ന്യൂദല്ഹി: പിഎം കെയേഴ്സ് ഫണ്ടിന്റെ ആകെ നീക്കിയിരിപ്പ് 8452.95 കോടി രൂപയായി ഉയര്ന്നു. 2023-24ല് ഇത് 7188.63 കോടി രൂപയായിരുന്നു. ഫണ്ട് സംബന്ധിച്ച സാമ്പത്തിക വിവരങ്ങളും ഓഡിറ്റ് റിപ്പോര്ട്ടും കേന്ദ്ര സര്ക്കാര് പുറത്തുവിട്ടു. കൊവിഡ് മഹാമാരി പോലെയുള്ള അടിയന്തര സാഹചര്യങ്ങള് നേരിടാനാണ് 2020ല് പിഎം കെയേഴ്സ് ഫണ്ട് രൂപീകരിച്ചത്.
ആകെ തുകയുടെ 93 ശതമാനത്തോളം വരുന്ന 7846.65 കോടി രൂപ ഷെഡ്യൂള്ഡ് ബാങ്കുകളില് സ്ഥിര നിക്ഷേപമാണ്. 605.41 കോടി രൂപ ഷെഡ്യൂള്ഡ് ബാങ്കുകളില് സേവിങ്സ് ബാങ്ക് അക്കൗണ്ടുകളിലായാണ് സൂക്ഷിച്ചിരിക്കുന്നത്. സ്ഥിര നിക്ഷേപത്തില് നിന്നുള്ള പലിശയാണ് ഫണ്ടിന്റെ പ്രധാന വരുമാന സ്രോതസ്. ഈ ഇനത്തില് മാത്രം കഴിഞ്ഞ വര്ഷം 469.38 കോടി രൂപ ലഭിച്ചു. രാജ്യത്തിനകത്തുനിന്ന് കഴിഞ്ഞ വര്ഷം 479.05 കോടിയും വിദേശത്ത് നിന്ന് 9.28 ലക്ഷവും സംഭാവനയായി ലഭിച്ചു. മുന് വര്ഷം 15.60 കോടി രൂപ ചെലവാക്കിയ സ്ഥാനത്ത് കഴിഞ്ഞ വര്ഷം 87.85 കോടി ചെലവഴിച്ചു. ഈ തുക കൊവിഡ് കാലത്ത് മാതാപിതാക്കളെ നഷ്ടപ്പെട്ട കുട്ടികള്ക്കായുള്ള പിഎം കെയേഴ്സ് ഫോര് ചില്ഡ്രന് പദ്ധതിക്കായാണ് ചെലവഴിച്ചത്.
ഔദ്യോഗിക വെബ്സൈറ്റായ പിഎം കെയേഴ്സ് പോര്ട്ടലില് ഓഡിറ്റ് റിപ്പോര്ട്ട് പ്രസിദ്ധീകരിച്ചിട്ടുണ്ട്. പ്രത്യേക ബജറ്റ് വിഹിതമില്ലാതെ പൂര്ണമായും വ്യക്തികളുടെയും സംഘടനകളുടെയും സ്വമേധയാ ഉള്ള സംഭാവനകള് വഴിയാണ് ഫണ്ട് പ്രവര്ത്തിക്കുന്നത്. കൊവിഡ് പോലെ ഏതെങ്കിലും തരത്തിലുള്ള അടിയന്തര സാഹചര്യങ്ങളെയോ ദുരിതങ്ങളെയോ നേരിടുക, ദുരിത ബാധിതര്ക്ക് സഹായം നല്കുക തുടങ്ങിയ ലക്ഷ്യങ്ങളോടെ പൊതു ചാരിറ്റബിള് ട്രസ്റ്റായാണ് പ്രൈം മിനിസ്റ്റേഴ്സ് സിറ്റിസണ് അസിസ്റ്റന്സ് ആന്ഡ് റിലീഫ് ഇന് എമര്ജന്സി സിറ്റുവേഷന്സ് ഫണ്ട് (പിഎം കെയേഴ്സ് ഫണ്ട്) രൂപീകരിച്ചത്.
ജന്മഭൂമി ഓണ്ലൈന്