കൊച്ചി: പാവക്കുളം ശ്രീമഹാദേവക്ഷേത്രത്തില് രാമായണമാസാചരണം വിപുലമായരീതിയില് കൊണ്ടാടുന്നു. നാളെ രാവിലെ 5 മണിക്ക് ഗുരുവായൂര് മുന് മേല്ശാന്തിയും, ക്ഷേത്രം മേല്ശാന്തിയുമായ ഏഴിക്കോട് കൃഷ്ണദാസ് നമ്പൂതിരിയുടെ കാര്മികത്വത്തില് മഹാഗണപതിഹോമം നടക്കും. തുടര്ന്ന് രാവിലെ 6 മുതല് അഖണ്ഡരാമായണ പാരായണം നടക്കും. കര്ക്കിടകം 2 മുതല് എല്ലാദിവസവും രാവിലെ 6 മുതല് ഭക്തജനങ്ങള്ക്ക് രാമായണ പാരായണം നടത്തുവാന് സൗകര്യമൊരുക്കിയിട്ടുണ്ട്.
ക്ഷേത്രത്തില് എല്ലാദിവസവും നടക്കുന്ന അന്നദാനത്തിനുപുറമെ, കര്ക്കിടകത്തിലെ വെള്ളിയാഴ്ചകളില് ഉച്ചയ്ക്ക് ഔഷധകഞ്ഞിവിതരണം ഉണ്ടായിരിക്കും. കര്ക്കിടകം ഒന്നാം തീയതി വിശേഷാല് പ്രസാദഊട്ട് ഉണ്ടായിരിക്കും. കര്ക്കിടക മാസത്തില് എല്ലാദിവസവും ദീപാരാധനയ്ക്കുശേഷം ഭഗവതി സേവ ഉണ്ടായിരിക്കും. കര്ക്കിടകവാവ് പ്രമാണിക്ക് 30ന് രാവിലെ 6 മണി മുതല് എടത്തല വിജയന്തന്ത്രിയുടെ നേതൃത്വത്തില് ബലിതര്പ്പണത്തിന് വിപുലമായ സൗകര്യങ്ങള് ഒരുക്കിയിട്ടുണ്ടെന്നും ക്ഷേത്രസമിതി സെക്രട്ടറി കെ.പി.മാധവന് കുട്ടി അറിയിച്ചു.
പെരുമ്പാവൂര്: രാമനാമജപം കൊണ്ട് ഭക്തരെ ഉന്നതിയിലേക്ക് നയിക്കാന് പെരുമ്പാവൂരിലും പരിസരപ്രദേശങ്ങളിലെയും ക്ഷേത്രങ്ങളിലും സന്നധ സംഘടനകളിലും ആശ്രമങ്ങളിലും ഒരുക്കങ്ങള് പൂര്ത്തിയായി. കര്ക്കടകം ഒന്നുമുതല് 32 ദിവസം നീളുന്ന രാമായണ മാസാചാരണം പലയിടങ്ങളിലും ഉത്സവസമാനമാണ്.
പെരുമ്പാവൂര് ആല്പ്പാറ ക്ഷേത്രത്തില് 17ന് ആരംഭിച്ച് ആഗസ്റ്റ് 16ന് അഖണ്ഡരാമായണ പാരായണത്തോടെ സമാപിക്കും. ദിവസേന ഗണപതിഹോമവും വിശേഷാല് പൂജകളും ഉണ്ടായിരിക്കും. ശ്രീധര്മ ശാസ്താ ക്ഷേത്രത്തില് ദിവസേന രാമായണ പാരായണം നടക്കും. രായമംഗലം കൂട്ടുമഠം സുബ്രഹ്മണ്യ സ്വാമിക്ഷേത്രത്തില് രാമായണ മാസാചരണത്തോടനുബന്ധിച്ച് വിശേഷാല് ഗണപതിഹോമവും പൂജകളും നടക്കും. ദിവസേന വെളുപ്പിന് നിര്മാല്യ ദര്ശനത്തിന് ശേഷവും വൈകീട്ട് ദീപാരാധനക്ക് ശേഷവും രാമായണ പാരായണം നടക്കും. പെരയ്ക്കാട് ശിവക്ഷേത്രം, കാരൂര് വിഷ്ണുക്ഷേത്രം, മൂവര് കുളങ്ങരകാവ് എന്നിവിടങ്ങളില് ദിവസേന പ്രത്യേക പൂജകള് നടക്കും.
വട്ടക്കാട്ടുപടി വിളാവത്ത് ഭഗവതിക്ഷേത്രത്തില് 17 മുതല് ആരംഭിക്കുന്ന രാമായണപാരായണത്തിന് ചന്ദ്രബാബു നേതൃത്വം നല്കും. രായമംഗലം കൂട്ടുമഠം നായര് കരയോഗത്തിന്റെ ആഭിമുഖ്യത്തില് ഓരോദിവസവും ഒരോ ഭവനങ്ങളിലായി രാമായണ മാസാചരണം നടക്കുമെന്ന് സെക്രട്ടറി അറിയിച്ചു. കൂട്ടുമഠം ശ്രീമുരുക ഭഗവത് സേവാസമിതിയുടെയും കേരള വിശ്വകര്മ സഭ രാമയമംഗലം യൂണിറ്റിന്റെയും സംയുക്താഭിമുഖ്യത്തില് എല്ലാ ഞായറാഴ്ചകളിലും പാഞ്ചജന്യം ഹാളില് രാമായണ പാരായണവും സദ്സംഘവും നടത്തും. ഒക്കല് അമൃതാനന്ദമയീമഠത്തിന്റെ ആഭിമുഖ്യത്തില് നടക്കുന്ന രാമായണ മാസാചരണ പരിപാടി സി.പി.ശ്രീകുമാര് നീലിശ്വരം ഉദ്ഘാടനം ചെയ്യും. ദിവസേന രാമായണ പാരായണം, ലളിതാസഹസ്രനാമം, അര്ച്ചന, സദ്സംഗം, ഭജന, ആരതി എന്നിവ നടക്കും.
ആലുവ: രാമായണ മാസാചരണത്തിന്റെ ഭാഗമായി ആലുവ അയ്യപ്പസേവാസംഘം ഭജനമഠത്തില് നാളെ രാമായണ പാരായണം ആരംഭിക്കും. ദിവസവും അഷ്ടദ്രവ്യമഹാഗണപതിഹോമവും ഭഗവതിസേവയും നടക്കും. ഇന്ദിരാടീച്ചര്, നാണുക്കുട്ടിയമ്മ, രാധാമണിയമ്മ എന്നിവര് രാമായണ പരായണം നടത്തും. 29ന് സമ്പൂര്ണ രാമായണപാരായണം നടക്കും.
ആലുവ: രാമായണമാസാചരണത്തിന്റെ ഭാഗമായി വിശ്വഹിന്ദുപരിഷത്ത് തോട്ടക്കാട്ടുകര മാതൃസമിതിയുടെ ആഭിമുഖ്യത്തില് നാളെ മുതല് ഗൃഹങ്ങള്തോറും രാമായണ പാരായണം നടത്തും.
മൂവാറ്റുപുഴ: മൂവാറ്റുപുഴയിലെ വിവിധ ക്ഷേത്രങ്ങളില് രാമായണ മാസാചരണത്തിന് ഒരുക്കങ്ങളായി. വെള്ളൂര്ക്കുന്നം മഹാദേവക്ഷേത്രം, പുഴക്കരകാവ് ദേവീക്ഷേത്രം, മഹാഗണപതി ക്ഷേത്രം, ശ്രീകുമാരഭജന ക്ഷേത്രം, നെട്ടൂര്കോട്ട് ഭഗവതി ക്ഷേത്രം, കിഴക്കേക്കര ശ്രീധര്മ്മ ശാസ്താ ക്ഷേത്രം, മുടവൂര് ചാക്കുന്നത്ത് മഹാദേവ ക്ഷേത്രം, പായിപ്ര മാനാറി ഭഗവതി ക്ഷേത്രം, കടാതി പോര്ക്കാളി ഭദ്രകാളി ക്ഷേത്രം, റാക്കാട് കാരണാട്ട് കാവ് ഭഗവതി ക്ഷേത്രം എന്നിവടങ്ങളില് രാമായണപാരായണത്തിന് ഒരുക്കങ്ങളായത്. രാവിലെ 6മുതല് 8വരെയും വൈകിട്ട് 5മുതല് 7വരെയും പാരായണം നടക്കും. കൂടാതെ വിശേഷാല് പൂജകള്, മതപ്രഭാഷണം, ആദ്ധ്യാത്മിക പ്രഭാഷണ ക്ലാസുകള് തുടങ്ങിയവയുണ്ടാകും.
താലൂക്ക് ക്ഷേത്ര ഏകോപന സമിതിയുടെ നേതൃത്വത്തില് താലൂക്കിലെ മുഴുവന് ക്ഷേത്രങ്ങളിലും രാമായണ മാസാചരണം നടത്തും. എറണാകുളം കെഎസ്ആര്ടിസി ബസ് സ്റ്റാന്റിനു സമീപമുള്ള ശ്രീകുമാരേശ്വര സുബ്രഹ്മണ്യ ക്ഷേത്രത്തില് നാളെ മുതല് മുപ്പത്തി ഒന്നു വരെ രാമായണമാസം ആചരിക്കുന്നു. ദിവസവും രാവിലെ ഗണപതിഹവനം, രാമായണ പാരായണം, വൈകുന്നേരം ഭഗവത്സേവ എന്നിവ ഉണ്ടായിരിക്കും.
