ന്യൂദല്ഹി: റഷ്യന് ഭാഷയിലേക്ക് മൊഴിമാറ്റം ചെയ്ത തമിഴ് ക്ലാസിക് ഗ്രന്ഥമായ തിരുക്കുറളിന്റെ ഒരു പതിപ്പ് പുടിന് സമ്മാനിച്ച് പ്രധാനമന്ത്രി മോദി. ന്യൂദല്ഹിയില് ബ്രിക്സ് ഉച്ചകോടിയ്ക്കെത്തിയ പുടിന് ദല്ഹിയില് നടന്ന പ്രത്യേക ചടങ്ങിലാണ് മോദി തിരുക്കുറള് സമ്മാനിച്ചത്.
തിരുക്കുറളിന്റെ കാലാതീതമായ ജ്ഞാനത്തെക്കുറിച്ച് എടുത്തുപറഞ്ഞ മോദി, ഈ റഷ്യന് പരിഭാഷ റഷ്യക്കാരായ വായനക്കാരെ പ്രചോദിപ്പിക്കുമെന്നും മോദി പറഞ്ഞു. 17ാം നൂറ്റാണ്ടു മുതലേ റഷ്യക്കാര്ക്ക് ഭാരതീയ സാഹിത്യത്തോടും തത്വചിന്തയോടും താല്പര്യമുണ്ട്. തിരുക്കുറളിന്റെ യൂറോപ്യന് ഭാഷയിലേക്കുള്ള പരിഭാഷ റഷ്യന് പണ്ഡിതരേയും സാഹിത്യകാരേയും ആകര്ഷിച്ചിട്ടുണ്ട്. 19ാം നൂറ്റാണ്ടിലെ തിരുക്കുറല് പരിഭാഷ പ്രശസ്ത എഴുത്തുകാരനായ ലിയോ ടോള്സ്റ്റോയി വായിച്ചിട്ടുണ്ട്. തിരുക്കുറളില് നിറഞ്ഞുനില്ക്കുന്ന അഹിംസാചിന്തയും നന്മയും സഹാനുഭൂതിയും ടോള്സ്റ്റോയിയുടെ ദാര്ശനികരചനയെ സ്വാധീനിച്ചിട്ടുണ്ട്.
തിരുക്കുറളിന്റെ റഷ്യന് ഭാഷയിലുള്ള വിവര്ത്തനം നല്കുക വഴി ഭാരതീയ സാഹിത്യത്തോട് റഷ്യയ്ക്കുണ്ടായിരുന്നു പഴയ ബന്ധത്തെ ആധുനിക റഷ്യ-ഇന്ത്യ ബന്ധത്തോട് കൂട്ടിയിണക്കുകയായിരുന്നു മോദി. തിരുക്കുറളിന്റെ തമിഴിലുള്ള മൂലകവിതകളും ഇതിന്റെ റഷ്യന് ഭാഷയിലേക്കുള്ള ലിപ്യന്തരണവും മൊഴിമാറ്റവും ഉള്പ്പെട്ടതാണ് പുസ്തകം. ക്ലാസിക്കല് തമിഴ് സെന്ട്രല് ഇന്സ്റ്റിറ്റ്യൂട്ടാണ് ഈ പരിഭാഷ നിര്വ്വഹിച്ച് പ്രസിദ്ധീകരിച്ചത്. നൈര മക്ര്ചിന് ആണ് ഈ മൊഴിമാറ്റം നിര്വ്വഹിച്ചത്.
