ധാക്ക: അവാമി ലീഗ് ആഹ്വാനം ചെയ്ത രാജ്യവ്യാപക ലോക്ക്ഡൗണിന് മുന്നോടിയായി ബംഗ്ലാദേശിൽ വീണ്ടും വ്യാപക അക്രമവും സംഘർഷവും. വിവിധയിടങ്ങളിലുണ്ടായ അക്രമസംഭവങ്ങളിൽ നാല് പേർ കൊല്ലപ്പെട്ടു. ചിറ്റഗോംഗിൽ മുൻ ഇടക്കാല സർക്കാർ മുഖ്യ ഉപദേഷ്ടാവ് മുഹമ്മദ് യൂനസിന്റെ തറവാട് വീടിന് അക്രമികൾ തീയിട്ടു. തലസ്ഥാനമായ ധാക്കയിലുൾപ്പെടെ നിരവധി സ്ഥലങ്ങളിൽ നാടൻ ബോംബ് സ്ഫോടനങ്ങളും തീവെപ്പും അരങ്ങേറി.
അക്രമങ്ങളുടെ പശ്ചാത്തലത്തിൽ ധാക്കയിൽ 24 മണിക്കൂർ നീണ്ട പരിശോധനയിൽ 565 പേരെ പോലീസ് അറസ്റ്റ് ചെയ്തു. മുൻ വിദ്യാഭ്യാസ മന്ത്രി നൂറുൽ ഇസ്ലാം നാഹിദിനെ വസതിയിൽനിന്ന് പോലീസ് കസ്റ്റഡിയിലെടുത്തിട്ടുണ്ട്. അക്രമങ്ങൾക്ക് പിന്നിലുള്ളവർക്കെതിരെ കർശന നടപടിയുണ്ടാകുമെന്ന് ആഭ്യന്തര മന്ത്രി സലാഹുദ്ദീൻ അഹമ്മദ് വ്യക്തമാക്കി. കനത്ത സുരക്ഷ ഏർപ്പെടുത്തിയിരുന്നെങ്കിലും പുലർച്ചെയോടെ ധാക്കയുടെ വിവിധ ഭാഗങ്ങളിൽ സ്ഫോടനങ്ങളും തീവെപ്പും നടന്നു. സ്ഫോടനങ്ങളിൽ നാലുപേർക്ക് പരിക്കേറ്റതായും റിപ്പോർട്ടുകളുണ്ട്.
ചിറ്റഗോംഗിലെ പഞ്ചലൈഷ് മേഖലയിലുള്ള മുഹമ്മദ് യൂനസിന്റെ തറവാട് വീടിന്റെ താഴത്തെ നിലയിലാണ് അജ്ഞാതർ തീയിട്ടത്. രണ്ടും മൂന്നും നിലകളിൽ യൂനസിന്റെ സഹോദരങ്ങളുടെ കുടുംബങ്ങൾ താമസിക്കുന്നുണ്ടെങ്കിലും ആർക്കും പരിക്കേറ്റതായി വിവരമില്ല. ഇതിന് മുമ്പ് സിൽഹെറ്റ്, രാജ്ഷാഹി, ബാരിഷാൽ, ഫരീദ്പൂർ എന്നിവിടങ്ങളിലെ ഗ്രാമീൺ ബാങ്ക് ശാഖകൾക്കു നേരെയും തീവെപ്പ് ആക്രമണങ്ങളുണ്ടായിരുന്നു.
ബംഗ്ലാദേശിലെ 64 ജില്ലകളിൽ 28 എണ്ണത്തിലും കഴിഞ്ഞ രണ്ട് ദിവസത്തിനിടെ നാടൻ ബോംബുകൾ പൊട്ടിത്തെറിക്കുകയും വാഹനങ്ങൾ കത്തിക്കുകയും ചെയ്തു. പടിഞ്ഞാറൻ നരൈൽ ജില്ലയിൽ അവാമി ലീഗ് റാലിക്കിടെ ഉണ്ടായ സംഘർഷത്തിൽ ഭരണകക്ഷിയായ ബംഗ്ലാദേശ് നാഷണലിസ്റ്റ് പാർട്ടിയുടെ (ബിഎൻപി) രണ്ട് പ്രാദേശിക നേതാക്കൾ കൊല്ലപ്പെട്ടതായി പോലീസ് സ്ഥിരീകരിച്ചു.
2024-ലെ ജൂലൈ പ്രക്ഷോഭം അടിച്ചമർത്തിയതുമായി ബന്ധപ്പെട്ട് മുൻ പ്രധാനമന്ത്രി ഷെയ്ഖ് ഹസീനയ്ക്കെതിരെ പ്രത്യേക ട്രൈബ്യൂണൽ വധശിക്ഷ വിധിച്ചിരുന്നു. ഈ വിധിയുടെ ഒന്നാം വാർഷികത്തോടനുബന്ധിച്ചാണ് അവാമി ലീഗ് രാജ്യവ്യാപക പ്രതിഷേധത്തിന് ആഹ്വാനം ചെയ്തത്.
അതേസമയം, അവാമി ലീഗിനെ ‘ഭീകര സംഘടന’യെന്നും ‘പുറത്താക്കപ്പെട്ട ഫാസിസ്റ്റ് ശക്തി’യെന്നും വിശേഷിപ്പിച്ച പ്രധാനമന്ത്രി റഹ്മാൻ, ഇവരുടെ തിരിച്ചുവരവ് തടയാൻ ജനാധിപത്യ ശക്തികൾ ഒന്നിക്കണമെന്ന് പാർലമെന്റിൽ ആഹ്വാനം ചെയ്തു. 2024 ഓഗസ്റ്റിൽ ഭാരതത്തിൽ അഭയം തേടിയ 79-കാരിയായ ഷെയ്ഖ് ഹസീനയെ കൈമാറണമെന്ന് ബംഗ്ലാദേശ് ആവശ്യപ്പെട്ടുവരികയാണ്. ഇതിനിടെ, ഡിസംബറിൽ സ്വമേധയാ തിരിച്ചെത്തി നിയമനടപടികൾ നേരിടുമെന്ന് ഹസീന പ്രഖ്യാപിച്ചതോടെ ഇരുരാജ്യങ്ങളും തമ്മിലുള്ള നയതന്ത്ര സാഹചര്യങ്ങളും സങ്കീർണ്ണമായിരിക്കുകയാണ്.


















