ഇടുക്കി: തമിഴ്നാട്ടിൽ നിന്ന് കേരളത്തിലേക്ക് കഞ്ചാവിനേക്കാൾ മാരകമായ പുതിയ രീതിയിലുള്ള ലഹരിവസ്തുവിന്റെ കടത്ത് ആദ്യമായി പിടികൂടി എക്സൈസ് സംഘം. മൂന്നാറിൽ തേനിയിൽനിന്ന് കൊണ്ടുവന്ന 8.185 കിലോ വൈക്കോൽ കറുപ്പുമായി (പോപ്പി സ്ട്രോ) ഇടമലക്കുടി സ്വദേശി മോഹൻരാജ് (41) ആണ് അറസ്റ്റിലായത്. മൂന്നാർ എക്സൈസ് സർക്കിൾ ഓഫീസും ദേവികുളം എക്സൈസ് റെയ്‌ഞ്ച് ഓഫീസും സംയുക്തമായി നടത്തിയ ഓപ്പറേഷൻ തണ്ടറിലൂടെയാണ് ഈ വൻ ലഹരിവേട്ട നടത്തിയത്. കറുപ്പ് വേർതിരിച്ചശേഷം അവശേഷിക്കുന്ന തൊണ്ടാണ് വൈക്കോൽ കറുപ്പ് എന്നറിയപ്പെടുന്നത്.
സെപ്റ്റംബർ 3-ന് അർധരാത്രി 12.45-ഓടെ മൂന്നാർ ടൗണിൽവെച്ചാണ് പ്രതി പിടിയിലായത്. തേനിയിൽനിന്നുള്ള കെഎസ്ആർടിസി അല്ലെങ്കിൽ പ്രൈവറ്റ് ബസിൽ പ്ലാസ്റ്റിക് കവറുകളിലാക്കി വൈക്കോൽ കറുപ്പ് മറ്റൊരു ബിഗ്ഷോപ്പറിൽ പൊതിഞ്ഞ് കടത്താൻ ശ്രമിക്കവെയാണ് കുടുങ്ങിയത്. പ്രതി ലഹരിവസ്തുക്കൾ കടത്തുന്നതായി രഹസ്യവിവരത്തെ തുടർന്ന് കഴിഞ്ഞ രണ്ടുമാസമായി എക്സൈസ് സംഘം ഇയാളെ നിരീക്ഷിച്ചുവരികയായിരുന്നു. ഇടുക്കി അസി. എക്സൈസ് കമ്മിഷണറുടെ നിർദേശപ്രകാരം എൻഫോഴ്‌സ്‌മെന്റ്-ഇന്റലിജൻസ് ബ്യൂറോ നടത്തിയ ശക്തമായ അന്വേഷണമാണ് പ്രതിയിലേക്ക് എത്താൻ സഹായിച്ചത്.
തേനിയിൽ നിന്ന് ബസിൽ മൂന്നാറിൽ എത്തിക്കുന്ന ലഹരിവസ്തുക്കൾ പിന്നീട് മറ്റ് ഇടവഴികൾ വഴി വിദൂര പ്രദേശമായ ഇടമലക്കുടിയിലേക്ക് കടത്തുന്നതാണ് ഇവരുടെ രീതിയെന്ന് എക്സൈസ് കണ്ടെത്തിയിട്ടുണ്ട്. ഈ ലഹരിവരവ് എത്രകാലമായി മൂന്നാറിൽ എത്തിക്കുന്നുണ്ടെന്നും മറ്റ് ഏതൊക്കെ സ്ഥലങ്ങളിലേക്ക് ഇത് വ്യാപിച്ചിട്ടുണ്ടെന്നും വകുപ്പ് ഗൗരവമായി അന്വേഷിക്കുന്നുണ്ട്. കൂടാതെ പ്രതിയുടെ സാമ്പത്തിക ഇടപാടുകളെക്കുറിച്ചും വിശദമായ പരിശോധന നടക്കും. സംസ്ഥാനത്ത് ആദ്യമായി വൈക്കോൽ കറുപ്പ് പിടികൂടിയ സംഭവമായതിനാൽ കേസിൽ ആഴത്തിലുള്ള അന്വേഷണം നടത്താനാണ് എക്സൈസ് സംഘത്തിന്റെ തീരുമാനം.
മൂന്നാർ എക്സൈസ് സർക്കിൾ ഇൻസ്പെക്ടർ എസ്. ഹരികൃഷ്ണൻ, ദേവികുളം എക്സൈസ് ഇൻസ്പെക്ടർ വിഷ്ണു, അസി. എക്സൈസ് ഇൻസ്പെക്ടർ (ഗ്രേഡ്) നെബു, പ്രിവന്റീവ് ഓഫീസർ(ഗ്രേഡ്) അനീഷ്, സിവിൽ എക്സൈസ് ഓഫീസർമാരായ അജേഷ്, സുജിൻ, പ്രവീൺകുമാർ, വനിതാ സിവിൽ എക്സൈസ് ഓഫീസർ സൗമ്യ എന്നിവരടങ്ങിയ സംഘമാണ് ഓപ്പറേഷന് നേതൃത്വം നൽകിയത്.
