പത്തനംതിട്ട: ആറന്മുള വള്ളസദ്യ നല്കാമെന്ന് വിശ്വസിപ്പിച്ച് ഓണ്ലൈന് വഴി പണം വാങ്ങി തട്ടിപ്പ് നടത്തിയെന്ന പരാതിയില് പൊലീസ് കേസെടുത്തു. ദേവസ്വം ബോര്ഡ് ജീവനക്കാരനെന്ന് പറഞ്ഞാണ് പണം വാങ്ങിയത്. പല ജില്ലകളില് നിന്നായി ക്ഷേത്രത്തിലെത്തിയപ്പോഴാണ് തട്ടിപ്പാണെന്ന് ആളുകള് തിരിച്ചറിഞ്ഞത്.
5000 മുതല് പതിനായിരം രൂപ വരെയാണ് പലരില് നിന്നായി തട്ടിയെടുത്തത്. സദ്യയ്ക്കായി എപ്പോള് എത്തണമെന്ന് ചോദിക്കുമ്പോള് ഓരോ ദിവസങ്ങള് മാറ്റിപ്പറഞ്ഞ് ഭക്തരെ കബളിപ്പിക്കുകയായിരുന്നു. സംശയം തോന്നി ക്ഷേത്രത്തിലെത്തിയപ്പോഴാണ് തങ്ങള് ചതിക്കപ്പെട്ട കാര്യം ഭക്തര് അറിയുന്നത്. നിരവധി ആളുകള് സമാനമായ പരാതിയുമായി രംഗത്തെത്തി.സംഭവത്തില് പള്ളിയോട സേവാസംഘം ആറന്മുള പൊലീസ് സ്റ്റേഷനില് പരാതി നല്കി.
ദേവസ്വം ബോര്ഡ് ജീവനക്കാരനെന്ന് സ്വയം പരിചയപ്പെടുത്തിയ വിപിന് ദാസ് എന്ന ആള് സമൂഹമാധ്യമങ്ങള് വഴി പരസ്യം നല്കും. താല്പര്യം അറിയിക്കുന്നവരുമായി ചാറ്റ് ചെയ്യും. വള്ളസദ്യയും താമസവും ഉള്പ്പെടെ എല്ലാം ആറന്മുളയില് ഒരുക്കാമെന്നാണ് വാഗ്ദാനം. എന്നാല് പണം വാങ്ങിയശേഷം പിന്നീട് ആളുകള് ക്ഷേത്രത്തിലെത്തുമ്പോള് ഇയാളെ ഫോണില് ലഭ്യമാകില്ല. വിവിധ ജില്ലകളില് നിന്നുള്ള ആളുകള് കഴിഞ്ഞ കുറെ ദിവസമായി തട്ടിപ്പിനിരയായി. ആദ്യം ലഭിച്ച പരാതികളില് ഒന്നിലാണ് ആറന്മുള പൊലീസ് ഇപ്പോള് കേസെടുത്തത്. കൂടുതല് പരാതികള് പൊലീസിന്റെ പക്കലുണ്ട്.
ആറന്മുള ക്ഷേത്രത്തില് നിന്ന് മൂന്ന് രീതിയിലാണ് വള്ളസദ്യ ലഭ്യമാകുന്നത്. വഴിപാട് ബുക്ക് ചെയ്ത ആളുകള് വഴി സദ്യ കഴിക്കാം. കെഎസ്ആര്ടിസിയുടെ ബജറ്റ് ടൂറിസം ആണ് മറ്റൊരു മാര്ഗ്ഗം. അല്ലെങ്കില് പള്ളിയോട സേവാസംഘം നല്കുന്ന സ്പെഷ്യല് പാസ് വഴി സദ്യ ലഭ്യമാകും.സീസണ് തുടങ്ങിയ ആദ്യ ദിവസങ്ങളില് തന്നെ സ്പെഷ്യല് പാസ് പൂര്ണമായി.
