ന്യൂദല്ഹി: 2016 ലെ ലോക സാംസ്കാരികോത്സവത്തിനിടെ യമുന നദീതടങ്ങള്ക്കുണ്ടായ നാശനഷ്ടങ്ങള്ക്ക് ആര്ട്ട് ഓഫ് ലിവിംഗ് ഫൗണ്ടേഷനെ ഉത്തരവാദിയാക്കിയ ഹരിത ട്രൈബ്യൂണലിന്റെ ഉത്തരവ് സുപ്രീം കോടതി റദ്ദാക്കി. ഫൗണ്ടേഷന്റെ അപ്പീല് അനുവദിക്കുകയും ഫൗണ്ടേഷന് പരിസ്ഥിതി നഷ്ടപരിഹാരമായി നിക്ഷേപിച്ച 5 കോടി രൂപ തിരികെ നല്കാന് ദല്ഹി വികസന അതോറിറ്റിയോട് നിര്ദ്ദേശിക്കുകയും ചെയ്തു.
ആത്മീയ നേതാവ് ശ്രീ ശ്രീ രവിശങ്കര് സ്ഥാപിച്ച ആര്ട്ട് ഓഫ് ലിവിംഗ് ഫൗണ്ടേഷനുമായി ബന്ധപ്പെട്ട ഇന്ത്യന് സംഘടനയായ വ്യക്തി വികാസ് കേന്ദ്ര സമര്പ്പിച്ച അപ്പീലിലാണ് ഉത്തരവ്.
മൂന്ന് ദിവസത്തെ സാംസ്കാരികോത്സവം ആരംഭിക്കുന്നതിന് തൊട്ടുമുമ്പ്, 2016 മാര്ച്ചില് എന്ജിടിയുടെ ഇടക്കാല ഉത്തരവ് പ്രകാരമാണ് പരിസ്ഥിതി നഷ്ടപരിഹാരമായി 5 കോടി കെട്ടിവച്ചത്.
റോഡുകള്, റാമ്പുകള് അടക്കമുള്ളവയുടെ നിര്മ്മാണത്തിലും വെള്ളപ്പൊക്ക പ്രദേശത്തിന്റെ ഭൂപ്രകൃതിയിലും സ്വാഭാവിക ഒഴുക്കിലും മാറ്റം വരുത്തിയതായി ആരോപിച്ചാണ് ഹരിത ട്രൈബ്യൂണല് നടപടിയെടുത്തത്. അനുമതികള് നല്കുന്നതില് ദല്ഹി ഡവലപ്പ്മെന്റ് അതോറിറ്റിയും ദല്ഹി മലിനീകരണ നിയന്ത്രണ സമിതിയും വീഴ്ച വരുത്തിയതായി ട്രൈബ്യൂണല് വിമര്ശിക്കുകയും അവയ്ക്ക് പ്രത്യേക പിഴകള് ചുമത്തുകയും ചെയ്തിരുന്നു.
