പത്തനംതിട്ട: ആറന്മുള ഉതൃട്ടാതി വള്ളംകളിയില് എ ബാച്ചില് മേലുകരയ്ക്ക് ഇക്കുറിയും വിജയം. ബി ബാച്ചില് കോറ്റാത്തൂര് കൈതക്കോടി ഹാട്രിക് വിജയം നേടി.
മേലുകര 4.33.029 സമയത്തില് ലക്ഷ്യസ്ഥാനത്തെത്തി. ട്രാക്ക് ഒന്നില് ഇടശേരിമല കിഴക്ക്, ട്രാക്ക് രണ്ടില് മല്ലപ്പുഴശ്ശേരി, ട്രാക്ക് മൂന്നില് കോയിപ്രം, ട്രാക്ക് നാലില് മേലുകര എന്നിങ്ങനെയായിരുന്നു എ ബാച്ച് ഫൈനലിലെ ലൈന് അപ്പ്.
ട്രാക്ക് ഒന്നില് മംഗലം, ട്രാക്ക് രണ്ടില് തോട്ടപ്പുഴശേരി, ട്രാക്ക് മൂന്നില് വന്മമഴി, ട്രാക്ക് നാലില് കോറ്റാത്തൂര് കൈതക്കോടി എന്നിങ്ങനെയായിരുന്നു ബി ബാച്ച് ഫൈനലിലെ ലൈന് അപ്പ്.
പത്തനംതിട്ട ജില്ലയിലെ പമ്പാനദിയില്, ചിങ്ങമാസത്തിലെ തിരുവോണം കഴിഞ്ഞുള്ള ഉതൃട്ടാതി നാളില് നടത്തുന്ന പരമ്പരാഗത ജലമേളയാണ് ആറന്മുള ഉതൃട്ടാതി വള്ളംകളി. ആറന്മുള ശ്രീ പാര്ത്ഥസാരഥി ക്ഷേത്രത്തിലെ ഭഗവാന് കൃഷ്ണനുള്ള ആചാരപരമായ വഴിപാടായാണ് ഇതു കരുതപ്പെടുന്നത്.
തിരുവോണസദ്യയ്ക്കുള്ള വിഭവങ്ങളുമായി വന്ന തിരുവോണത്തോണിയെ ശത്രുക്കളില് നിന്ന് രക്ഷിക്കാന് പമ്പാനദിയുടെ തീരത്തുള്ളവര് തങ്ങളുടെ വള്ളങ്ങളുമായി എത്തിയതിന്റെ ഓര്മ്മപ്പെടുത്തലാണ് ഈ വള്ളംകളിയെന്നാണ് ഐതിഹ്യം.
