കൊച്ചി: കേരള രാഷ്ട്രീയത്തിൽ ഏറെ കോളിളക്കം സൃഷ്ടിച്ച അരിയിൽ ഷുക്കൂർ വധക്കേസിൽ ഏഴ് പ്രതികൾക്ക് ജീവപര്യന്തം തടവുശിക്ഷ. ഒന്നാം പ്രതി കെ.വി. സുമേഷ്, മൂന്നാം പ്രതി അനൂപ്, ഏഴാം പ്രതി പവിത്രൻ, ഒൻപതാം പ്രതി മനോഹരൻ, പത്താം പ്രതി എം.വി. ദിനേശൻ, പന്ത്രണ്ടാം പ്രതി ബിജുമോൻ, പതിനഞ്ചാം പ്രതി ഷിജിൻ മോഹൻ എന്നിവർക്കാണ് ജീവപര്യന്തം ശിക്ഷ വിധിച്ചത്. കൊച്ചിയിലെ പ്രത്യേക സിബിഐ കോടതിയാണ് നിർണ്ണായക വിധി പ്രസ്താവിച്ചത്.
കേസിൽ കുറ്റക്കാരെന്ന് കണ്ടെത്തിയ മറ്റ് ആറ് പ്രതികൾക്ക് രണ്ടുവർഷം വീതം തടവുശിക്ഷയും വിധിച്ചിട്ടുണ്ട്. അതേസമയം, കേസിൽ ഗൂഢാലോചനക്കുറ്റം ചുമത്തപ്പെട്ടിരുന്ന 32-ാം പ്രതി സിപിഎം സംസ്ഥാന സെക്രട്ടേറിയറ്റ് അംഗം പി. ജയരാജൻ, 33-ാം പ്രതി സംസ്ഥാന കമ്മിറ്റി അംഗം ടി.വി. രാജേഷ്, 19-ാം പ്രതി സിപിഎം സംസ്ഥാന സെക്രട്ടറി എം.വി. ഗോവിന്ദന്റെ മകൻ ശ്യാംജിത്ത് എന്നിവരെ തെളിവുകളുടെ അഭാവത്തിൽ കോടതി വെറുതെവിട്ടു. വിധിയിൽ തൃപ്തരല്ലെന്നും, ഗൂഢാലോചനക്കാർക്ക് ശിക്ഷ ഉറപ്പാക്കാൻ നിയമപോരാട്ടം തുടരുമെന്നും ഷുക്കൂറിന്റെ കുടുംബം വ്യക്തമാക്കി.
2012 ഫെബ്രുവരി 20-നാണ് കണ്ണൂർ കണ്ണപുരം കീഴറയിലെ വള്ളുവൻ കടവിൽ എംഎസ്എഫ് നേതാവായിരുന്ന അരിയിൽ അബ്ദുൽ ഷുക്കൂറിനെ സിപിഎം സംഘം ക്രൂരമായി കൊലപ്പെടുത്തിയത്. അന്ന് സിപിഎം കണ്ണൂർ ജില്ലാ സെക്രട്ടറിയായിരുന്ന പി. ജയരാജൻ സഞ്ചരിച്ച വാഹനവ്യൂഹത്തിന് നേരെ കല്ലെറിഞ്ഞതിലുള്ള രാഷ്ട്രീയ പകപോക്കലായാണ് കൊലപാതകം ആസൂത്രണം ചെയ്തതെന്നായിരുന്നു സിബിഐയുടെ കണ്ടെത്തൽ.
തളിപ്പറമ്പ് സഹകരണ ആശുപത്രിയിലെ 315-ാം നമ്പർ മുറിയിൽ വെച്ച് പി. ജയരാജനും ടി.വി. രാജേഷും ഉൾപ്പെടെയുള്ളവർ കൊലപാതകത്തിന് ഗൂഢാലോചന നടത്തിയെന്നായിരുന്നു സിബിഐ കുറ്റപത്രത്തിലെ പ്രധാന ആരോപണം. ഇതിന്റെ അടിസ്ഥാനത്തിലാണ് ഇരുവർക്കുമെതിരെ ഗൂഢാലോചനക്കുറ്റം ചുമത്തിയിരുന്നത്.
ആകെ 33 പ്രതികളുണ്ടായിരുന്ന കേസിൽ വിചാരണയ്ക്കിടെ രണ്ടുപേർ മരിച്ചതോടെ 31 പേരാണ് വിചാരണ നേരിട്ടത്. 17 മാസം നീണ്ട വിചാരണയിൽ 41 സാക്ഷികളെ കോടതി വിസ്തരിച്ചു. സിബിഐ കുറ്റപത്രത്തിൽ ആകെ 81 സാക്ഷികളാണുണ്ടായിരുന്നത്. അന്വേഷണ ഘട്ടത്തിൽ പ്രതികൾക്കെതിരെ നിർണ്ണായക മൊഴി നൽകിയ പ്രധാന സാക്ഷികളിൽ ചിലർ വിദേശത്തായതിനാലും മറ്റും വിചാരണ വേളയിൽ കോടതിയിൽ ഹാജരായിരുന്നില്ല. പ്രധാന സാക്ഷികളുടെ ഈ അസാന്നിധ്യമാണ് ഗൂഢാലോചനാ കുറ്റം തെളിയിക്കുന്നതിൽ പ്രോസിക്യൂഷന് തിരിച്ചടിയായത്.


















