും നിസ്സഹകരണത്തിലും അതൃപ്തിയും രേഖപ്പെടുത്തിക്കഴിഞ്ഞു. അണക്കെട്ട് കേസ് ഉന്നതാധികാരസമിതിയുടെ പരിഗണനയിലായതിനാലാണ് തമിഴ്നാട് വിട്ടുനില്ക്കുന്നത് എന്ന വാദത്തോട് വിയോജിച്ച് കോടതി പറഞ്ഞത് പ്രധാനമന്ത്രി ഈ വിഷയത്തില് മുന്കൈ എടുക്കുന്നതില് തെറ്റില്ല എന്നാണ്. പക്ഷേ ഇപ്പോള് ചര്ച്ചയ്ക്ക് മുതിരാതെ ഇതിനുള്ള അന്തരീക്ഷമൊരുക്കാന് നിര്ദേശിച്ച് പ്രധാനമന്ത്രി മോസ്കോ സമ്മേളനത്തിന് വിമാനം കയറിയിരിക്കുകയാണ്. പ്രധാനമന്ത്രി വായ് തുറക്കുന്നത് അന്താരാഷ്ട്ര സമ്മേളനങ്ങളില് മാത്രമാണ് എന്ന ധാരണ രൂഢമൂലമാണ്. ചര്ച്ചയ്ക്ക് അന്തരീക്ഷമൊരുക്കാന് യുഡിഎഫ് സമരരംഗത്തുനിന്ന് പിന്മാറിയത് സമരരംഗത്തുള്ള ജനങ്ങളെ പ്രകോപിതരാക്കുന്നുണ്ട്. പഞ്ചാബ്-ഹരിയാന നദീതര്ക്കമുണ്ടായപ്പോള് അന്ന് പ്രധാനമന്ത്രിയായിരുന്ന ഇന്ദിരാഗാന്ധിതന്നെ മുന്കൈയെടുത്ത് രണ്ട് സംസ്ഥാനങ്ങളിലെയും മുഖ്യമന്ത്രിമാരെ വിളിച്ച് ചര്ച്ച ചെയ്ത് കരാര് ഒപ്പിടീച്ചത് കേരളത്തിന്റെ അഭിഭാഷകര് ചൂണ്ടിക്കാണിക്കുകയുണ്ടായി.
ഇന്ദിരാഗാന്ധിയുടെ ഇഛാശക്തിയോ ആജ്ഞാശക്തിയോ മന്മോഹന്സിംഗിനില്ലല്ലോ. തമിഴ്നാട് ചര്ച്ചയില് പങ്കെടുക്കാന് വിസമ്മതിക്കുമ്പോള് രണ്ട് സംസ്ഥാന മന്ത്രിമാരുടെയും യോഗം വിളിക്കാന് പ്രധാനമന്ത്രിയോട് നിര്ദേശിക്കാന് സാധ്യമല്ലെന്നാണ് കോടതി നിലപാട്. കേരളം ജലനിരപ്പ് 120 അടിയായി താഴ്ത്തണമെന്ന് പറയുന്നത് അത്രയും ജലം തങ്ങാന് മാത്രമേ ഈ പുരാതന അണക്കെട്ടിന് സാധ്യമാകൂ എന്നതിനാലാണ്. 120 അടിയില് ജലനിരപ്പ് നിലനിന്നാലും തമിഴ്നാടിന് 1609 ഘന അടി വെള്ളം കൊണ്ടുപോകാന് കഴിയും. കാരണം തമിഴ്നാട്ടിലേക്ക് വെള്ളം കൊണ്ടുപോകുന്ന തുരങ്കം 116 അടി ജലനിരപ്പിലാണ്. 5.80 ടിഎംസി വെള്ളം തമിഴ്നാടിന് കൊണ്ടുപോകാം. 2010ല് തമിഴ്നാട് ഉപയോഗിച്ചത് 4.930 ടിഎംസി വെള്ളം മാത്രമാണ്. അപ്പോള് തമിഴ്നാട് ജലനിരപ്പ് 142 അടിയും 152 അടിയും മറ്റും ആക്കി ഉയര്ത്തണം എന്ന് ആവശ്യപ്പെടുന്നത് രാഷ്ട്രീയ മുതലെടുപ്പിന് മാത്രമാണെന്ന് വ്യക്തമാണ്. അനധികൃത സ്വത്ത് സമ്പാദനത്തില് പ്രതിസ്ഥാനത്ത് നില്ക്കുന്ന ജയലളിത പറയുന്നത് മുല്ലപ്പെരിയാര് അണക്കെട്ടിനടുത്ത് തമിഴ്നാടിന്റെ പാട്ടഭൂമി കേരളമാഫിയ കയ്യേറി റിസോര്ട്ടും കെട്ടിടങ്ങളും നിര്മിച്ചിട്ടുണ്ടെന്നും കേരളത്തിലെ രാഷ്ട്രീയ-ബ്യൂറോക്രാറ്റുകള് തമിഴ്നാടിന്റെ കൈക്കൂലിയായി തമിഴ്നാട്ടില് എസ്റ്റേറ്റുകള് വാങ്ങിയിട്ടുണ്ടെന്നുമാണ്. ഡിഎംകെ, എഡിഎംകെ പാര്ട്ടികള് രാഷ്ട്രീയരംഗം പിടിച്ചടക്കാതിരിക്കാന് ലോക്സഭയിലെ 39 തമിഴ്നാട് എംപിമാര് ഇടുക്കി തമിഴ്നാടിനോട് ചേര്ക്കണമെന്നും ആവശ്യപ്പെട്ടിരിക്കുന്നു. തമിഴ്നാട് രാഷ്ട്രീയം കളിക്കുമ്പോള് കേരളത്തിലെ 40 ലക്ഷം ജനങ്ങള് മരണഭീതിയില് കഴിയുന്നു.
ഇടുക്കി പ്രദേശത്തെ കുട്ടികളില് ഫിയര് ഐസക്കോസിസ് പടര്ന്ന ഭയപ്പാടില് സ്കൂളുകളില് പോകാതെ, ഉറങ്ങാതെ കുട്ടികള് പരിഭ്രാന്തിയില് കഴിയുന്നു. എന്നിട്ടും മൗനിയും നിഷ്ക്രിയനുമായ പ്രധാനമന്ത്രിയെ വിശ്വസിച്ച് നേതാക്കള് സമരരംഗത്തുനിന്ന് പിന്മാറിക്കഴിഞ്ഞു. ഉന്നതാധികാരസമിതിയില് ഡി.കെ.തട്ടെയ്ക്കും മേത്തയ്ക്കും പുറമേ മറ്റ് മൂന്നുപേര്കൂടി ഡാം സന്ദര്ശിക്കും എന്നത് മാത്രമാണ് കേരളത്തിന് ആശ്വാസകരമാകുന്നത്. ജസ്റ്റിസ് കെ.ടി.തോമസ് സമിതി അംഗമാണ്. തമിഴ്നാടിന് ജലലഭ്യത ഉറപ്പാക്കാന് ത്രികക്ഷി കരാര് ഒപ്പിടാന് കേരളം സന്നദ്ധത പ്രകടിപ്പിച്ചിട്ടും തമിഴ്നാട് നിലപാട് മാറ്റാന് തയ്യാറല്ല. പക്ഷേ തമിഴ്നാട്ടില് മലയാളിവിരുദ്ധ അക്രമങ്ങള് തുടരുകയും മലയാളികള്ക്ക് കോടികളുടെ നാശനഷ്ടം സഹിക്കേണ്ടിവരികയും ചെയ്യുന്നു.
ഡിസംബര് കേരളത്തിലെ വിനോദസഞ്ചാരത്തിന്റെ മാസം ആണ്. ഇപ്പോള് വിനോദസഞ്ചാരികളുടെ എണ്ണത്തില് 40 ശതമാനം കുറവ് രേഖപ്പെടുത്തുമ്പോള് സര്ക്കാരും ഈ രംഗത്ത് മുതല്മുടക്കിയവരും നഷ്ടം സഹിക്കേണ്ടിവരുന്നു. മൂന്നാര്, കുമളി, മധുര വഴിയും മധുര-തേക്കടി വഴിയും വിനോദസഞ്ചാരികള് ഉപേക്ഷിച്ചുകഴിഞ്ഞു. തമിഴ്നാട്ടിലെ പച്ചക്കറി, കോഴി, മുട്ട കൃഷിക്കാര് തങ്ങളുടെ ഉല്പ്പന്നം നശിച്ചാലും കേരളത്തിന് നല്കുകയില്ല എന്ന നിലപാടിലാണ്. എന്തിന് മലയാള പുതുസിനിമകള് പോലും തമിഴ്നാട്ടില് റിലീസ് ചെയ്യാന് അനുവദിക്കുന്നില്ല. പക്ഷേ തമിഴ്സിനിമകള് കേരള തിയേറ്ററുകളില് കോടികള് കൊയ്യാന് മലയാളി പ്രേക്ഷകര് ക്യൂ നില്ക്കുന്നു! ഈ പ്രതിസന്ധി നിസ്സംഗ കേരളം അര്ഹിക്കുന്നതല്ലേ?
