ബെംഗളൂരു: സുപ്രീം കോടതി ചീഫ് ജസ്റ്റിസ് സൂര്യകാന്തിനെയും ബാര് കൗണ്സില് ഓഫ് ഇന്ത്യ ചെയര്മാന് മനന് കുമാര് മിശ്രയെയും ബിരുദദാന ചടങ്ങിലേക്ക് ക്ഷണിച്ചതിനെതിരെ ബംഗളൂരുവിലെ പ്രമുഖ നിയമ കോളേജുകളിലൊന്നായ നാഷണല് ലോ സ്കൂള് ഓഫ് ഇന്ത്യ യൂണിവേഴ്സിറ്റി യിലെ വിദ്യാര്ത്ഥികളും രംഗത്തെത്തി. ഹൈദരാബാദിലെ നാഷണല് അക്കാദമി ഓഫ് ലീഗല് സ്റ്റഡീസ് ആന്ഡ് റിസര്ച്ച് ( നാല്സാര്) നിയമ സര്വകലാശാലയില് നടന്ന വിവാദത്തിന് പിന്നാലെയാണ് ബംഗളൂരുവിലും പ്രതിഷേധമുയരുന്നത്. ചീഫ് ജസ്റ്റിസ് സൂര്യകാന്തിനെ ബിരുദദാന ചടങ്ങില് മുഖ്യാതിഥിയായി ക്ഷണിച്ചതിനെതിരെ നിലപാടെടുത്ത നാല്സാറിലെ വിദ്യാര്ത്ഥികളുടെ എന് റോള്മെന്റ് തടഞ്ഞ ബാര് കൗണ്സില് ഓഫ് ഇന്ത്യയുടെ നടപടി വലിയ വിവാദമായിരുന്നു. തൊട്ടുപിന്നാലെ ആ ഉത്തരവ് പിന്വലിച്ചുവെങ്കിലും മിശ്രയ്ക്ക് വിദ്യാര്ത്ഥികളോട് ക്ഷമ ചോദിക്കേണ്ടിവന്നു.
‘അധികാരത്തിലിരിക്കുന്നവരോട് സത്യം തുറന്നു പറയുന്നതില് മാതൃകാപരമായ ധൈര്യവും ധാര്മ്മിക ബോധവും പ്രകടിപ്പിച്ച നാല്സാറിലെ വിദ്യാര്ത്ഥികളോട് ഞങ്ങള് ഐക്യദാര്ഢ്യം പ്രഖ്യാപിക്കുന്നു’വെന്നാണ് ബംഗളൂരുവിലെ വിദ്യാര്ത്ഥികളുടെ നിലപാട്. ചീഫ് ജസ്റ്റിസ് സൂര്യകാന്തിനെയും ബാര് കൗണ്സില് ഓഫ് ഇന്ത്യ ചെയര്മാന് മനന് കുമാര് മിശ്രയെയും തങ്ങളുടെ ചടങ്ങിലും പങ്കെടുപ്പിക്കരുതെന്നാണ് അവരുടെ ആവശ്യം.
