ആലപ്പുഴ: ഒപ്പമുളള മന്ത്രിമാരെ സൂക്ഷിക്കണമെന്ന് വി ഡി സതീശനോട് നേരിട്ട് പറഞ്ഞിട്ടുണ്ടെന്ന് ജി സുധാകരന്‍ എംഎല്‍എ. വി ഡി സതീശന്‍ മികച്ച മുഖ്യമന്ത്രിയാണെന്നും അപാകതയൊന്നും ഇതുവരെ വന്നിട്ടില്ലെന്നും സുധാകരന്‍ അഭിപ്രായപ്പെട്ടു.
വര്‍ഷങ്ങളോളം സെക്രട്ടേറിയറ്റില്‍ താന്‍ മന്ത്രിയല്ലാതിരുന്ന സമയത്ത് സതീശനെ കാണുന്നതാണ്. ഒപ്പമുളള മന്ത്രിമാര്‍ കുഴപ്പമൊന്നും കാണിച്ചെന്നല്ല പറയുന്നത്.സതീശന്റെ ഗുണം പറഞ്ഞ വാക്കില്‍ ഉറച്ച് നില്‍ക്കും എന്നതാണ്.
തനിക്കെതിരായ സ്വത്ത് സമ്പാദന ആരോപണങ്ങള്‍ സംബന്ധിച്ച്, പൊതുജീവിതത്തില്‍ നയാപൈസ ആരോടും വാങ്ങിയിട്ടില്ലെന്ന് ജി സുധാകരന്‍ പ്രതികരിച്ചു.ഭാര്യ 32 വര്‍ഷം ഒന്നേകാല്‍ ലക്ഷം രൂപ ശമ്പളം വാങ്ങിയിരുന്നു.ഭാര്യ സ്ഥലം വാങ്ങിയത് വീട്ടുജോലിക്കാരിക്ക് വീട് വയ്‌ക്കാനാണ്. വീട് പണിത് നല്‍കിയത് തന്റെ ഭാര്യയാണെന്നും അദ്ദേഹം പറഞ്ഞു. മകന്‍ ഗള്‍ഫില്‍ റിയല്‍ എസ്റ്റേറ്റ് കമ്പനിയിലാണ്.
ജി സുധാകരന്റെ ഭാര്യ സ്ഥലം വാങ്ങിയതിന്റെയും ബാങ്ക് അക്കൗണ്ടിലെ പണത്തിന്റെ വിവരങ്ങളും പുറത്തു വിടണം എന്ന് മുന്‍ എംഎല്‍എ എച്ച് സലാം അടക്കം സിപിഎം നേതാക്കള്‍ വെല്ലുവിളിച്ചിരുന്നു.
