ന്യൂദല്ഹി: ഐക്യരാഷ്ട്രസഭയുടെ വംശീയ വിവേചന നിര്മാര്ജന സമതിയുടെ പരാമര്ശങ്ങള് രാഷ്ട്രീയ പ്രേരിതവും ദ്രോഹപരവുമെന്ന് ഭാരതം.
‘റിപ്പോര്ട്ടിലെ പരാമര്ശത്തെ അര്ഹിക്കുന്ന അവജ്ഞയോടെ തള്ളിക്കളയുന്നു,’ വിദേശകാര്യ മന്ത്രാലയ വക്താവ് രണ്ധീര് ജയ്സ്വാള് പറഞ്ഞു.
ആഗസ്റ്റ് 11, 12 തീയതികളില് ജനീവയില് നടന്ന ആനുകാലിക അവലോകനത്തില് ഇന്ത്യ പങ്കെടുത്തത് ക്രിയാത്മകമായ ഇടപെടലിന്റെ ആവേശത്തിലാണ്. എല്ലാത്തരം വംശീയ വിവേചനങ്ങളും ഇല്ലാതാക്കുന്നതിനുള്ള അന്താരാഷ്ട്ര കണ്വെന്ഷന് നേതൃത്വം വഹിച്ച ഭാരതം, വംശീയ വിവേചനത്തിനെതിരെ പോരാടുന്നതില് ഉറച്ചുനില്ക്കുന്നു.
സമിതിയുടെ നിരീക്ഷണങ്ങളോട് ഭാരതം വ്യസ്ഥാപിത നടപടിക്രമങ്ങളിലൂടെ പ്രതികരിക്കും. കണ്വെന്ഷന്റെ കല്പ്പനയ്ക്ക് അപ്പുറത്തേക്ക് പോകുന്ന പ്രവണത സമിതി പ്രകടിപ്പിക്കുന്നതായും രണ്ധീര് ജയ്സ്വാള് പറഞ്ഞു.
