കവിയൂര് കേസ് പുനരന്വേഷണത്തില് ആത്മഹത്യ ചെയ്ത അനഘയെ പീഡിപ്പിച്ചത് സ്വന്തം അച്ഛന് തന്നെയാണെന്ന് സിബിഐ കോടതിയില് മൊഴി നല്കിയിരിക്കുകയാണ്. 2004 സപ്തംബര് 28നാണ് കവിയൂര് ചുമത്ര ക്ഷേത്രത്തിലെ പൂജാരിയായ നാരായണന് നമ്പൂതിരിയും ഭാര്യ ശ്രീദേവിയും അനഘ, അളക, അക്ഷയ് എന്ന മൂന്നുമക്കളും ആത്മഹത്യ ചെയ്തത്. അന്വേഷണത്തില് അനഘ ലൈംഗിക പീഡനത്തിനിരയായെന്ന് തെളിഞ്ഞത് ശരീരത്തില് പുരുഷബീജം കണ്ടതിനാലാണ്. സിബിഐ ഇപ്പോള് പറയുന്നത് അനഘ പീഡിപ്പിക്കപ്പെട്ടത് മരണത്തിന് 24 മുതല് 72 മണിക്കൂര് മുമ്പായിരുന്നുവെന്നും ആ ഇടവേളയില് വീടിന് പുറത്തുപോകാത്ത അനഘയെ പീഡിപ്പിച്ചത് സ്വന്തം അച്ഛനാണെന്നുമാണ്. അച്ഛന് അസ്വാഭാവികമായി പെരുമാറുന്നതായി അനഘ സുഹൃത്ത് രമ്യയോട് പറഞ്ഞത് ഇതിന് ഉപോല്ബലകമായി ചൂണ്ടിക്കാണിക്കപ്പെടുന്നു. അനഘയുടെയും നമ്പൂതിരിയുടെയും ആത്മഹത്യാക്കുറിപ്പുകളും ഇപ്പോള് ഹാജരാക്കിയിരിക്കുന്നു. നേരത്തെ പോലീസ് അന്വേഷണത്തില് ലതാനായര് നമ്പൂതിരിയുടെ വീട്ടില് ഒളിച്ച് താമസിച്ചിരുന്നതായും അനഘയെ പല സ്ഥലങ്ങളില് കൂട്ടിക്കൊണ്ടുപോയിരുന്നതായും കണ്ടെത്തിയിരുന്നു.
കിളിരൂര് കേസില് ലതാ നായരുടെ പങ്ക് പുറത്തുവന്നപ്പോള് തങ്ങളുടെ കുടുംബവും ഇതിലേക്ക് വലിച്ചിഴയ്ക്കപ്പെടാം എന്ന അപമാനഭീതിയിലാണ് നമ്പൂതിരി കുടുംബം ആത്മഹത്യ ചെയ്തതെന്നായിരുന്നു പോലീസ് നിഗമനം. ലതാ നായരാണ് ആത്മഹത്യയ്ക്ക് ഉത്തരവാദിയെന്നും സിബിഐ ഇങ്ങനെ ഒരു നിഗമനത്തില് എത്തിച്ചേര്ന്നത് കുറ്റവാളിയായ ലതാ നായയെ സംരക്ഷിക്കാനാണെന്ന സംശയം ഉയരുന്നുണ്ട്. തീര്ത്തും വിശ്വാസ്യത നശിച്ച സിബിഐ ലതാ നായരുടെ പെണ്വാണിഭ മാഫിയയുടെ സമ്മര്ദ്ദത്തിന് വഴങ്ങി എന്നാണ് അനുമാനം. കവിയൂര് കേസില് രാഷ്ട്രീയ ഉന്നതര് ഇല്ല എന്നും സിബിഐ കൂട്ടിച്ചേര്ക്കുന്നു. ക്രൈം നന്ദകുമാര് കവിയൂര് കേസില് രാഷ്ട്രീയ നേതാക്കളുടെ പുത്രന്മാര് ഉള്പ്പെട്ടിട്ടുണ്ടെന്ന് ആരോപിച്ച് നല്കിയ ഹര്ജിയിലാണ് പുനരന്വേഷണം ഉണ്ടായത്.
പിതാക്കന്മാര് പെണ്മക്കളെ ലൈംഗികമായി പീഡിപ്പിക്കുന്ന വാര്ത്ത സാധാരണമാകുമ്പോഴും സിബിഐയുടെ ഈ വെളിപ്പെടുത്തലിന് വിശ്വാസ്യത കൈവരുന്നില്ല.
