തിരുവനന്തപുരം : ചിറയിന്കീഴിലെ തമ്മിലടിയില് നടപടിയുമായി കെ പി സി സി. രമ്യാ ഹരിദാസ് എം എല് എയുടെ സന്തതസഹചാരി പാളയം പ്രദീപിനെ സസ്പന്ഡ് ചെയ്തു. തമ്മിലടി ഉണ്ടായ വീടിന്റെ ഉടമയായ പ്രാദേശിക കോണ്ഗ്രസ് നേതാവ് സജാദിനെയും സസ്പന്ഡ് ചെയ്തു.പാര്ട്ടിയുടെ പ്രാഥമിക അംഗത്വത്തില് നിന്നാണ് ഇവര്ക്ക് സസ്പന്ഷന്.
കെ പി സി സി അന്വേഷണ സമിതി റിപ്പോര്ട്ടിന്മേലാണ് നടപടി.കൂടുതല് നടപടി പിന്നീടെന്ന് കെ പി സി സി അറിയിച്ചു. പാര്ട്ടിക്ക് അവമതിപ്പുണ്ടാക്കുന്ന പെരുമാറ്റം ഇവരുടെ ഭാഗത്ത് നിന്നുണ്ടായെന്നാണ് കണ്ടെത്തല്.
ബ്ലോക്ക് പഞ്ചായത്ത് യോഗത്തില് പാളയം പ്രദീപിന്റെ സാന്നിധ്യം ചില കോണ്ഗ്രസ് പ്രവര്ത്തകര്ക്ക് ഉണ്ടാക്കിയ അസ്വസ്ഥത ഉള്പ്പെടെയാണ് കയ്യാങ്കളിയിലേക്ക് കാര്യങ്ങളെ എത്തിച്ചത്. തന്റെ പേഴ്സണല് സ്റ്റാഫില്പ്പെട്ടയാളാണ് പാളയം പ്രദീപ് എന്നാണ് രമ്യ ഹരിദാസ് വാദിച്ചിരുന്നത്. എന്നാല് സഭാ രേഖകളില് ഈ സ്റ്റാഫിന്റെ പേരില്ല. എംഎല്എയ്ക്ക് മൂന്ന് സ്റ്റാഫിനെയാണ് സര്ക്കാര് അനുവദിച്ച് നല്കുന്നത്. വിമല് എന്ന ആളുടെ പേര് മാത്രമാണ് രമ്യ ഹരിദാസ് എംഎല്എയുടെ സ്റ്റാഫായി ഔദ്യോഗിക പട്ടികയിലുള്ളത്.
രമ്യാ ഹരിദാസ് എം എല് എക്കെതിരെയും പരാതി കെ പി സി സിക്ക് മുന്നിലുണ്ട്.
