ന്യൂദല്ഹി: മെഡിക്കല്, എന്ജിനീയറിങ് പ്രവേശന പരീക്ഷകളായ നീറ്റ്, ജെഇഇ എന്നിവയില് സമഗ്ര പരിവര്ത്തനങ്ങള് കൊണ്ടുവരണമെന്ന് ഒന്പതംഗ സമിതി ശിപാര്ശ. പ്രവേശനത്തിനു പ്ലസ് ടു പരീക്ഷയില് ലഭിച്ച മാര്ക്കിന് 50 ശതമാനം വെയ്റ്റേജ് നല്കണമെന്നതാണ്, കേന്ദ്രം നിയോഗിച്ച സമിതിയുടെ സുപ്രധാന നിര്ദേശം.
പരീക്ഷകളുടെ വിശ്വാസ്യതയും സുതാര്യതയും കാക്കുക, വിദ്യാര്ത്ഥികള് കോച്ചിങ് സെന്ററുകളെ ആശ്രയിക്കുന്നതു കഴിയുന്നത്ര കുറയ്ക്കുക എന്നിവയാണ് കേന്ദ്ര സര്ക്കാര് ലക്ഷ്യം.
പ്രവേശനത്തിനുള്ള മെറിറ്റ് ലിസ്റ്റ് തയാറാക്കുമ്പോള് പ്ലസ് ടു ബോര്ഡ് പരീക്ഷയിലെ മാര്ക്കിന് 50% പ്രാധാന്യം നല്കണം. (നിലവില് എന്ട്രന്സ് പരീക്ഷയെഴുതാന് ബോര്ഡ് പരീക്ഷകളിലെ യോഗ്യതാ മാര്ക്ക് മാത്രമാണ് മാനദണ്ഡം).
പ്രവേശന പരീക്ഷകളുടെ ചോദ്യങ്ങള് സ്കൂള് പാഠ്യപദ്ധതിയില് നിന്നു മാത്രമാക്കുകയെന്നതാണ് മറ്റൊരു നിര്ദേശം. ഇങ്ങനെ വിദ്യാര്ത്ഥികള് കോച്ചിങ് സെന്ററുകളെ അമിതമായി ആശ്രയിക്കുന്നത് തടയാം. പ്രവേശന പരീക്ഷയെഴുതാന് വിദ്യാര്ത്ഥികള്ക്കു വര്ഷത്തില് ഒന്നിലധികം അവസരങ്ങള് നല്കുക, ക്രമേണ കമ്പ്യൂട്ടര് അധിഷ്ഠിത പരീക്ഷയിലേക്കു മാറുക.
സമിതിയുടെ അന്തിമ റിപ്പോര്ട്ട് കേന്ദ്ര സര്ക്കാരിനു സമര്പ്പിക്കും.
