വയനാട്: വായ്പാ തട്ടിപ്പിന് ഇരയായവരുടെ വീട്ടില് ജപ്തി നടപടിക്കെത്തിയ ബാങ്ക് അധികൃതരെ നാട്ടുകാര് തടഞ്ഞു.മാനന്തവാടി പനവല്ലിയിലെ തോമസിന്റെ വീട്ടില് എത്തിയ ഉദ്യോഗസ്ഥരെ തടഞ്ഞതോടെ നാട്ടുകാരുമായി ചര്ച്ച നടത്തിയ ഉദ്യോഗസ്ഥര് ജപ്തി നടപടികള് ഒഴിവാക്കി മടങ്ങി.
ഈ മാസം 9ന് എച്ച്ഡിഎഫ്സി ബാങ്കിന്റെ ഉന്നത ഉദ്യോഗസ്ഥര് ഇരകളുമായി ചര്ച്ച നടത്താനും തീരുമാനിച്ചു. ഒരു രൂപ പോലും വായ്പ എടുക്കാത്ത മാനന്തവാടി പനവല്ലി സ്വദേശി തോമസിന്റെ വീട്ടില് ബാങ്ക് അധികൃതര് ജപ്തി നടപടിയുമായി എത്തിയതാണ് പ്രശ്നമായത്. നാട്ടുകാര് ഇടപെട്ടതോടെ ജപ്തി നടപടിക്ക് എറണാകുളത്ത് നിന്ന് എത്തിയ ഉദ്യോഗസ്ഥ ബാങ്കിന്റെ മുംബയിലുളള ഉന്നത ഉദ്യോഗസ്ഥരെ ഫോണില് ബന്ധപ്പെട്ടു.
വയനാട്ടില് വച്ച് തന്നെ ചര്ച്ച നടത്തണമെന്ന് നാട്ടുകാര് ആവശ്യപ്പെട്ടപ്പോള് സ്ഥലം പിന്നീട് തീരുമാനിക്കാമെന്നും ചര്ച്ച കഴിയും വരെ നടപടികള് ഉണ്ടാകില്ലെന്നും ബാങ്ക് അധികൃതര് ഉറപ്പ് നല്കി.
