മലപ്പുറം:ഉദ്ഘാടനത്തിന് രണ്ടുനാള് മാത്രം ശേഷിക്കേ,പുതിയ ഓഡിറ്റോറിയത്തിന് തീപ്പിടിച്ചു. തൊഴിലാളികള് കഷ്ടിച്ച് രക്ഷപ്പെട്ടു. നിലമ്പൂര് വല്ലപ്പുഴ സ്വദേശി കിണറ്റിംഗല് ജോണ് മാത്യുവിന്റെ ഉടമസ്ഥതയിലുള്ള പുതിയ ഓഡിറ്റോറിയത്തിലാണ് തീപ്പിടിച്ചത്.
ചുങ്കത്തറ മാമ്പൊയില് സിഎന്ജി റോഡിന് സമീപം പുതിയ ഓഡിറ്റോറിയത്തിന്റെ അന്തിമ ഘട്ട പ്രവൃത്തികള് പുരോഗമിക്കവെയാണ് തീപ്പിടത്തം. വ്യാഴാഴ്ച വൈകിട്ട് അഞ്ച് മണിയോടെയാണ് തീപ്പിടിത്തം ഉണ്ടായത്. ഷോര്ട്ട് സര്ക്യുട്ടാണ് തീപ്പിടിത്തത്തിന് കാരണമെന്നാണ് പ്രാഥമിക നിഗമനം. ഞായറാഴ്ച ആദ്യ വിവാഹത്തിന് ഓഡിറ്റോറിയം തുറന്ന് നല്കാനിരിക്കുകയായിരുന്നു.ഒരുകോടിയോളം നഷ്ടം വന്നതായാണ് പ്രാഥമിക കണക്ക്.
200ഓളം തൊഴിലാളികള് സംഭവ സമയം സ്ഥലത്തുണ്ടായിരുന്നു. തീ പടരുന്നത് കണ്ട് തൊഴിലാളികള് പുറത്തേക്കിറങ്ങിയതിനാല് രക്ഷപ്പെട്ടു. ഓഡിറ്റോറിയത്തിലെ സീലിംഗ് മുഴുവന് കത്തിനശിച്ചു. നിലമ്പൂരില് നിന്ന് അഗ്നിശമന സേനയുടെ രണ്ട് യൂണിറ്റ് എത്തിയാണ് തീ കെടുത്തിയത്. തൊഴിലാളികളുടെ പണിസാധനങ്ങളും കത്തി നശിച്ചു.
