രാധിക ആപ്തെയുടെ ഒരു പരാമർശവും അതിനോടുള്ള കീർത്തി സുരേഷിന്റെ ചിരിയും കഴിഞ്ഞ ദിവസങ്ങളിൽ സമൂഹമാധ്യമങ്ങളിൽ ചർച്ചയായിരുന്നു. ദക്ഷിണേന്ത്യയിലെ ചില പ്രദേശങ്ങളിൽ നിലനിൽക്കുന്ന അമ്മാവൻ–മരുമകൾ വിവാഹ ആചാരത്തെക്കുറിച്ചുള്ള രാധികയുടെ പരാമർശമാണ് വിവാദത്തിന് തിരികൊളുത്തിയത്. അഭിമുഖത്തിനിടെ താൻ ചിരിച്ചതിന്റെ കാരണവും ആ വിഷയത്തിൽ രാധികയോട് വിശദീകരിക്കാൻ ശ്രമിച്ചതിനെക്കുറിച്ചും ഇപ്പോൾ സംസാരിച്ചിരിക്കുകയാണ് കീർത്തി സുരേഷ്. സ്വന്തം സംസ്കാരത്തെ ഒരിക്കലും താഴ്ത്തിക്കെട്ടില്ലെന്നും താരം വ്യക്തമാക്കി.
നെറ്റ്ഫ്ലിക്സ് പരമ്പരയായ ‘അക്ക’യുടെ പ്രമോഷനിടെ സഹതാരം രാധിക ആപ്തെ നടത്തിയ പരാമർശമാണ് വിവാദത്തിന് വഴിയൊരുക്കിയത്. അമ്മാവനെ വിവാഹം കഴിക്കുന്ന കഥാപാത്രത്തെ അവതരിപ്പിക്കാൻ ഒരു സിനിമയിൽ തന്നോട് ആവശ്യപ്പെട്ടിരുന്നുവെന്നായിരുന്നു രാധികയുടെ വെളിപ്പെടുത്തൽ. അഭിമുഖത്തിൽ അരികിലിരുന്ന കീർത്തി ആദ്യം ചിരിക്കുകയും പിന്നീട്, “അമ്മാവനെ വിവാഹം കഴിക്കുന്നത് തമിഴ്, തെലുങ്ക് മേഖലകളിലെ ഒരു ആചാരമാണ്” എന്ന് പറയുകയും ചെയ്തു. ഇതോടെ കീർത്തിയുടെ പ്രതികരണത്തിനെതിരെയും സമൂഹമാധ്യമങ്ങളിൽ വിമർശനമുയർന്നു.
താൻ എന്തിനാണ് അത്തരത്തിൽ പ്രതികരിച്ചതെന്ന് ഇപ്പോൾ വിശദീകരിച്ചിരിക്കുകയാണ് കീർത്തി. രാധിക ‘മാമനെ പ്രണയിക്കേണ്ടിവന്നു’ എന്ന് പറഞ്ഞപ്പോൾ ആദ്യം തനിക്ക് കാര്യം മനസിലായില്ലെന്നാണ് നടി പറയുന്നത്. പിന്നീട് അവർ സംസാരിക്കുന്നത് ദക്ഷിണേന്ത്യയിലെ ചില പ്രദേശങ്ങളിൽ നിലനിൽക്കുന്ന ആചാരത്തെക്കുറിച്ചാണെന്ന് തിരിച്ചറിഞ്ഞു. ആ സംസ്കാരത്തെക്കുറിച്ച് അറിയാത്തതുകൊണ്ടാണ് രാധിക അങ്ങനെ പറഞ്ഞതെന്ന് മനസിലായപ്പോൾ വിശദീകരിക്കാൻ ശ്രമിക്കുകയായിരുന്നുവെന്നും കീർത്തി പറഞ്ഞു.
സത്യത്തിൽ ആദ്യം അവർ എന്താണ് പറയുന്നതെന്ന് എനിക്ക് മനസിലായില്ല. ‘എനിക്ക് എന്റെ അമ്മാവനുമായി പ്രണയിക്കേണ്ടിവന്നു’ എന്നായിരുന്നു അവർ പറഞ്ഞത്. പിന്നീട് അവർ സംസാരിക്കുന്നത് സംസ്കാരത്തെക്കുറിച്ചാണെന്ന് മനസിലായി. ആ ആചാരത്തെക്കുറിച്ച് അവർക്ക് അറിയില്ലെന്ന് തിരിച്ചറിഞ്ഞപ്പോൾ ദക്ഷിണേന്ത്യയിൽ അങ്ങനെയൊരു സംസ്കാരമുണ്ടെന്ന് വിശദീകരിക്കാൻ ശ്രമിച്ചു,” എന്നാണ് കീർത്തിയുടെ വാക്കുകൾ.
കേരളത്തിൽ ഈ ആചാരം പിന്തുടരുന്നില്ലെന്നും കീർത്തി വ്യക്തമാക്കി. “അതെ, ഞാൻ അങ്ങനെയാണ് പറഞ്ഞത്. സംസ്കാരത്തെക്കുറിച്ചാണ് ഞാൻ പരാമർശിച്ചത്. കേരളത്തിൽ ആ ആചാരമില്ല. സ്വന്തം സംസ്കാരത്തെ ഒരിക്കലും താഴ്ത്തിക്കെട്ടാൻ ഞാൻ ആഗ്രഹിക്കുന്നില്ല,” എന്നും താരം പറഞ്ഞു.
ഇത് ശരിയാണെന്ന് മറ്റുള്ളവരെ ബോധ്യപ്പെടുത്താനോ അത്തരത്തിൽ സംസാരിക്കരുതെന്ന് നിർബന്ധിക്കാനോ തനിക്ക് കഴിയില്ലെന്നും കീർത്തി കൂട്ടിച്ചേർത്തു. തമിഴ്നാട്ടിലും ആന്ധ്രയിലും ചിലയിടങ്ങളിൽ നിലനിൽക്കുന്ന ആചാരത്തെക്കുറിച്ച് ഒരു വിവരം എന്ന നിലയിലാണ് രാധികയോട് പറഞ്ഞതെന്നും താരം വിശദീകരിച്ചു.
അതേസമയം, താൻ ഏത് സിനിമാ മേഖലയിലാണ് ഉൾപ്പെടുന്നതെന്ന ചോദ്യത്തിന് ദക്ഷിണേന്ത്യൻ നടിയാണെന്നായിരുന്നു കീർത്തിയുടെ മറുപടി. മലയാളം, തമിഴ്, തെലുങ്ക്, ഹിന്ദി സിനിമകളിൽ പ്രവർത്തിച്ചിട്ടുണ്ടെങ്കിലും ദക്ഷിണേന്ത്യൻ നടിയെന്ന സ്വത്വത്തിലാണ് അഭിമാനിക്കുന്നതെന്നും താരം വ്യക്തമാക്കി.


















