കൊച്ചി: ശബരിമല ക്ഷേത്രത്തില് പ്രവേശിക്കാന് അനുമതി നിഷേധിച്ചതായി ആരോപിച്ച് ട്രാന്സ്ജെന്ഡര് സമര്പ്പിച്ച ഹര്ജിയില് ഹൈക്കോടതി സംസ്ഥാന സര്ക്കാരിന് നോട്ടീസ് അയച്ചു. ഹര്ജി ഇനി സെപ്റ്റംബര് 3ന് പരിഗണിക്കും.
ശബരിമലയില് നേരത്തെ രണ്ടുവട്ടം താന് ദര്ശനം നടത്തിയിട്ടുണ്ടെന്നും ഹര്ജി സമര്പ്പിച്ച സത്യശ്രീ ഷര്മിള റഹ്മത്തലി അവകാശപ്പെട്ടു.
ആഗസ്റ്റ് 20 ന് വ്രതമനുഷ്ഠിച്ച് താന് അയ്യപ്പ ദര്ശനത്തിനായി എത്തിയെന്നും എന്നാല് പമ്പ ഗണപതി ക്ഷേത്രത്തിന് സമീപം പോലീസ് തടഞ്ഞ് ട്രാന്സ്ജെന്ഡര് ആയതിനാല് മല കയറാന് അനുവദിക്കില്ലെന്ന് അറിയിച്ചുവെന്നും ഹര്ജിയില് പറയുന്നു. ട്രാന്സ്ജെന്ഡര് വ്യക്തികളെ ശബരിമലയിലേക്ക് പോകാന് അനുവദിക്കരുതെന്ന് തിരുവിതാംകൂര് ദേവസ്വം ബോര്ഡ് നിര്ദ്ദേശം നല്കിയിട്ടുണ്ടെന്ന് പമ്പ പോലീസ് സ്റ്റേഷനിലെ ഉദ്യോഗസ്ഥര് പറഞ്ഞു. എന്നാല് ഇത്തരമൊരു നിയന്ത്രണം ഏര്പ്പെടുത്തുന്ന രേഖാമൂലമുള്ള ഉത്തരവോ സര്ക്കുലറോ കാണിക്കാന് ആവശ്യപ്പെട്ടെങ്കിലും കാണിക്കാന് കഴിയില്ലെന്ന് അധികൃതര് പറഞ്ഞൊന്ന് ഹര്ജിയില് ചൂണ്ടിക്കാട്ടുന്നു.
