ലക്നൗ : സ്വാതന്ത്ര്യദിനത്തിൽ ഹിന്ദു പെൺകുട്ടികളെ നിർബന്ധിച്ച് ബുർഖ ധരിപ്പിച്ച് നൃത്തം ചെയ്യിപ്പിച്ച സ്കൂൾ പൂട്ടി സീൽ ചെയ്ത് യുപി സർക്കാർ . ഗോണ്ട ജില്ലയിലെ ബബൻജോട്ട് ബ്ലോക്കിലെ ഓസ്നി ബുസുർഗിലുള്ള നോളജ് ബീം അക്കാദമിയാണ് സർക്കാർ പൂട്ടിച്ചത്.
ബുർഖ ധരിച്ച നാല് ഹിന്ദു പെൺകുട്ടികളാണ് അഞ്ച് വ്യത്യസ്ത സിനിമ ഗാനങ്ങൾക്കും ഭോജ്പുരി ഗാനങ്ങൾക്കും നൃത്തം ചെയ്തത്. വീഡിയോ പുറത്തുവന്നതോടെ, ഇതിനെതിരെ വിമർശനം ഉയർന്നു. തുടർന്ന് സ്കൂൾ മാനേജ്മെന്റ് സംഭവത്തിൽ ക്ഷമാപണം നടത്തി. പിന്നാലെ വിദ്യാഭ്യാസ വകുപ്പ് നടത്തിയ അന്വേഷണത്തിൽ സ്കൂൾ അംഗീകാരമില്ലാത്തതാണെന്നും കണ്ടെത്തി.
സംഭവത്തെക്കുറിച്ചുള്ള വാർത്ത പുറത്തുവന്നതിനെത്തുടർന്ന് വകുപ്പ് അന്വേഷണം നടത്തിയതായി ഗോണ്ട ജില്ലാ അടിസ്ഥാന വിദ്യാഭ്യാസ ഓഫീസർ അമിത് കുമാർ സിംഗ് പറഞ്ഞു. പെർമിറ്റ് ഇല്ലാതെയാണ് സ്കൂൾ പ്രവർത്തിച്ചിരുന്നതെന്ന് അന്വേഷണത്തിൽ കണ്ടെത്തി. ബിഎസ്എയുടെ കണക്കനുസരിച്ച്, സ്കൂൾ അടച്ചുപൂട്ടാൻ ബ്ലോക്ക് വിദ്യാഭ്യാസ ഓഫീസർ ഒരാഴ്ച മുമ്പ് നിർദ്ദേശം നൽകിയിരുന്നു, എന്നിട്ടും സ്കൂൾ പ്രവർത്തനം തുടർന്നു. തുടർന്നാണ് നടപടി.
