ഗുരുവായൂര്: മലയാളി യുവതിയെ മിന്നു ചാര്ത്തി സ്കോട്ട്ലന്ഡ് പാര്ലമെന്റ് അംഗം. പിറവം പാമ്പാക്കുട സ്വദേശിനി നിതിന് ചന്ദിനെയാണ് (49) യുകെ മുന് പാര്ലമെന്റംഗവും നിലവില് സ്കോട്ട്ലന്ഡ് പാര്ലമെന്റംഗവുമായ മാര്ട്ടിന് ഡേ (55) താലി ചാര്ത്തിയത്. ചൊവ്വാഴ്ച രാവിലെ 11 മണിക്ക് ഗുരുവായൂരിലെ പുഷ്പാഞ്ജലി ഓഡിറ്റോറിയത്തിലായിരുന്നു വിവാഹ ചടങ്ങ്.സാക്ഷ്യം വഹിക്കാന് ഇരുവരുടെയും ബന്ധുക്കള്ക്കൊപ്പം നിതിന് ചന്ദിന്റെ ആദ്യ വിവാഹത്തിലെ 22കാരനായ മകന് വേദിക് ശങ്കറും ഉണ്ടായിരുന്നു.
സ്റ്റുഡന്റ് വിസയില് 2008ലാണ് നിതിന് ചന്ദ് യുകെയിലെത്തുന്നത്. ഇലക്ട്രിക്കല് ആന്ഡ് ഇലക്ട്രോണിക്സ് എന്ജിനിയറിംഗ് പഠനത്തിന് ശേഷം ഐടി മാനേജ്മെന്റില് മാസ്റ്റേഴ്സിനായാണ് അവിടെ എത്തിയത്. മാസ്റ്റേഴ്സിനുശേഷം നിതിന് പിഎച്ച്ഡി ചെയ്യുന്നതിനിടയിലാണ് യുകെ,വിദേശ വിദ്യാര്ഥികളുടെ എണ്ണം കുറയ്ക്കുന്നതിന്റെ ഭാഗമായി വിസ നിയമങ്ങളില് വലിയ മാറ്റങ്ങള് കൊണ്ടുവന്നത്. ഇത്തരത്തില് വിസ റദ്ദാക്കപ്പെട്ടവരില് നിതിനും ഉള്പ്പെട്ടിരുന്നു. ഇതോടെ ഇന്ത്യന് വിദ്യാര്ഥികളുടെ പ്രശ്നങ്ങള് ഉന്നയിച്ച് അതിനെതിരെ യുകെ പാര്ലമെന്റില് നിതിന് ശക്തമായി ലോബിയിംഗും പാര്ലമെന്റ് കമ്മിറ്റികള്ക്കു മുമ്പാകെ കാര്യങ്ങള് അവതരിപ്പിക്കുകയും ചെയ്തു. ഈ വേളയിലാണ് അന്ന് യുകെ പാര്ലമെന്റ് അംഗമായിരുന്ന മാര്ട്ടിന് ഡേയെ പരിചയപ്പെടുന്നത്.
യുകെ പാര്ലമെന്റില് ലിന്ലിത്ഗോ ആന്ഡ് ഈസ്റ്റ് ഫല്കിര്ക്ക് മണ്ഡലത്തെ പ്രതിനിധീകരിച്ചിരുന്ന മാര്ട്ടിന് ഡേ സ്കോട്ടിഷ് നാഷണല് പാര്ട്ടി അംഗമാണ്. 2016 ഫെബ്രുവരിയിലാണ് ആദ്യം ഇവര് തമ്മില് കാണുന്നത്.മേയിലാണ് മാര്ട്ടിന് തന്റെ പ്രണയം പറഞ്ഞ് നിതിനെ ജീവിതത്തിലേക്ക് ക്ഷണിച്ചത്. എന്നാല്, വിവാഹമോചിതയും 12 വയസുള്ള മകന്റെ അമ്മയുമാണ് താനെന്ന് നിതിന് പറഞ്ഞു. അന്ന് ജോലിയോ വിസയോ ഒന്നുമില്ലാതിരുന്ന നിതിനെ മാര്ട്ടിന് സ്വന്തം വീട്ടിലേക്കു കൂട്ടിക്കൊണ്ടുപോയി മാതാപിതാക്കളായ മാര്ഗരറ്റ് ഡേയ്ക്കും റോണ് ഡേയ്ക്കും പരിചയപ്പെടുത്തി. അവര്ക്കും നിതിനെ ഇഷ്ടമായി. പിന്നീട് മകന് വേദിക് ശങ്കറിനെയും യുകെയിലേക്ക് എത്തിച്ചു.മാര്ട്ടിന്റെ മാതാപിതാക്കളാണ് വേദിക്കിനെ സ്നേഹത്തോടെ വളര്ത്തി വലുതാക്കിയതെന്ന് നിതിന് പറഞ്ഞു.
പഠനം കഴിഞ്ഞ വേദിക് ശങ്കര് ഇപ്പോള് എഡിന്ബറോയില് കംപ്യൂട്ടര് കമ്പനിയില് സീനിയര് ഡേറ്റാബേസ് അഡ്മിനിസ്ട്രേറ്ററാണ്. നിതിന് ലിന്ലിത്ഗോയില് മാനേജ്മെന്റ് കണ്സള്ട്ടന്റായി ജോലി ചെയ്യുന്നതിന് പുറമെ സ്കോട്ടിഷ് നാഷണല് പാര്ട്ടിയിലും മാര്ട്ടിന്റെ പ്രചാരണ പ്രവര്ത്തനങ്ങളിലും സജീവമായി പ്രവര്ത്തിക്കുന്നു.
ഗുരുവായൂരില് വച്ച് വിവാഹം കഴിക്കണമെന്ന് താത്പര്യമുണ്ടായിരുന്നെങ്കിലും 10 വര്ഷം മുമ്പ് പിആറും ഫാമിലി വിസയുമൊക്കെ ലഭിക്കേണ്ടിയിരുന്നതിനാല് അവിടെ തന്നെ വിവാഹം നടത്തി. നിതിനെ വിവാഹം കഴിച്ചശേഷം 2018, 2019, 2023 വര്ഷങ്ങളില് മാര്ട്ടിന് ഡേ കേരളത്തിലെത്തിയെങ്കിലും ഗുരുവായൂര് വച്ചുളള വിവാഹം സാധ്യമായിരുന്നില്ല. പ്രളയവും കോവിഡും വീട്ടുകാരുടെ അസുഖങ്ങളുമൊക്കെയായി നീണ്ടു പോയ ഗുരുവായൂര് വിവാഹം ഇപ്പോഴാണ് സാധ്യമായത്. 1999 മുതല് ജനപ്രതിനിധിയായ മാര്ട്ടിന് ഡേ റീട്ടെയില് ബാങ്കറായും കൗണ്സിലറായും പ്രവര്ത്തിച്ചശേഷം മൂന്ന് തവണയായി ഒന്പതുവര്ഷം യുകെ പാര്ലമെന്റംഗമായിരുന്നു. സ്കോട്ടിഷ് പാര്ലമെന്റിലെ ‘ഓള് പാര്ട്ടി പാര്ലമെന്ററി ഗ്രൂപ്പ് ഫോര് ഇന്ത്യ ചെയര്’ കൂടിയാണ് മാര്ട്ടിന്.
മാത്യു കുഴല്നാടന് എംഎല്എയുടെ സ്കൂള് സഹപാഠിയാണ് നിതിന്. പിതാവ് വെറ്ററിനറി ഫീല്ഡ് ഓഫിസറായി വിരമിച്ച പാമ്പാക്കുട കുന്നത്തോത്ത് കെ എന് ചന്ദ്രന്.മാതാവ് പാമ്പാക്കുട മുന് ഗ്രാമപഞ്ചായത്തംഗം രാജമ്മ.
