തിരുവനന്തപുരം: അമിതഭാരവും സ്പെയര് പാര്ട്സിന്റെ അപര്യാപ്തതയും കാരണം കെഎസ്ആര്ടിസി ബസുകള് പാതിവഴിയില് യാത്ര അവസാനിപ്പിക്കേണ്ടി വരുന്നു. വഴിയില് ആകുന്ന ബസുകള്ക്കു പകരം നല്കാന് സാധിക്കാതെ കടുത്ത പ്രതിസന്ധിയിലേക്ക് കോര്പറേഷന് നീങ്ങുമ്പോള് ജീവനക്കാര് കടുത്ത ആശങ്കയിലാണ്.
പ്രിയദര്ശിനി ബസ് സര്വീസുകള് തുടങ്ങിയതോടെ പ്രതിദിന വനിതാ യാത്രക്കാരുടെ എണ്ണം 7.25 ലക്ഷത്തില് നിന്ന് 13 ലക്ഷമായി ഉയര്ന്നിട്ടുണ്ട്. ഒരു ബസില് ഒരു ദിവസം ശരാശരി 1200 പേര് യാത്ര ചെയ്തിരുന്നിടത്ത് ഇപ്പോള് 1600ല് അധികം പേര് യാത്ര ചെയ്യുന്നു. അമിതഭാരത്തില് സര്വീസ് നടത്തുന്നതോടെ ബസുകള്ക്ക് തകരാര് സംഭവിച്ച് യാത്ര പാതിവഴിയില് അവസാനിപ്പിക്കേണ്ടി വരുന്നു. ഇത്തരത്തില് ഒരു ഡിപ്പോയില് പത്തിലധികം ബസുകള് ഒരു ദിവസം വഴിയിലാകുന്നുണ്ട്. തകരാര് സംഭവിച്ച ബസുകള്ക്ക് സ്പെയര് പാര്ട്സുകള് മാറ്റിയിടാന് കെഎസ്ആര്ടിസിയില് സ്റ്റോക്കില്ല. ദീര്ഘദൂര സര്വീസുകള് നടത്തുന്ന ബസുകള്ക്ക് തകരാര് സംഭവിച്ചാല് പകരം സ്പെയര് പാര്ട്സുകള് മാറ്റിയിടുന്നത് മറ്റ് ബസുകളില് നിന്നെടുത്താണ്.
മലയോര മേഖലകളിലടക്കം ഭയത്തോടെയാണ് ഡ്രൈവര്മാര് ബസുകള് ഓടിക്കുന്നത്. മലയോര മേഖലയില് സര്വീസ് നടത്തുന്ന ബസുകള് നിരന്തരം പാതിവഴിയില് യാത്ര അവസാനിപ്പിക്കുന്നു. ഡ്രൈവറുടെ മനസാന്നിധ്യം കൊണ്ട് മാത്രമാണ് വന് ദുരന്തങ്ങള് ഒഴിവാകുന്നത്. യാത്രക്കാരുടെ എണ്ണം ഇത്രയധികം വര്ദ്ധിച്ചിട്ടും അതിനനുസരിച്ച് പുതിയ ബസുകള് നിരത്തിലിറക്കാന് കോര്പറേഷന് സാധിക്കുന്നില്ല.
നിലവിലുള്ള ഭൂരിഭാഗം ബസുകളും 15 വര്ഷത്തോളം പഴക്കമുള്ളവയാണ്. സപ്തംബര് 30ഓടെ കെഎസ്ആര്ടിസിയുടെ 1,117 ബസുകളുടെ കാലാവധി അവസാനിക്കുന്നുണ്ട്. കോര്പറേഷന് മുന്നിലെ വലിയ വെല്ലുവിളിയാണിത്. പുതിയ ബസുകള് വാങ്ങാന് പണമില്ലാത്തതിനാല്, പഴയ ബസുകള് റിഫര്ബിഷ്മെന്റ് നടത്തി നിരത്തിലിറക്കാനാണ് മാനേജ്മെന്റിന്റെ തീരുമാനം. ഇതിന്റെ ഭാഗമായി 15 ബസുകള് കഴിഞ്ഞ ദിവസം നിരത്തിലിറക്കിയിരുന്നു. എന്നാല് സ്പെയര് പാര്ട്സുകളുടെ അപര്യാപ്തത കാരണം ബസുകള് പൂര്ണമായും പണികഴിപ്പിക്കാതെ പെയിന്റ് മാത്രം അടിച്ച് നിരത്തിലിറക്കിയെന്ന് ജീവനക്കാര് ആരോപിക്കുന്നു. ഒരു പുതിയ ബസ് വാങ്ങുന്ന പണം ഉപയോഗിച്ച് 10 ബസുകള് അറ്റകുറ്റപ്പണി നടത്തി സര്വീസിനായി നിരത്തിലിറക്കാമെന്ന് മാനേജ്മെന്റ് വാദിക്കുമ്പോഴും, ഇത് യാത്രക്കാരുടെ സുരക്ഷയെ എത്രത്തോളം ബാധിക്കുമെന്ന ആശങ്ക ശക്തമാണ്.
ജന്മഭൂമി ഓണ്ലൈന്