ന്യൂദല്‍ഹി: ബഹുസ്വരതയെക്കുറിച്ച് പ്രസംഗിക്കുന്ന ന്യൂയോര്‍ക്ക് മേയര്‍ സൊഹ്റാന്‍ മംദാനിയ്‌ക്ക് പക്ഷെ ആര്‍എസ്എസ് സര്‍സംഘചാലക് മോഹന്‍ ഭാഗവത് ന്യൂയോര്‍ക്കില്‍ റാലി നടത്തുന്നത് ഇഷ്ടമല്ല. ഇതോടെ സൊഹ്റാന്‍ മംദാനിയുടെ ബഹുസ്വരതയുടെ കാപട്യത്തെക്കുറിച്ച് പരിഹാസം ഉയരുകയാണ്. സൊഹ്റാന്‍ മംദാനിയുടെ ചരിത്രം അറിയുന്നവര്‍ക്ക് അയാള്‍ എടുത്ത ഈ നിലപാടില്‍ തെല്ലും അസ്വാഭാവികത തോന്നാനിടയില്ല.
53 പേരുടെ കൂട്ടക്കൊലയ്‌ക്കിടയാക്കിയ ദല്‍ഹി കലാപത്തിലെ മുഖ്യസൂത്രധാരനെന്ന് പൊലീസ് കണ്ടെത്തിയ ഉമര്‍ഖാലിദിനെ മോചിപ്പിക്കണമെന്ന് ആവശ്യപ്പെടുന്ന സൊഹ്റാന്‍ മംദാനി ന്യൂയോര്‍ക്ക് നഗരത്തെ മുസ്ലിങ്ങളുടെ കുടിയേറ്റത്തിനുള്ള കേന്ദ്രമാക്കി മാറ്റിക്കൊണ്ടിരിക്കുകയാണ്. അവിടെ കുറഞ്ഞ വാടകയ്‌ക്ക് കെട്ടിടങ്ങള്‍ ഒരുക്കിക്കൊടുക്കാനുള്ള പ്രവര്‍ത്തനങ്ങളില്‍ സൊഹ്റാന്‍ മംദാനി വ്യാപൃതനാണ്. നേരത്തെ ഹിന്ദുക്കളെ ബസ്റ്റാര്‍ഡുകള്‍ എന്ന് വിളിക്കുകയും ശ്രീരാമദേവനെ അധിക്ഷേപിക്കുകയും ചെയ്തിട്ടുള്ള സൊഹ്റാന്‍ മംദാനി കടുത്ത ഹിന്ദു വിരുദ്ധനേതാവാണ്.
ആർ‌എസ്‌എസ് മേധാവിയുടെ പരിപാടിയെ എതിർക്കുന്ന ന്യൂയോർക്ക് മേയർ സൊഹ്‌റാൻ മംദാനിയുടെ നിലപാടിനെ ബിജെപി നേതാവ് നളിൻ കോഹ്ലി വിമര്‍ശിക്കുന്നത് ഇങ്ങിനെ: “ന്യൂയോർക്ക് മേയർ മിസ്റ്റർ മംദാനി മാധ്യമങ്ങളിൽ നടത്തിയ പ്രസ്താവനകൾ ഞാൻ കണ്ടിട്ടുണ്ട്; ബഹുസ്വരതയെക്കുറിച്ച് അദ്ദേഹം ധാരാളം സംസാരിച്ചിട്ടുണ്ട്. എന്നാൽ കൗതുകകരമെന്നു പറയട്ടെ, അദ്ദേഹം ബഹുസ്വരതയെ ഉയർത്തിക്കാട്ടുമ്പോൾ, ആർ‌എസ്‌എസ് മേധാവി മോഹൻ ഭഗവതിന്റെ റാലി ന്യൂയോർക്കിൽ നടത്തുന്നതില്‍ അദ്ദേഹം സന്തുഷ്ടനല്ല അദ്ദേഹം അതിനെ എതിർക്കുകയാണ്. ഇക്കാര്യത്തില്‍ അദ്ദേഹം തന്റെ നിലപാട് വ്യക്തമാക്കണം”.
“സൊഹ്റാന്‍ മംദാനി ശരിയ്‌ക്കും ബഹുസ്വരതയെ പ്രോത്സാഹിപ്പിക്കുന്നുണ്ടോ?കാരണം അദ്ദേഹത്തിന്റെ നിലപാട് അതിന് എതിരാണ്. നിങ്ങൾക്ക് ഒരു ബഹുസ്വര സമീപനമുണ്ടെങ്കില്‍ നിങ്ങള്‍ എല്ലാവരെയും ഉൾപ്പെടുത്തും. നിങ്ങൾക്ക് ഇഷ്ടപ്പെടാത്തവരെ പോലും. ഇഷ്ടപ്പെട്ടവര്‍ക്ക് അവരുടെ റാലിയിൽ പങ്കെടുക്കാൻ അർഹതയുണ്ടെന്ന് പറയും. “-നളിന്‍ കോഹ്ലി വിമര്‍ശിക്കുന്നു.
അമേരിക്ക സന്ദര്‍ശനം നടത്തുന്ന മോഹന്‍ ഭാഗവത് ന്യൂയോര്‍ക്കിലെ മാന്‍ഹാട്ടനില്‍ ഒരു റാലി നടത്താന്‍ തീരുമാനിച്ചിട്ടുണ്ട്. “ഈ റാലിയെ ഞാന്‍ പിന്തുണയ്‌ക്കില്ല. അതേ സമയം നഗരത്തില്‍ നടക്കുന്ന ഒരു റാലി റദ്ദാക്കാനുള്ള നിയമാധികാരം മേയര്‍ക്കുണ്ടെന്ന് തോന്നുന്നില്ല” എന്നാണ് ന്യൂയോര്‍ക്ക് മേയര്‍ സൊഹ്റാന്‍ മംദാനി പ്രതികരിച്ചത്. അതായത് റാലിയെ എതിര്‍ക്കുകയോ നിരോധിക്കുകയോ ചെയ്യില്ല. പക്ഷെ തനിക്ക് റാലി നടത്തുന്നതിനോട് ഇഷ്ടമില്ല എന്നാണ് സൊഹ്റാന്‍ മംദാനിയുടെ നിലപാട്.
ആഗസ്റ്റ് 29നാണ് മാന്‍ഹാട്ടനില്‍ മോഹന്‍ ഭാഗവതിന്റെ റാലി സംഘടിപ്പിച്ചിരിക്കുന്നത്. ഹിന്ദു അമേരിക്കൻ സമൂഹത്തെ ഒന്നിപ്പിക്കുന്ന “യൂണിവേഴ്സൽ വണ്‍നെസ് സെലിബ്രേഷൻ” ആയിട്ടാണ് ഈ പരിപാടി സംഘടിപ്പിക്കുന്നത്.
നിരവധി ഹിന്ദു അമേരിക്കൻ ഗ്രൂപ്പുകളുടെ പിന്തുണയോടെ സംഘാടകരായ അമേരിക്കൻ ഹിന്ദുസ് ഫോർ എൻഗേജ്‌മെന്റ് ആൻഡ് ഡയലോഗ് ആണ് പരിപാടി സംഘടിപ്പിക്കുന്നത്.
