ചെന്നൈ: തമിഴ്നാട്ടിലെ വിവിധ വ്യവസായ-നിയന്ത്രണ അനുമതികൾക്ക് പരമാവധി 21 ദിവസത്തെ സമയപരിധി നിശ്ചയിക്കുന്നതിനുള്ള ഭേദഗതി ബിൽ വിജയ് സർക്കാർ അവതരിപ്പിച്ചു. വ്യവസായ മന്ത്രി എസ്. കീർത്തനയാണ് നിയമസഭയിൽ ബിൽ അവതരിപ്പിച്ചത്.
വിവിധ വ്യവസായ-വാണിജ്യ അനുമതികൾക്കുള്ള നടപടിക്രമങ്ങൾ പൂർത്തിയാക്കുന്നതിനുള്ള സമയപരിധി പരമാവധി 21 ദിവസമാണ്. നിലവിലുള്ള ഏതെങ്കിലും നിയമത്തിലോ ബിസിനസ് അനുമതിക്ക് 21 ദിവസത്തിൽ കൂടുതലുള്ള സമയപരിധി നിശ്ചയിച്ചിട്ടുണ്ടെങ്കിൽ അത് 21 ദിവസമായി കണക്കാക്കണമെന്നാണ് ബില്ലിലെ പ്രധാന വ്യവസ്ഥ.
പൊതു അവധികളും പ്രാദേശിക അവധികളും ഒഴിവാക്കിയാണ് സമയപരിധി കണക്കാക്കുന്നത്. നിലവിൽ 21 ദിവസത്തിനുള്ളിൽ അനുമതി നൽകണമെന്ന് വ്യവസ്ഥ ചെയ്യുന്ന നിയമങ്ങളിലെ സമയപരിധി അതുപോലെ തന്നെ തുടരും.
വൻകിട, തന്ത്രപ്രധാന, സംസ്ഥാനത്തിന്റെ സാമ്പത്തിക വളർച്ചയ്‌ക്ക് നിർണായകമായ നിക്ഷേപങ്ങൾ ഏകോപിപ്പിക്കുന്നതിനും നിരീക്ഷിക്കുന്നതിനുമായി ‘തമിഴ്നാട് ഇൻവെസ്റ്റ്മെന്റ് പ്രമോഷൻ കമ്മിഷൻ’ രൂപീകരിക്കും. ചീഫ് സെക്രട്ടറി അധ്യക്ഷനായുള്ള ഉന്നതതല സമിതിയായാകും കമ്മിഷൻ പ്രവർത്തിക്കുക.
200 കോടി മുതൽ മുകളിലേക്കുള്ള മൂലധന നിക്ഷേപ പദ്ധതികളും 5,000 പേർക്കോ അതിലധികം പേർക്കോ തൊഴിൽ സൃഷ്ടിക്കുന്ന പദ്ധതികളും കമ്മിഷന്റെ പരിധിയിൽ വരും. സ്വതന്ത്ര വ്യാപാര കരാറുകളുമായി ബന്ധപ്പെട്ട നിക്ഷേപങ്ങൾക്കും ഭാരതത്തിന്‌
പുറത്തുള്ള തമിഴ്നാട് സ്വദേശികളുടെ നിക്ഷേപങ്ങൾക്കും കമ്മിഷൻ മേൽനോട്ടം വഹിക്കും.
ഇതിന് പുറമെ, സർക്കാർ വിജ്ഞാപനം ചെയ്യുന്ന മറ്റ് സുപ്രധാന നിക്ഷേപ പദ്ധതികളും കമ്മിഷന്റെ പരിഗണനയിൽ ഉൾപ്പെടുത്തുമെന്ന് ബില്ലിൽ വ്യക്തമാക്കുന്നു.
