കൊച്ചി:രാസലഹരി ഉപയോഗിച്ച ശേഷം ഭര്‍ത്താവ് ക്രൂരമായി മര്‍ദിക്കുകയും കിടപ്പറ ദൃശ്യങ്ങള്‍ ടെലിഗ്രാമില്‍ പങ്കുവയ്‌ക്കുകയും ചെയ്‌തെന്ന് അധ്യാപികയായ തൃശൂര്‍ സ്വദേശിനിയുടെ പരാതി. പാലക്കുഴ അമ്പലംകുന്ന് തണ്ടാശേരി വീട്ടില്‍ പ്രശാന്ത് പരമേശ്വരനെതിരെയാണ് കൂത്താട്ടുകുളം പൊലീസില്‍ പരാതി നല്‍കിയത്.
ഭര്‍ത്താവ് മയക്കുമരുന്നിന് അടിമയാണെന്നും ഇയാളും അമ്മ കൗസല്യയും കൂടി മര്‍ദിച്ചതായുമാണ് യുവതി പരാതിയില്‍ പറയുന്നത്.ഒരു വര്‍ഷത്തെ സൗഹൃദത്തെ തുടര്‍ന്ന് ഫെബ്രുവരി 16ന് ആണ് ഇവര്‍ വിവാഹിതരായത്.വിവാഹം കഴിഞ്ഞത് മുതല്‍ മനസിലാകാത്ത രീതിയില്‍ ഭര്‍ത്താവ് ലഹരി നല്‍കി കൊണ്ടിരുന്നു.എംഡിഎംഎ കേസിലെ പ്രതിയാണ് ഇയാളെന്ന് യുവതി അറിഞ്ഞിരുന്നില്ല. എനര്‍ജി ഡ്രിങ്കില്‍ അടക്കം ലഹരി കലര്‍ത്തി നല്‍കുകയായിരുന്നു.
പാനിക് അറ്റാക്കും ശ്വാസം കിട്ടാത്ത അവസ്ഥയും വന്നതോടെയാണ് ഭര്‍ത്താവ് തന്നെ കാര്യം തുറന്നു പറയുന്നത്. യുവതി പ്രശ്നമുണ്ടാക്കിയപ്പോള്‍ മുതല്‍ ഉപദ്രവം ആരംഭിച്ചു.ആദ്യ വിവാഹത്തിലെ ഒരു മകളും അമ്മയുമാണ് യുവതിയുടെ വീട്ടിലുള്ളത്. സ്വന്തം വീട്ടില്‍ നില്‍ക്കുമ്പോഴും വന്ന് ബഹളം ഉണ്ടാക്കി ഉപദ്രവിച്ചിട്ടുണ്ടെന്ന് യുവതി പറഞ്ഞു. സ്ഥിരമായി എംഡിഎംഎ വരുത്തി ഉപയോഗിച്ച് ലൈംഗികമായി ഉപദ്രവിക്കും.ടെലിഗ്രാമില്‍ വീഡിയോ കോള്‍ വഴി പലര്‍ക്കും ഇത് കാണിച്ചു കൊടുക്കും.ക്രൂരമായി മര്‍ദിക്കും. ഭര്‍ത്താവിന്റെ അമ്മ വന്ന് തന്റെ കൈപിടിച്ച് വച്ച് മകനെ കൊണ്ട് തല്ലിച്ച് അവശനിലയിലാക്കിയിട്ടുണ്ട്. ആഗസ്റ്റ് 15ന് വളരെ ക്രൂരമായി ഉപദ്രവിച്ചു. കഴുത്തിന്റെ ഡിസ്‌ക് ഇളകിപ്പോയെന്നും പരാതിയില്‍ പറയുന്നു.
തന്നെ മാനസിക രോഗിയാക്കി ചിത്രീകരിച്ച് ഒഴിവാക്കാനായിരുന്നു ശ്രമം.താന്‍ ആര്‍ത്തുനിലവിളിച്ചിട്ടും അവിടെയുണ്ടായ വേലക്കാരി പോലും തന്നെ സഹായിച്ചില്ല.അമ്മയുടെ കൈ കടിച്ച് തള്ളി മാറ്റിയാണ് അവിടെ നിന്നും രക്ഷപ്പെട്ടോടിയത്.
പൊലീസിനെ വിളിച്ചപ്പോള്‍ എസ്ഐയും സംഘവുമെത്തി രക്ഷിച്ചു.യൂബര്‍ വിളിച്ച് നേരെ ആശുപത്രിയിലേക്ക് പോവുകയായിരുന്നു. എംഡിഎംഎ പിടികൂടിയ കേസിലെ പ്രതിയാണ് പ്രശാന്ത്. പനങ്ങാട് സ്റ്റേഷനില്‍ ഇയാള്‍ക്കെതിരെ കേസ് ഉണ്ട്.
