ചെന്നൈ: തമിഴ്നാട്ടില് വീണ്ടും ജനകീയ പ്രഖ്യാപനങ്ങളുമായി ടിവികെ സര്‍ക്കാര്‍. സ്ത്രീകള്‍ക്കുള്ള സൗജന്യ പദ്ധതികള്‍ ഉള്‍പ്പെടെ നിരവധി പദ്ധതികൾ തമിഴ്നാട് മുഖ്യമന്ത്രി പ്രഖ്യാപിച്ചു. ഓരോ കുടുംബത്തിനും മൂന്ന് സൗജന്യ എൽപിജി സിലിണ്ടറുകൾ നൽകുമെന്നും തുക നേരിട്ട് ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് ക്രെഡിറ്റ് ചെയ്യുമെന്നും വിജയ് പ്രഖ്യാപിച്ചു. തമിഴ്‌നാട്ടിലുടനീളമുള്ള ഏകദേശം 1.30 കോടി കുടുംബങ്ങൾക്ക് ഈ പദ്ധതിയുടെ പ്രയോജനം ലഭിക്കുമെന്ന് അദ്ദേഹം പറഞ്ഞു.
ജനുവരിയിൽ വരുന്ന പൊങ്കൽ ഉത്സവം മുതൽ ഈ പദ്ധതി നടപ്പിലാക്കും, എല്ലാ വർഷവും ഏകദേശം 4,000 കോടി രൂപ അനുവദിക്കും. 2.5 ലക്ഷം രൂപയിൽ താഴെ വാർഷിക വരുമാനമുള്ള കുടുംബങ്ങൾ, ചെറുകിട, നാമമാത്ര കർഷക കുടുംബങ്ങൾ, ഭിന്നശേഷിക്കാർ, മറ്റ് ദുർബല വിഭാഗങ്ങൾ എന്നിവർക്ക് ഈ പദ്ധതിയുടെ പ്രയോജനം ലഭിക്കും. കൂടാതെ ഓര്‍ഡിനറിക്കൊപ്പം എക്സ്പ്രസ്, ലിമിറ്റഡ് സ്റ്റോപ്പ്, ഡീലക്സ് സർക്കാർ ബസുകളിൽ സ്ത്രീകൾക്കും ട്രാൻസ്ജെൻഡറുകൾക്കും സൗജന്യമായി യാത്ര ചെയ്യാം.
