ആറന്മുള: പാരമ്പര്യവും ആധുനികതയും ഒരുമിപ്പിച്ച് മുന്നോട്ടുപോകണമെന്ന് ഉപരാഷ്ട്രപതി സി.പി. രാധാകൃഷ്ണന്‍. ആറന്മുള ഉതൃട്ടാതി ജലോത്സവം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
”പാരമ്പര്യവും ആധുനികതയും പരസ്പരം വിരുദ്ധ ശക്തികളല്ല. അവയ്‌ക്ക് കൈകോര്‍ത്ത് മുന്നോട്ടുപോകാനാകും. പ്രധാനമന്ത്രി നരേന്ദ്ര മോദി ആവര്‍ത്തിച്ച് പറയുന്നതുപോലെ ‘വികാസ് ഭി, വിരാസത് ഭി’ (വികസനത്തിനൊപ്പം പൈതൃകവും) എന്നതാണ് അതിന്റെ സാരം.” ജനങ്ങളെ ഒരുമിപ്പിക്കുകയും സാമൂഹിക ബന്ധങ്ങള്‍ ശക്തിപ്പെടുത്തുകയും ചെയ്യുന്ന പാരമ്പര്യങ്ങളുടെ അസാധാരണമായ ശക്തിയാണ് ഉത്സവം പ്രകടമാക്കുന്നത്. വിദേശത്ത് ജോലി ചെയ്യുന്ന മലയാളികള്‍ പോലും ഈ ഉത്സവകാലത്ത് നാട്ടിലെത്തി വള്ളംകളിയെ പിന്തുണയ്‌ക്കുകയും പ്രോത്സാഹിപ്പിക്കുകയും ചെയ്യുന്നുവെന്ന് തനിക്ക് അറിയാന്‍ കഴിഞ്ഞു. ഇത് നമ്മുടെ പാരമ്പര്യത്തിന്റെയും സംസ്‌കാരത്തിന്റെയും വേരുകളിലുള്ള വിശ്വാസത്തിന്റെയും മഹത്വമാണെന്നും അദ്ദേഹം പറഞ്ഞു.
ശബരിമലയുമായി തനിക്കുള്ള വൈകാരിക അടുപ്പവും ഉപരാഷ്ട്രപതി പങ്കുവെച്ചു. ഏഴ് തവണ ശബരിമല സന്ദര്‍ശിച്ചിട്ടുണ്ട്. തനിക്ക് ഉണ്ടായ എല്ലാ മുന്നേറ്റങ്ങളുടെയും അടിസ്ഥാനം ഈ മണ്ണില്‍ നിന്നാണ്.
കോയമ്പത്തൂരില്‍ നിന്ന് തന്നെ പാര്‍ലമെന്ററി രംഗത്തേക്ക് പരിഗണിക്കുന്നു എന്ന വിവരം അറിയുന്നത് ശബരിമലയില്‍ വെച്ചാണ്. ആറന്മുളക്കണ്ണാടിയും വള്ളസദ്യയും ഇന്നും പൈതൃക സംരക്ഷണത്തിന്റെ ഉദാഹരണങ്ങളാണ്.
ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍, ആഭ്യന്തരമന്ത്രി രമേശ് ചെന്നിത്തല, ഉന്നത വിദ്യാഭ്യാസ മന്ത്രി റോജി എം. ജോണ്‍, പത്തനംതിട്ട എംപി ആന്റോ ആന്റണി, ആറന്മുള എംഎല്‍എ അബിന്‍ വര്‍ക്കി എന്നിവരും ചടങ്ങില്‍ പങ്കെടുത്തു.
