ന്യൂദല്ഹി:രാഹുല് ഗാന്ധി കോണ്ഗ്രസിന് ലാഭത്തിനേക്കാള് നഷ്ടമാണ് വരുത്തിവെച്ചതെന്നും വെറും പദയാത്ര (ഭാരത് ജോഡോ യാത്ര) കൊണ്ട് മാത്രം ഒരാള് നേതാവാകില്ലെന്നും മനേക ഗാന്ധി. സോണിയാഗാന്ധിയുടെ ആത്മകഥയില് മനേക ഗാന്ധിയെ രൂക്ഷമായി വിമര്ശിച്ചതിനുള്ള പ്രതികരണമെന്നോണമാണ് മനേക ഗാന്ധി ബിബിസിയ്ക്ക് 2024ലെ ലോക് സഭാ പ്രചാരണവേളയില് അനുവദിച്ച അഭിമുഖം വൈറലായി സമൂഹമാധ്യമങ്ങളില് പ്രചരിക്കുന്നത്.
ബിബിസി ഹിന്ദി ലേഖകൻ രാഘവേന്ദ്ര റാവുവിന് നൽകിയ ഈ അഭിമുഖത്തില് മനേക ഗാന്ധി രാഹുല് ഗാന്ധിയേയും പ്രിയങ്ക ഗാന്ധിയെയും വിമര്ശിക്കുന്നു. രാഹുൽ ഗാന്ധി ഒരു നേതാവെന്ന നിലയിൽ ‘വളരാൻ പരാജയപ്പെട്ടത്’ എന്തുകൊണ്ടാണെന്നും മനേക ഗാന്ധി തുറന്നുപറയുന്നു. “യഥാര്ത്ഥ രാഷ്ട്രീയ പ്രശ്നങ്ങൾ ഉന്നയിക്കുക, രാഷ്ട്രീയ വിഷയങ്ങള് ആഴത്തിൽ പഠിക്കുക, പാര്ട്ടിക്ക് ഉറച്ച നേതൃത്വം നൽകുക, ധൈര്യം കാണിക്കുക തുടങ്ങിയ ഗുണങ്ങളൊന്നും രാഹുല് ഗാന്ധിയ്ക്കില്ല.”- മനേക ഗാന്ധി പറയുന്നു.
“രാഹുൽ ഗാന്ധി ഒട്ടും വളർച്ച കൈവരിച്ചിട്ടില്ലെന്നാണ് എനിക്ക് തോന്നുന്നത്.വെറും പദയാത്ര (ഭാരത് ജോഡോ യാത്ര) കൊണ്ട് മാത്രം ആരും വളർച്ച നേടുന്നില്ല. രാഹുല് ഗാന്ധിയുടെ നാടകം കളിക്കുന്നതുപോലുള്ള നീക്കങ്ങൾ കോൺഗ്രസിന് നേട്ടത്തേക്കാളേറെ നഷ്ടമാണ് വരുത്തിവെച്ചത്.
.”- മനേക ഗാന്ധി ഈ അഭിമുഖത്തില് തുറന്നടിക്കുന്നു.
“പ്രിയങ്ക ഗാന്ധിയുടെ കാര്യത്തിലും ഇതുതന്നെയാണ് സ്ഥിതി”- മനേക ഗാന്ധി പറഞ്ഞു. രാഹുൽ ഗാന്ധിയും പ്രിയങ്ക വാദ്രയും ‘പപ്പു’ മാര് തന്നെയാണെന്നും പരോക്ഷമായി മനേക ഗാന്ധി വിശേഷിപ്പിക്കുന്നു.


















