തൃശൂര്‍: അനിയന്ത്രിതമായ വിവാഹത്തിരക്കു മൂലം വരും ഞായറാഴ്ചകളില്‍ ഗുരുവായൂരില്‍ പ്രത്യേക ക്രമീകരണങ്ങള്‍ ഒരുക്കുമെന്ന് ദേവസ്വം ബോര്‍ഡ് അറിയിച്ചു. ആഗസ്റ്റ് 23 ഞായറാഴ്ച 422 വിവാഹങ്ങളും ആഗസ്റ്റ് 30 ഞായറാഴ്ച 338 വിവാഹങ്ങളുമാണ് ബുക്കു ചെയ്തിരിക്കുന്നത്. സെപ്റ്റംബര്‍ 13നുമുണ്ട് 320 വിവാഹങ്ങള്‍. ഇതുമൂലം ക്ഷേത്ര ദര്‍ശനത്തിനും വിവാഹ ചടങ്ങുകള്‍ നടത്തുന്നതിനും അധിക സജ്ജീകരണമൊരുക്കുമെന്ന് ബോര്‍ഡ് വ്യക്തമാക്കി.
ക്ഷേത്രത്തിനകത്തും പുറത്തും കൂടുതല്‍ പൊലീസിനെ വിന്യസിക്കണമെന്ന് ആവശ്യപ്പെട്ട് ജില്ലാ പൊലീസ് മേധാവിക്ക് കത്ത് നല്‍കും. ആഗസ്റ്റ് 23, ആഗസ്റ്റ് 30, സെപ്റ്റംബര്‍ 13 തീയതികളില്‍ പുലര്‍ച്ചെ 4 മണി മുതല്‍ വിവാഹങ്ങള്‍ നടത്തും. താലികെട്ടിനായി 6 മണ്ഡപങ്ങള്‍ സജ്ജമാക്കും. കൂടുതല്‍ ക്ഷേത്രംകോയ്‌മമാരെ മണ്ഡപത്തില്‍ നിയോഗിക്കും. കിഴക്കേ നട പൂര്‍ണമായും വണ്‍ വേ ആക്കും. വിവാഹസംഘം നേരത്തെയെത്തി തെക്കേ നടയിലെ പുതിയ നടപ്പന്തലിലെ കൗണ്ടറിലെത്തി ടോക്കണ്‍ വാങ്ങണം. വധൂ വരന്‍മാര്‍ക്കൊപ്പം ഫോട്ടോഗ്രാഫര്‍മാര്‍ ഉള്‍പ്പെടെ 24 പേര്‍ക്കാണ് മണ്ഡപത്തിന് സമീപം പ്രവേശനം. ഇവര്‍ പന്തലില്‍ കാത്തിരിക്കണം. ഊഴമെത്തുമ്പോള്‍ മേല്‍പ്പത്തൂര്‍ ഓഡിറ്റോറിയത്തില്‍ പ്രവേശിപ്പിക്കും. തുടര്‍ന്ന് കിഴക്കേ നട മണ്ഡപത്തിലെത്തി വിവാഹം നടത്താം. വിവാഹം കഴിഞ്ഞാലുടന്‍ സംഘം തെക്കേ നട വഴി മടങ്ങണം.
