തുറവൂര്‍: തുറവൂര്‍ മഹാക്ഷേത്രത്തിലെ സ്ഥാവര ജംഗമ വസ്തുക്കളുടെ കണക്കുകള്‍ തയാറാക്കി രജിസ്റ്ററുകള്‍ സൂക്ഷിക്കണമെന്ന് തിരുവാഭരണ കമ്മിഷണര്‍ക്ക് ഹൈക്കോടതി നിര്‍ദേശം നല്‍കിയതനുസരിച്ച് നടപടികള്‍ ആരംഭിച്ചു. ഇതിന്റെ അടിസ്ഥാനത്തില്‍ കമ്മിഷണര്‍ കഴിഞ്ഞ ദിവസം സമര്‍പ്പിച്ച റിപ്പോര്‍ട്ട് പ്രകാരം, 19 ഇനങ്ങളുടെ കാര്യത്തില്‍ രജിസ്റ്റര്‍ എന്‍ട്രികള്‍ ഒന്നും കണ്ടെത്താന്‍ കഴിഞ്ഞിട്ടില്ല.
ഈ എന്‍ട്രികള്‍ തുറവൂര്‍ ദേവസ്വത്തിലെ ശാന്തിയുടെ പക്കലോ വൈക്കത്തെ സ്ട്രോങ് റൂമിലോ ലഭ്യമല്ല എന്ന വിവരമാണ് നല്‍കുന്നത്.
ക്ഷേത്രത്തില്‍ സമര്‍പ്പിച്ച സ്വര്‍ണം ഉള്‍പ്പെടെയുള്ളവയെക്കുറിച്ച് ഒരറിവും ഇല്ല. 19 ഇനങ്ങളില്‍, ടിആര്‍ 283, 285, 286, 295, 310, 312, 313, 329, 330, 359, 360, 361 എന്നിവ സ്വര്‍ണാഭരണങ്ങളാണ്. ബാക്കിയുള്ള ഇനങ്ങള്‍ വെള്ളിയിലുള്ളവയാണ്. ടിആര്‍ 601 എന്ന വിഭാഗത്തില്‍പ്പെടുന്ന നാല് ഇനങ്ങളുടെ കാര്യത്തില്‍, ബന്ധപ്പെട്ട അഡ്മിനിസ്ട്രേറ്റീവ് ഓഫീസറുടെ ഉത്തരവാദിത്വം നിര്‍ണയിക്കാന്‍ തിരുവാഭരണ കമ്മിഷണര്‍ക്ക് കഴിഞ്ഞിട്ടുണ്ട്.
എന്നാല്‍ മറ്റ് ഇനങ്ങളുടെ കാര്യത്തില്‍ കമ്മിഷണര്‍ക്ക് അതിന് കഴിഞ്ഞിട്ടില്ല. കാരണം, ബന്ധപ്പെട്ട രജിസ്റ്ററുകളില്‍ ഇനങ്ങളുടെ നമ്പര്‍, വിശദാംശങ്ങള്‍, തൂക്കം മുതലായ വിവരങ്ങള്‍ രേഖപ്പെടുത്തിയിട്ടില്ല.
രേഖകള്‍ ഹാജരാക്കുന്നതിനായി വൈക്കം അസിസ്റ്റന്റ് കമ്മിഷണര്‍, അഡ്മിനിസ്ട്രേറ്റീവ് ഓഫീസര്‍ തുടങ്ങിയവര്‍ക്ക് നിര്‍ദ്ദേശങ്ങള്‍ നല്‍കിയിട്ടുണ്ടെന്ന് റിപ്പോര്‍ട്ടില്‍ സൂചനയുണ്ട്. സമ്പൂര്‍ണവും വിശദവുമായ റിപ്പോര്‍ട്ട് സമര്‍പ്പിക്കുന്നതിന് ഒരു മാസം കൂടി സമയം ആവശ്യമാണ് എന്ന് കമ്മിഷണര്‍ അറിയിച്ചിട്ടുണ്ട്. ക്ഷേത്രത്തിന്റെ ലക്ഷങ്ങള്‍ വിലമതിക്കുന്ന ജംഗമങ്ങള്‍ നഷ്ടപ്പെട്ടിട്ടുണ്ടെന്നാണ് ലഭ്യമായ റിപ്പോര്‍ട്ടുകളിലെ സൂചന. തുറവൂര്‍ ശ്രീഭവനില്‍ പി.എസ്. ശ്രീകുമാര്‍ ഹൈക്കോടതിയില്‍ നല്‍കിയ സ്വകാര്യ ഹര്‍ജിയിലാണ് സ്ഥാവരജംഗമ വസ്തുക്കളുടെ കണക്കെടുക്കാന്‍ ഉത്തരവുണ്ടായത്.
