തിരുവനന്തപുരം: കെഎസ്ആര്ടിസി ബസുകള് കാരണമുണ്ടാകുന്ന അപകടങ്ങള്ക്ക് ഇരയാകുന്നവര്ക്ക് ഇന്ഷുറന്സ് പരിരക്ഷ ഉറപ്പുവരുത്തുന്നതിനും യഥാസമയം ഇന്ഷുറന്സ് ആനുകൂല്യങ്ങള് ലഭിക്കുന്നതിന് വീഴ്ച വരുത്തരുതെന്നും മനുഷ്യാവകാശ കമ്മിഷന് ചെയര്പേഴ്സണ് ജസ്റ്റിസ് അലക്സാണ്ടര് തോമസ് മാനേജിങ് ഡയറക്ടര്ക്ക് നിര്ദേശം നല്കി.
കെഎസ്ആര്ടിസിയുടെ അമ്പത് ബസുകള് ഇന്ഷുറന്സ് പരിരക്ഷയില്ലാതെ സര്വീസ് നടത്തുകയാണെന്ന് ആരോപിച്ച് സമര്പ്പിച്ച പരാതിയിലാണ് നടപടി.
കെഎസ്ആര്ടിസി ബസുകളെ ഇന്ഷുറന്സ് പോളിസി എടുക്കുന്നതില് നിന്ന് ഒഴിവാക്കിയിട്ടുള്ളതായി ചീഫ് ലോ ഓഫീസര് സമര്പ്പിച്ച റിപ്പോര്ട്ടില് പറഞ്ഞു.യാത്രക്കാര്ക്കും ജീവനക്കാര്ക്കും ഗ്രൂപ്പ് ഇന്ഷുറന്സ് പരിരക്ഷ നല്കിവരുന്നുണ്ട്.ന്യൂ ഇന്ത്യ ഇന്ഷുറന്സ് കമ്പനി മുഖാന്തരമാണ് ഇതു നടപ്പാക്കിയിട്ടുള്ളത്.ഇന്ഷുറന്സ് ആനുകൂല്യം ലഭിക്കാന് കാലതാമസമുണ്ടായാല് പരാതി സമര്പ്പിക്കാമെന്നും കെഎസ്ആര്ടിസി നല്കിയ റിപ്പോര്ട്ടില് പറയുന്നു.
