മുംബൈ: വി.ഡി. സവർക്കറെ അപമാനിക്കുന്ന പരാമർശങ്ങളുള്ള സോണിയ ഗാന്ധിയുടെ ആത്മകഥയിലെ പേജുകള് ഷിന്ഡേ പക്ഷം നേതാക്കളെ കീറിയെറിഞ്ഞപ്പോള് അക്കൂട്ടത്തില് ബാല് താക്കറേയുടെ ഫോട്ടോയും കീറിയെറിഞ്ഞുവെന്ന ആരോപണവുമായി കോണ്ഗ്രസും ഉദ്ധവ് താക്കറെ പക്ഷവും. ബാല്താക്കറെയുടെ ചിത്രം കീറിയ ഷിന്ഡേ പക്ഷം ശിവസേനയുടെ നേതാവ് ഷൈന എന്സി മാപ്പ് പറയണമെന്നാണ് കോണ്ഗ്രസ് ആവശ്യമുയര്ത്തിയത്. മാപ്പ് പറയില്ലെന്നും പറ്റുമെങ്കില് കേസ് കൊടുക്കൂ എന്നും വെല്ലുവിളിക്കുകയാണ് ഷൈന എന്സി.
“ഹിന്ദു ഹൃദയ സാമ്രാട്ട്’ ബാലാസാഹേബ് താക്കറെയുടെ ചിത്രം ഞാൻ എവിടെയാണ് കീറിയതെന്നോ, അല്ലെങ്കിൽ അദ്ദേഹത്തെ അനാദരിച്ചതെന്നോ കാണിച്ചുതരിക. ഒരു സംഭവത്തെ മനഃപൂർവ്വം വളച്ചൊടിച്ച് തെറ്റായ വിവരണം സൃഷ്ടിക്കുന്നത് അനുവദിക്കില്ല. എനിക്കെതിരെ അപകീർത്തികരമായ ആരോപണങ്ങൾ പ്രചരിപ്പിക്കുന്നവർക്കെതിരെ നിയമനടപടി സ്വീകരിക്കും. പിന്നെ, ഞാൻ നേരത്തെ പറഞ്ഞതുപോലെ, മണിശങ്കർ അയ്യരുടെ ചിത്രം ഞാൻ ആയിരം തവണ കീറും; ബാലാസാഹേബ് ഞങ്ങളെ പഠിപ്പിച്ചത് ഇതാണ്.”-ഷൈന എന്സി വിശദീകരിച്ചു.
Show me where I have torn or disrespected Hindu hruday samrat Balasaheb Thackeray’s photograph. Deliberately twisting an incident to create a false narrative will not be tolerated. Anyone spreading defamatory claims against me will face legal action.
And yes, as I have said, I… pic.twitter.com/74uPKanxvP
— Shaina Chudasama Munot (@ShainaNC) November 18, 2026
സോണിയാഗാന്ധിയുടെ പുസ്തകത്തിലെ ചില പേജുകള് കീറിയെറിയുന്നതോടൊപ്പം മറ്റ് രണ്ടുഫോട്ടോകളും കീറിയെറിഞ്ഞിരുന്നു. അതില് ഒന്ന് ഉദ്ധവ് താക്കറെ സോണിയയുടെ കയ്യില് നിന്നും ആത്മകഥയുടെ കോപ്പി സ്വീകരിക്കുന്ന ചിത്രമാണ്. മറ്റൊന്ന് ബാല് താക്കറെ കോണ്ഗ്രസ് നേതാവ് മണി ശങ്കര് അയ്യറുടെ കോലത്തിന്റെ മുഖത്ത് ചെരിപ്പുകൊണ്ടടിക്കുന്ന ചിത്രമാണ്. ബാല് താക്കറെയുടെ കാലത്ത് കോണ്ഗ്രസിനോട് വിട്ടുവീഴ്ചയില്ലാത്ത നിലപാടാണ് ശിവസേന സ്വീകരിച്ചിരുന്നതെങ്കില് ഇന്ന് ഉദ്ധവ് താക്കറെ കോണ്ഗ്രസിന്റെ അടിമയായി മാറിയിരിക്കുന്നുവെന്ന് കാണിക്കാനാണ് ഈ രണ്ട് ഫോട്ടോകളും സമരക്കാര് പ്രത്യേകം കൊണ്ടുവന്നിരുന്നത്. ഈ രണ്ട് ചിത്രങ്ങളും ഷൈന എന്സി ഉള്പ്പെടെയുള്ള നേതാക്കള് ചീന്തിയെറിഞ്ഞിരുന്നു.
ഷൈന ചീന്തിയത് ബാല്താക്കറെയുടെ ചിത്രമല്ല, മണിശങ്കര് അയ്യറുടെ ചിത്രമാണെന്ന് ഉപമുഖ്യമന്ത്രി ഏക് നാഥ് ഷിന്ഡേ പിന്നീട് വിശദീകരണവുമായി രംഗത്ത് വന്നു. കോണ്ഗ്രസ് നേതാവ് നാന പടോളെയ്ക്ക് ധൈര്യമുണ്ടെങ്കില് തനിക്കെതിരെ കേസ് കൊടുക്കൂ എന്നും മാപ്പ് പറയില്ലെന്നും ഷൈന എന്സി വെല്ലുവിളിച്ചു.
വീര് സവർക്കറെ അപമാനിക്കുന്ന പുസ്തകമാണ് സോണിയ രചിച്ച ‘ബിലോങ്ങിംഗ്: എ ജേർണി ഓഫ് ലവ്’ (Belonging: A Journey of Love) എന്ന പുസ്തകം എന്നാണ് ഏക് നാഥ് ഷിന്ഡേ പക്ഷം ശിവസേന ആരോപിക്കുന്നത്. . മഹാരാഷ്ട്രയിൽ പുസ്തകത്തിന്റെ വിതരണം അനുവദിക്കില്ലെന്നും ഷിന്ഡേ പക്ഷം വെല്ലുവിളിച്ചിരിക്കുകയാണ്. സഞ്ജയ് നിരുപം, ഷൈന എൻ.സി, ആനന്ദ് ദുബെ തുടങ്ങിയ ശിവസേന നേതാക്കൾ പ്രതിഷേധത്തിൽ പങ്കെടുത്തു.
പുസ്തകത്തിന്റെ 201, 443 പേജുകളിലായി സവർക്കറെയും ആർ.എസ്.എസിനെയും അപമാനിക്കുകയാണെന്ന് ഇവര് ആരോപിക്കുന്നു. 201-ാം പേജിൽ, ആർ.എസ്.എസ് രാഷ്ട്രീയത്തോടുള്ള ഇന്ദിര ഗാന്ധിയുടെ എതിർപ്പിനെക്കുറിച്ചാണ് സോണിയ എഴുതിയിരിക്കുന്നത്. ബ്രിട്ടീഷ് ഭരണകാലത്ത് കോൺഗ്രസ് സ്വാതന്ത്ര്യസമര സേനാനികൾ ആക്രമണങ്ങളും ജയിൽവാസവും നേരിട്ടപ്പോൾ, സവർക്കറെപ്പോലുള്ള മുതിർന്ന ആർ.എസ്.എസ് നേതാക്കൾ കൊളോണിയൽ അധികാരികൾക്ക് മാപ്പപേക്ഷകൾ എഴുതി നൽകുകയായിരുന്നുവെന്നാണ് സോണിയ ഗാന്ധി പുസ്തകത്തില് പരിഹസിക്കുന്നത്.
“ബ്രിട്ടീഷ് ഭരണാധികാരികളുടെ കൈകളിൽ കോൺഗ്രസ് സ്വാതന്ത്ര്യസമര സേനാനികൾ ആക്രമണങ്ങളും ജയിൽവാസവും സഹിക്കുമ്പോൾ, വിനായക് ദാമോദർ സവർക്കറെപ്പോലുള്ള മുതിർന്ന ആർ.എസ്.എസ് നേതാക്കൾ കൊളോണിയൽ യജമാനന്മാർക്ക് മാപ്പപേക്ഷകൾ എഴുതി നൽകുകയായിരുന്നു; മാത്രമല്ല, അവരുടെ അംഗങ്ങൾ ബ്രിട്ടീഷ് അധികാരികൾക്ക് വിവരങ്ങൾ കൈമാറുന്നവരായി (informers) പ്രവർത്തിക്കുകയും ചെയ്തു,” – സോണിയ എഴുതിയിരിക്കുന്നു. എന്തായാലും ആവശ്യമായ മാറ്റങ്ങള് വരുത്തിയില്ലെങ്കില് മഹാരാഷ്ട്രയില് ഈ പുസ്തകം വില്ക്കാന് സമ്മതിക്കില്ലെന്ന് ഏക്നാഥ് ഷിന്ഡേ പക്ഷം ശിവസേന വാദിക്കുന്നു.


















